༸གོང་ས་མཆོག་ཚེས་གཏོར་རྟེན་འབུལ་ཐོག་ཞབས་སོར་འཁོད།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྕགས་སྟག་གནམ་ལོ་གསར་བཞད་རྟེན་འབྱུང་གི་ཉིན་དང་པོར་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་བསྐྱང་སྟེ་ཚེས་གཏོར་དང་དགྱེས་སྟོན་མཛད་རིམ་གྱི་དབུ་བཞུགས་གནང་འདུག

བོད་ལོ་གསར་དུ་བཞད་པའི་རྟེན་འབྱུང་ཉིན་དང་པོའི་སྔ་དྲོའི་ཆུ་ཚོད་༧་ཐོག་༸གོང་ས་མཆོག་ཐེག་ཆེན་ཆོས་གླིང་གཙུག་ལག་ཁང་གི་ཡང་སྟེང་དུ་དཔལ་ལྡན་འདོད་ཁམས་དབང་ཕྱུག་མའི་ཚེས་གཏོར་རྟེན་འབུལ་དངོས་གཞིའི་ཐོག་ཞབས་སོར་འཁོད་པའི་ཐོག་མར་རྣམ་གྲ་མཁན་རིན་པོ་ཆེས་མཎཌལ་རྟེན་གསུམ་འདེགས་འབུལ་དང་། དེ་རྗེས་ལྷ་མོའི་གསུང་སྐད་འདོན་གནང་མཛད་པ་སོགས་ཚེས་གཏོར་གྲུབ་མཚམས་ཆུ་ཚོད་༩་པའི་ཐོག་གཙུག་ལག་ཁང་ནང་དགྱེས་སྟོན་མཛད་སྒོར་བཅར་བ་རྣམས་གདན་འཛོམས་ཐོག་རྣམ་གྲའི་གསུང་ཞབས་རྣམས་ནས་ཞལ་འདོན་ཚིགས་མཚམས་སོ་སོར་རྣམ་གྲ་མཁན་རིན་པོ་ཆེ་ནས་རྟགས་བརྒྱད་དང་། རྒྱལ་སྲིད་སྣ་བདུན། རྫས་བརྒྱད་བཅས་རིམ་འབུལ་གྱིས་ཤིས་བརྗོད་དང་བཅས་ལེགས་པར་གྲུབ་མཚམས་ཁྲིམས་ཞིབ་པ་ཆེ་བ་དང་། བོད་མི་མང་སྤྱི་འཐུས་ཚོགས་གཙོ་མཆོག

བཀའ་བློན་ཁྲི་པ་བཅས་ཀྱིས་མཎཌལ་རྟེན་གསུམ་འདེགས་འབུལ་ཞུས་རྗེས་སླར་ཡང་བགྲོ་གླེང་དབུ་ཚུགས་གནང་། དེ་ནས་བགྲོ་གླེང་པས་ཚིག་བཀྲ་བཅད་དེ་༸གོང་ས་མཆོག་ལ་མཇལ་དར་ཕུལ་བར་ཕྱག་སྲུང་བསྩལ་བ་མ་ཟད།    ༸གོང་ས་མཆོག་གི་བོད་ཕྱི་ནང་གཉིས་སུ་གནས་པའི་བོད་རིགས་ལ་ཕྱི་ནང་ཤེས་ཡོན་ལ་སྦྱང་པ་མཐར་ཕྱིན་པ་བྱ་གལ་ཆེ་བ་དང་ དེ་བཞིན་གཞིས་ལུས་བོད་མི་རྣམས་ནི་དོན་གྱི་བདག་པོ་ཡིན་པ་དང་།    གཞིས་ལུས་བོད་མིའི་དཀའ་སྡུག་ལ་གདུང་སེམས་མཉམ་སྐྱེད་ཞུས་ཏེ་ལོ་གསར་དགའ་སྟོན་བྱེད་མི་རུང་བ་སོགས་ཀྱི་བཀའ་སློབ་ཟབ་མོ་བསྩལ་འདུག ཆོས་ཕྱོགས་ཀྱི་མཛད་སྒོའི་ནང་བཙན་བྱོལ་བོད་གཞུང་ལས་ཁུངས་མ་ལག་གི་སྲི་ཞུ་བ་དང་ཕྱི་ནང་མི་མང་ཚོགས་བཞུགས་གནང་འདུག།