རྒྱ་རིགས་སློབ་མར་མཇལ་འཕྲད་བཀའ་སློབ་བསྩལ་བ།

༄༅།    །ཕྱི་ཚེས་ ༡༥ རེས་གཟའ་མིག་དམར་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཡུལ་ནང་རྟེན་གཞི་བྱས་པའི་ St Anne’s  མཐོ་སློབ་ཁང་དུ་རྒྱ་རིགས་སློབ་ཕྲུག་༥༠ ཙམ་ལ་མཇལ་ཁ་དང་བཀའ་སློབ་བསྩལ་གནང་མཛད་འདུག དེ་ཡང་དབུས་བོད་མིའི་སྒྲིག་འཛུགས་ཀྱི་དྲ་ཚིགས་ཐོག་གནས་ཚུལ་བཀོད་སྤེལ་གཞིགས་ན།  ༸གོང་ས་མཆོག་གིས་རྒྱ་རིགས་སློབ་མ་རྣམས་དང་མཇལ་འཕྲད་སྐབས་མགོན་པོ་གང་ཉིད་མཆོག་གི་སྐུ་ཚེ་ཧྲིལ་པོའི་ནང་མཛད་ཁུར་དམ་བཅའ་གསུམ་སྟེ་འགྲོ་བ་མིའི་རིགས་ཡོངས་ཀྱི་བདེ་སྐྱིད་དང་བཟང་སྤྱོད་གོང་སྤེལ་གཏོང་རྒྱུ་དང་།  ཆོས་ལུགས་མཐུན་སྒྲིལ། བོད་མི་ཞིག་ཡིན་པའི་ཆ་ནས་བོད་ཀྱི་ཐུན་མོང་མ་ཡིན་པའི་རིག་གཞུང་དང་། ནང་ཆོས་མི་ཉམས་རྒྱུན་འཛིན་མཛད་རྒྱུའི་སྐོར་ངོ་སྤྲོད་གནང་པ་དང་སྦྲགས།    དེང་སྐབས་རྒྱ་ནག་ནང་། ནང་ཆོས་དར་སྤེལ་ཤུགས་ཆེ་འགྲོ་བཞིན་པའི་སྐོར་བཀའ་སྩལ་གནང་འདུག།   དེ་ཡང་༧ གོང་ས་མཆོག་གིས་རྒྱ་ནག་ནི་སྲོལ་རྒྱུན་ཐོག་ནས་ནང་པའི་རྒྱལ་ཁབ་ཅིག་ཡིན་ཞིང་།  སྔར་ ༡༩༥༤།༥༥ ལོར་༸གོང་ས་མཆོག་རྒྱ་ནག་ཏུ་ཆིབས་བསྒྱུར་གནང་སྐབས་ནང་པའི་དགོན་པ་དང་གནས་ས་མང་པོ་ མཇལ་མྱོང་ཡོད་པ་དང་།  དེང་གི་ཆར་རྒྱ་ནག་ནང་ནང་པ་ས་ཡ་ ༤༠༠ ཙམ་ཡོད་པའི་ཁྲོད་མང་ཆེ་བས་བོད་བརྒྱུད་ནང་བསྟན་ལ་དོ་སྣང་ཆེན་པོ་བྱེད་བཞིན་ཡོད་པ་གསལ་འདོན་གནང་བཞག་  མཇལ་ཁའི་སྐབས་རྒྱ་རིགས་སློབ་མ་ཚོས་གལ་ཏེ་མ་འོངས་པར་༸གོང་ས་མཆོག་གི་ཡང་སྲིད་མ་ཕེབས་ཚེ་བོད་བརྒྱུད་ནང་བསྟན་དེ་ ཇི་ལྟར་འཚོ་གནས་ཐུབ་མིན་སྐོར་བཀའ་འདྲི་ཞུས་པར།  གོང་ས་མཆོག་གིས་ སྟོན་པ་བཅོམ་ལྡན་འདས་ཀྱི་ཡང་སྲིད་མེད་པའི་ཐོག་ནས་སྟོན་པའི་གསུང་རྣམས་ལོ་ སྟོང་ཕྲག་གཉིས་དང་ཕྱེད་ཀའི་རིང་དར་སྤེལ་འབྱུང་བཞིན་ཡོད།  བོད་ནང་དུ་ནང་ཆོས་དེ་དུས་རབས་ ༧ པའི་ནང་དར་སྤེལ་བྱུང་ཡོད་པ་དང་། ཏཱ་ལའི་བླ་མ་དངོས་སུ་མེད་ཀྱང་ནང་ཆོས་ཀྱི་རྩ་བ་སྲ་བརྟན་ཚུགས་ཐུབ་པ་བྱུང་ཡོད་པའི་བཀའ་ལན་བསྩལ་གནང་མཛད་འདུག  ཡང་༸གོང་ས་མཆོག་ནས་རྒྱ་མི་རིགས་རྣམས་ཀྱིས་ས་ཕྱོགས་གང་དུ་གནས་ཀྱང་སོ་སོའི་སྐད་ཡིག་དང་རིག་གཞུང་འཛིན་སྐྱོང་སྤེལ་གསུམ་གྱི་འབད་བརྩོན་ལྷོད་མེད་བྱེད་བཞིན་པ་དེར་བསྔགས་བརྗོད་མཛད་ཡོད་པས་མ་ཟད། རྒྱ་རིགས་སློབ་མ་རྣམས་ལ་དུས་རབས་ ༢༡ པའི་ནང་པ་ཞིག་བྱེད་དགོས་པའི་བཀའ་སློབ་ཕེབས་པའི་ཐོག་ནང་ཆོས་ལ་ཡིད་ཆེས་བྱས་པ་ཙམ་ཞིག་མིན་པར་ཚན་རིག་དང་མཐུན་པའི་སྒོ་ནས་དཔྱད་ཞིབ་བྱས་ཏེ་རང་རྒྱུད་ལ་ཡིད་ཆེས་ཐོབ་པའི་ཐོག་ནས་དད་པ་ཞིག་སྐྱེ་དགོས་པ་ཡིན་སྐོར་ལམ་སྟོན་བཀའ་སློབ་གནང་འདུག།   
གསར་འགོད་པ་དོན་གྲུབ་རྣམ་རྒྱལ།