ལྷ་ས་རུ་ལྷ་བབས་དུས་ཆེན་སྐབས་རྒྱ་ནག་གཞུང་གིས་དམག་མིས་ལྟ་རྟོགས།

འདི་ལོའི་ལྷ་བབས་དུས་ཆེན་གྱི་ཉིན་མོར་བོད་ཀྱི་རྒྱལ་ས་ལྷ་སའི་གཙུག་ལག་ཁང་དང་། ར་མོ་ཆེ། རྩེ་པོ་ཏྭ་ལ། དེ་བཞིན་སེར་འབྲས་དགའ་གསུམ་སོགས་སུ་བོད་མི་ཚོས་མཆོད་འབུལ་སྨོན་ལམ་རྒྱ་ཆེ་སྒྲུབ་གནང་བཞིན་ཡོད་པའི་སྐོར་བོད་ནང་གི་བོད་མི་ཞིག་གིས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་བྱུང་།

ཁོང་གིས་གསུང་ན། ལྷ་བབས་དུས་ཆེན་ཉིན་ལྷ་ལྡན་གཙུག་ལག་ཁང་སོགས་སུ་མཆོད་འབུལ་གནང་མཁན་རྒྱུན་ལྡན་ལས་མང་པ་ཡོད་པ་དང་། དེ་བཞིན་སློང་མོ་བ་ཡང་ཇེ་མང་དུ་སོང་ཡོད་པ་ལྟར་བོད་མི་ཚོས་སྒོར་མོ་དང་ཟས་ཀྱི་སྦྱིན་གཏོང་རྒྱ་ཆེ་གནང་ཡོད་པ་དང་། དེ་བཞིན་དད་ལྡན་མཆོད་མཇལ་བ་མང་པོའི་ཁྲོད་དུ་རྒྱ་ནག་གཞུང་གིས་ཆེད་མངགས་དམག་མི།  དམག་ཆས་གྱོན་ཡོད་མེད་གཉིས་ཀས་མི་མང་གི་ཁྲོད་དང་།  འདུ་ཁང་གཡས་གཡོན་སོགས་སུ་བཀྲམས་ནས་ལྟ་རྟོགས་དམ་དྲག་ནན་པོ་བྱེད་བཞིན་ཡོད་པ་དང་། དམིགས་བསལ་གཙུག་ལག་ཁང་དུ་མཆོད་མཇལ་བ་རྣམས་ལ་དོ་ནན་མོ་བྱེད་བཞིན་ཡོད་པ་སོགས་བརྗོད་འདུག

དེ་བཞིན་རྒྱ་གར་ལྷོ་ཕྱོགས་ཡོད་པའི་སེར་འབྲས་དགའ་གཙོས་དགོན་སྡེ་ཁག་ཏུ་ལྷ་བབས་དུས་ཆེན་སྲུང་བརྩི་གནང་ཡོད་པ་དང་། ཡང་བལ་ཡུལ་གྱི་རྒྱལ་ས་ཀ་ཐི་མན་ཌུ་ནང་ཡོད་པའི་མཆོད་རྟེན་བྱ་རུང་ཁ་ཤོར་དང་། འཕགས་པ་ཤིང་དགོན་སོགས་སུ་ནམ་རྒྱུན་ལས་སྐོར་བ་བྱེད་མཁན་མང་པོ་ཡོད་པ་རེད་འདུག

དབྱངས་སྒྲོལ།