༧གོང་ས་མཆོག་གིས་(Omar Abdullah)་ལགས་སུ་འོས་བསྡུའི་རྒྱལ་ཁ་ཐོབ་པར་འཚམས་འཕྲིན་བསྩལ་འདུག

འདི་ཚེས་༡༦ཉིན་བོད་མིའི་དབུ་ཁྲིད་སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་གིས། སྐུ་ཞབས་(Omar Abdullah)་ལགས་ཀྱིས་དབུ་ཁྲིད་པའི་ཆབ་སྲིད་ཚོགས་པར་རྒྱ་གར་གྱི་ཇམ་མུ་དང་ཀཱཤ་མིར་(Jammu & Kashmir)་མངའ་ཁུལ་ནང་འོས་བསྡུའི་རྒྱལ་ཁ་ཐོབ་ཡོད་པ་དང་། ཁོང་ཇམ་མུ་དང་ཀཱཤ་མིར་མངའ་སྡེའི་སྤྱི་ཁྱབ་བློན་ཆེན་དུ་འོས་འདེམས་བྱུང་བར་འཚམས་འཕྲིན་བསྩལ་གནང་འདུག
འཚམས་འཕྲིན་ནང་། ༧གོང་ས་མཆོག་གིས་ངོས་རང་ཁྱེད་ཚོའི་མི་རབས་གསུམ་དང་ངོ་ཤེས་ཆགས་པ་དེ་ནི་སྤོབས་པ་ཆེན་པོ་ཞིག་ཡིན་ལ་ཁྱེད་ཀྱི་སྤོ་ལགས་ཏེ་སྐུ་ཞབས་(Sheikh Abdullah)་ནས་ཁྱེད་རང་བར་མི་རབས་གསུམ་དང་འབྲེལ་འདྲིས་བཟང་པོ་བྱུང་ཡོད་ལ་ང་རང་གིས་ང་ཚོའི་བར་གྱི་མཛའ་བརྩེ་དེ་རྩ་ཆེན་པོ་ཞིག་ཏུ་བརྩི་བཞིན་ཡོད། ཅེས་དང་། ད་དུང་༧གོང་ས་མཆོག་གི་འཚམས་འཕྲིན་ནང་། ངོས་རང་གིས་ཁྱེད་ཀྱིས་མ་འོངས་ལས་དོན་ཐད་ལ་དཀའ་ངལ་ཅི་འདྲ་ཞིག་འཕྲད་པ་ཡིན་ན་ཡང༌། དེ་ལ་གདོང་ལེན་བྱས་ནས་བྱ་བ་ལེགས་འགྲུབ་ཡོང་བ་མ་ཟད། གོ་སྐབས་བཟང་པོ་དམ་འཛིན་བྱས་ནས་ཇམ་མུ་དང་ཀཱཤ་མིར་ས་ཁུལ་གྱི་མི་དམངས་ཚོའི་རེ་འདུན་ལམ་ལྷོང་ཡོང་བའི་སྨོན་ལམ་ཡོད་ཅེས་འཚམས་འཕྲིན་ནང་བཀོད་གནང་འདུག

གསར་འགོད་པ། སྐལ་བཟང་སྒྲོལ་མ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།