ཨ་རིའི་བདེ་སྲུང་དྲུང་ཆེའི་གཞུང་དོན་བསྐོར་བསྐྱོད་སྐོར།

༄༅༎ཨ་མི་རི་ཀའི་བདེ་སྲུང་དྲུང་ཆེ་ལི་ཡོན་པ་ནེ་ཊ་ ཨེ་ཤི་ཡ་དང་ཞི་བདེ་རྒྱ་མཚོའི་ཁུལ་དུ་གཞུང་དོན་སྐོར་བསྐྱོད་དུ་ཕེབས་བཞིན་པའི་སྐབས་ རྒྱ་ནག་གཞུང་གིས་ ཁུལ་དེའི་ནང་རྒྱ་ནག་གི་ཁེ་ཕན་དང་འབྲེལ་བའི་ལས་དོན་ལ་ཨ་རི་གཞུང་གིས་བརྩི་བཀུར་ཞུས་དགོས་པའི་སྐོར་འབོད་སྐུལ་བྱས་བཞག་༎

ཨ་རིའི་བདེ་སྲུང་དྲུང་ཆེ་ལི་ཡོན་པ་ནེ་ཊ་མཆོག་དེང་སང་ལྦེཏ་ནམ་དང་སིང་ག་པཱོར་ རྒྱ་གར་བཅས་ཞི་བདེ་རྒྱ་མཚོའི་ཡུལ་ཁག་ཏུ་གཞུང་དོན་སྐོར་བསྐྱོད་དུ་ཕེབས་ཡོད་པ་རེད་ ཕྱི་སྲིད་དྲུང་ཆེ་མཆོག་གིས་ གཞུང་དོན་སྐོར་བསྐྱོད་ཀྱི་ལས་འཆར་འདི་བཞིན་ སྔ་ལོ་ཨ་མི་རི་ཀའི་སྲིད་འཛིན་སྦ་རཀ་ཨོ་སྦ་མ་མཆོག་ནས་ ཨེ་ཤི་ཡ་དང་ཞི་བདེ་རྒྱ་མཚོའི་ཁུལ་གྱི་ཡུལ་ཁག་དང་ཨ་རིའི་དབར་འཐབ་ཇུས་ཀྱི་ཐོག་ནས་འབྲེལ་ལམ་ཉེ་བོ་བཟུང་རྒྱུའི་སྲིད་ཇུས་ལག་བསྟར་གནང་རྒྱུའི་ཆ་ཤས་ཤིག་ཡིན་པ་རེད་ ཨ་རིའི་སྲིད་འཛིན་མཆོག་ནས་སྲིད་ཇུས་འདི་གསལ་བསྒྲགས་གནང་སྐབས་ ཁུལ་དེའི་ནང་རྒྱ་ནག་གི་སྟོབས་ཤུགས་ལ་འགྲན་རྩོད་ཀྱི་བློ་དོགས་བཟོས་ཡོད་པ་མ་ཟད་ ད་རེས་ཨ་རིའི་བདེ་སྲུང་དྲུང་ཆེ་མཆོག་ནས་ ཞི་བདེ་རྒྱ་མཚོའི་ཁུལ་དུ་ཆེད་ཕེབས་གནང་རྒྱུའི་དུས་ཚོད་འདི་ཡང་ དེང་སྐབས་ལྷོ་རྒྱ་ནག་རྒྱ་མཚོའི་གླིང་ཕྲན་གྱི་བདག་དབང་ཐོག་ རྒྱ་ནག་དང་ཞི་བདེ་རྒྱ་མཚོའི་ཁུལ་གྱི་རྒྱལ་ཁབ་མང་པོའི་དབར་འཁྲུག་རྩོད་ཆེན་པོ་བྱུང་བཞིན་པའི་དུས་ཚོད་དང་སྟབས་བསྟུན་ཆགས་ཡོད་པ་རེད་ རེས་གཟའ་ཕུར་བུའི་ཉིན་ རྒྱ་ནག་གི་རྒྱལ་ས་པེ་ཅིང་དུ་ རྒྱ་ནག་ཕྱི་སྲིད་ལས་ཁུངས་ཀྱི་འཆར་ཅན་་་གསར་འགོད་ལྷན་ཚོགས་སྐབས་  ཕེརས་སི་གསར་ལས་ཁང་གི་གསར་འགོད་པས་ ཨ་རིའི་ཕྱི་སྲིད་དྲུང་ཆེ་མཆོག་ ཞི་བདེ་རྒྱ་མཚོའི་ཡུལ་ཁག་ནང་གཞུང་དོན་ཕྱོགས་བསྐྱོད་གནང་བཞིན་པའི་གནད་དོན་ཐད་ རྒྱ་ནག་གཞུང་གིས་ཚོར་སྣང་འདྲི་རྩད་བྱས་པར་ རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལིའུ་ལྦེ་མིན་གྱིས་ ཨ་རི་དང་རྒྱ་ནག་གཉིས་ཕྱོགས་ནས་ ཞི་བདེ་རྒྱ་མཚོའི་ཁུལ་དུ་བཟང་ཕྱོགས་དང་ཕན་རླབས་ལྡན་པའི་ལས་དོན་མཉམ་སྦྲེལ་བྱ་རྒྱུའི་རེ་བ་དང་ ཆབས་ཅིག་ ཁུལ་དེའི་ནང་རྒྱ་ནག་གི་ཁེ་ཕན་དང་ དེ་བཞིན་རྒྱ་ནག་གཞུང་གི་བློ་འཚབ་ཆེ་བའི་གནད་དོན་རིགས་ལ་ ཨ་རི་གཞུང་གིས་བརྩི་བཀུར་དང་ལེན་ཡོང་བའི་རེ་འདུན་བྱེད་བཞིན་ཡོད་ཅེས་ རྒྱ་ནག་གི་ཁེ་ཕན་ལ་འགོག་རྐྱེན་བཟོ་རྒྱུ་མེད་་པའི་སྐོར་གསལ་བརྡ་བཏང་ཡོད་པ་རེད་༎