རྒྱ་ནག་ནི་བསྟུད་མར་ལོ་དགུའི་རིང་འཛམ་གླིང་ནང་རང་དབང་གི་གནས་སྟངས་ཆེས་སྡུག་ཤོས་ཡིན་འདུག

དེ་ཡང་ཨ་མི་རི་ཀའི་རང་དབང་ཁང་པ་ཞེས་པའི་འགྲོ་བ་མིའི་ཐོབ་ཐང་ཚོགས་པས་འདི་ཚེས་༤རེས་གཟའ་ལྷག་པའི་ཉིན། ཕྱི་ལོ་༢༠༢༣ལོའི་འཛམ་གླིང་གི་དྲྭ་གནས་རང་དབང་གནས་སྟངས་སྐོར་གྱི་སྙན་ཐོ་འདོན་སྤེལ་གནང་ཡོད་པ་དང་། དེའི་ནང་འཛམ་གླིང་གི་རྒྱལ་ཁབ་༧༠ཡི་དྲྭ་གནས་རང་དབང་གི་གནས་སྟངས་དང་ཁོར་ཡུག་ལ་རྟོག་ཞིབ་བྱས་ཡོད་པ་དང་། འཛམ་གླིང་གི་དྲྭ་གནས་བེད་སྤྱོད་གནང་མཁན་བརྒྱ་ཆའི་༨༩ ལ་འབྲེལ་འདྲིས་བྱས་ནས་རྒྱུས་ལོན་བྱས་པའི་ཁྲོད། འཛམ་གླིང་ནང་བསྟུད་མར་ལོ་༡༣ རིང་དྲྭ་གནས་རང་དབང་གི་གནས་སྟངས་ཇེ་སྡུག་ཕྱིན་ཡོད་པ་དང་། ད་ལོའི་སྙན་ཐོའི་ནང་གཙོ་བོ་སྲིད་དབང་སྒེར་གཅོད་སྲིད་གཞུང་ཚོས་རིག་ནུས་དྲྭ་བའི་ཚན་རྩལ་བེད་སྤྱོད་ཀྱིས་སྲིད་གཞུང་གི་དབང་ཤུགས་རྒྱ་བསྐྱེད་གནད་དོན་སྐོར་ཡིན་ཞིང་། རྒྱལ་ཁབ་༢༩ ཡི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཡིན་པ་དང་། རྒྱལ་ཁབ་༢༠ཡིས་དམིགས་འབེན་འགྲུབ་ཐབས་བྱས་ཡོད་པ་བཅས་བཀོད་པའི་ནང་། རྒྱ་ནག་ནི་བསྟུད་མར་ལོ་དགུའི་རིང་འཛམ་གླིང་ནང་རང་དབང་ཆེས་སྡུག་ཤོས་མཐའ་མ་དེ་ཡིན་པ་དང་། རྟོག་ཞིབ་སྐར་གྲངས་བརྒྱ་ཐམ་པ་ཐོབ་སྐལ་ཡོད་པའི་ཁྲོད་རྒྱ་ནག་ལ་ད་ལོ་སྐར་མ་དགུ་མ་གཏོགས་མེད་པ་རེད། དེ་མིན་ཐེ་ཝན་ལ་སྐར་མ་༧༨ཐོབ་ནས་ཨེ་ཤེ་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་རང་དབང་ཐོབ་ཐང་ལེགས་ཤོས་ཨང་དང་པོ་དེ་ཡིན་འདུག
ཨ་མི་རི་ཀའི་རང་དབང་ཁང་པའི་སྙན་ཐོའི་ནང་། རྒྱ་ནག་གཞུང་གིས་རིག་ནུས་དྲྭ་བའི་ཚན་རྩལ་ཐད་མ་དངུལ་འབོར་ཆེན་བཏང་ནས་འབྲེལ་ཡོད་ཚོང་ལས་ཁང་དང་སྲིད་གཞུང་གི་དབང་བསྒྱུར་བརྟན་པོ་ཡོང་བར་ཞབས་ཞུ་བྱེད་བཞིན་པ་དང་། རྒྱ་ནག་གཞུང་གིས་རྒྱལ་ཁབ་ཀྱི་དྲྭ་གནས་ཆ་འཕྲིན་ལས་ཁང་གི་འཁོར་སྐྱོད་གྲངས་རྩིས་དང་གསར་འགྱུར་སྡེ་ཁག་རིག་ནུས་ཚན་རྩལ་བཅས་མཉམ་བསྲེས་བྱས་ནས། རྒྱ་ནག་གིས་དྲ་གནས་ཁོར་ཡུག་ལ་ཞིབ་བཤེར་ནན་མོ་དང་སྟངས་འཛིན་བྱེད་བཞིན་པ་བརྗོད་འདུག
དེ་མིན་རྒྱ་ནག་གིས་འཕྲུལ་ཆས་ཀྱི་མིས་ཁ་བརྡ་བྱེད་པ་བརྒྱུད་ནས་རྒྱ་ནག་དམར་ཕྱོགས་གཞུང་གིས་དབང་བསྒྱུར་སྲ་བརྟན་དུ་གཏོང་གི་ཡོད་པའི་སྐོར་ཡང་སྙན་ཐོའི་ནང་བཀོད་འདུག ད་དུང་སྙན་ཐོའི་ནང་རྒྱ་ནག་གཙོས་པའི་དབང་ཆ་སྒེར་གཅོད་སྲིད་གཞུང་ཚོས་དྲྭ་གནས་ཚན་རྩལ་བརྒྱུད་དབང་བསྒྱུར་སྲ་བརྟན་དོ་དམ་གྱི་རྣམ་པ་དེར་དམངས་གཙོའི་རྒྱལ་ཁབ་དག་གིས་ཐུན་མོང་གིས་ཕར་རྒོལ་བྱེད་རྒྱུ་གལ་འགངས་ཆེན་པོ་ཆགས་ཡོད་པ་གསལ་འདེབས་གནང་ཡོད་འདུག

གསར་འགོད་པ། ལྕགས་མོ་འཚོ།
རྩོམ་སྒྲིག་པ། ལྷུན་གྲུབ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།