༸གོང་ས་མཆོག་གིས་ཆོས་ལུགས་རིས་མེད་མཐུན་ཚོགས་ཀྱི་སྐུ་ཚབ་རྣམས་ལ་བཀའ་སློབ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཟླ་༡༢ ཚེས་༢༡ རེས་གཟའ་པ་སངས་སྔ་དྲོར་གནས་མཆོག་རྡོ་རྗེ་གདན་དུ་ཆོས་ལུགས་རིས་མེད་མཐུན་ཚོགས་ཀྱི་སྐུ་ཚབ་རྣམས་ལ་མིའི་བསམ་བློའི་བདེ་ཐང་བསྐྲུན་ཐབས་ལ་འབད་བརྩོན་དགོས་པ་དང་། ཆོས་ལུགས་ནང་ཕན་ཚུན་མཐུན་ལམ་དགོས་གལ་ཆེ་བའི་སྐོར་བཀའ་སློབ་ཕེབས་འདུག

གནས་མཆོག་རྡོ་རྗེ་གདན་ནང་ཡོད་པའི་ཆོས་ལུགས་མི་འདྲ་བ་༧ ཙམ་ལས་གྲུབ་པའི་མཐུན་ཚོགས་གྱི་སྐུ་ཚབ་༣༥  ཙམ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁར་བཅར་ཞིང་།  ཁོང་རྣམས་ལ་༧གོང་ས་༧སྐྱབས་མགོན་ཆེན་པོ་མཆོག་གིས།  དུས་རབས་༢༡ དེའི་ནང་ཕྱི་དངོས་པོའི་འཕྲུལ་རིག་འཕེལ་རྒྱས་ཚད་མཐོ་པོ་འགྲོ་བཞིན་ཡོད་ཀྱང་། ཕྱི་དངོས་པོའི་འཕྲུལ་རིག་འཕེལ་རྒྱས་ཀྱིས་ནང་སེམས་རྒྱུད་ཀྱི་བྱམས་པ་དང་སྙིང་རྗེ་ལ་སོགས་པ་སེམས་ཀྱི་ཡོན་ཏན་བསྐྲུན་ཐུབ་ཐབས་མེད་པར་བརྟེན།  སློབ་གྲྭ་ཁག་གི་ཤེས་ཡོན་ལམ་ལུགས་ནང་སྔོན་འགྲོའི་འཛིན་རིམ་གྱི་གནས་ཚད་ནས་ཕྲུ་གུའི་གཟུགས་པོའི་བདེ་ཐང་བསྐྲུན་ཐབས་བྱས་པ་ཙམ་མ་ཡིན་པར་བསམ་བློའི་བདེ་ཐང་བསྐྲུན་ཐབས་འབད་བརྩོན་བྱ་དགོས་རྒྱུ་གལ་ཆེན་པོ་ཡིན་པ་བཀའ་གནང་འདུག ད་དུང་སྐུ་ཚབ་ཚོར་ལམ་སྟོན་ཕེབས་པའི་ནང་། འཛམ་གླིང་ནང་གི་ཆོས་ལུགས་མི་འདྲ་བ་ཡོད་པ་དེ་དག་གིས་མི་བཟང་པོ་ཞིག་བཟོ་ཐབས་དང་འབྲེལ་བ་བསླབ་བྱ་གཅིག་པ་གནང་གི་ཡོད་སྟབས།  ཆོས་ལུགས་ནང་ཕན་ཚུན་གུས་བརྩི་དགོས་པའི་ཐོག།  ཆོས་ལུགས་ཁག་གིས་དེང་དུས་ཀྱི་ཤེས་ཡོན་ལམ་ལུགས་ནང་བསམ་བློའི་བདེ་སྐྱིད་བསྐྲུན་ཐབས་ཀྱི་བཟང་པོའི་བསླབ་བྱ་མི་འདེངས་བ་དེ་ཁ་གསབ་ཀྱི་ཆེད་དུ་ཆོས་ལུགས་དང་མ་འབྲེལ་བའི་བཟང་པོའི་བསླབ་བྱ་རྣམས་ཉམས་ལེན་བྱ་ཐུབ་པ་ཡིན་ཚེ་དེ་ཡིས་འགྲོ་བ་མིའི་སྤྱི་ཚོགས་དེ་འཆམ་མཐུན་ཡོང་རྒྱུར་ཕན་ཐོགས་འབྱུང་རྒྱུ་ཡིན་པ་བཀའ་གནང་འདུག

གསར་འགོད་པ་ཉི་མ་གཡུ་སྒྲོན།