ཚེས་བཅུ་གཉིས་ཉིན་བོད་རང་སྐྱོང་ལྗོངས་ཟེར་བ་ཁྱོན་ཡོངས་སུ་ཏོག་དབྱིབས་རིམས་ནད་འགོས་བའི་ནད་པ་མི་གྲངས་༩༡ཐོན་འདུག

བོད་ནང་ཏོག་དབྱིབས་རིམས་ནད་འགོས་ཁྱབ་བྱུང་བའི་གྲངས་ཐོ། ༢༠༢༢།༠༩།༡༢ཉིན་རྒྱབ་བར།

བོད་ནང་ཏོག་དབྱིབས་རིམས་ནད་འགོས་ཁྱབ་བྱུང་བའི་གྲངས་ཐོ། ༢༠༢༢།༠༩།༡༡ཉིན།

འདི་ཚེས་༡༢ཉིན་བོད་རང་སྐྱོང་ལྗོངས་ཟེར་བ་ཁྱོན་ཡོངས་སུ་ཏོག་དབྱིབས་རིམས་ནད་འགོས་ཁྱབ་བྱུང་བ་མི་གྲངས་༩༡འཕར་ནས་ད་བར་བསྡོམས་འབོར་མི་གྲངས་༡༥༩༠༡ཟིན་འདུག་ལ་མང་པོ་ཞིག་སྨན་ཁང་ནས་ཐོན་ཡོད་འདུག
རྒྱ་ནག་གིས་འབོད་པའི་བོད་རང་སྐྱོང་ལྗོངས་ཟེར་བ་གཙོས་བོད་ཀྱི་ས་ཁུལ་གང་སར་ཏོག་དབྱིབས་ནད་ཡམས་འགོས་ཁྱབ་ཀྱི་གྲངས་འབོར་མུ་མཐུད་དུ་འཕར་བཞིན་པ་དང་། འདི་ཚེས་༡༢ཉིན་གྱི་ཉིན་རྒྱབ་བར། བོད་རང་སྐྱོང་ལྗོངས་ཟེར་བའི་ནང་ཏོག་དབྱིབས་ནད་ཡམས་འགོས་ཡོད་པ་ནད་རྟགས་ཅན་ཐོན་མེད་ན་ཡང་། ནད་རྟགས་མི་མངོན་པའི་ནད་པ་༩༡མང་དུ་ཕྱིན་པའི་ཁྲོད་ནས། ལྷ་ས་གྲོང་ཁྱེར་དུ་༦༥དང་། གཞིས་ཀ་རྩེ་གྲོང་ཁྱེར་དུ་༡༧། ནག་ཆུ་གྲོང་ཁྱེར་དུ་༩བཅས་ཐོན་ཡོད་འདུག གཞན་དེའི་སྔར་ཉིན་སྤྱི་ཚེས་༡༡ཉིན་གྱི་ཆུ་ཚོད་ཉེར་བཞིའི་རིང་། བོད་རང་སྐྱོང་ལྗོངས་ཟེར་བ་ཡོངས་སུ་ཏོག་དབྱིབས་ནད་ཡམས་ཕོག་པ་ནད་རྟགས་ཅན་༡༠མང་དུ་ཕྱིན་ཡོད་པ་དང་། ནད་རྟགས་མེད་པའི་ནད་པ་༢༡༦མང་དུ་ཕྱིན་ཡོད་པ་ནས་མང་པོ་ཞིག་ལོགས་བཀར་ལྟ་སྡོམ་ཁུལ་ནས་ཤེས་རྟོགས་བྱུང་བ། བོད་རང་སྐྱོང་ལྗོངས་ཟེར་བའི་ཏོག་གསར་གློ་ཚད་རིམས་ནད་འགོག་ཟོན་བྱེད་པའི་གསར་འགྱུར་ཡོངས་བསྒྲགས་ཚོགས་འདུ་ཐེངས་སོ་ལྔ་པའི་ཐོག་བསྒྲགས་འདུག་པ་ལྟར། ནད་ཡམས་འགོས་ཁྱབ་བྱུང་བ་ནས་བསྡོམས་རྩིས་བྱས་ན་འདི་ཚེས་༡༢ཉིན་གྱི་ཉིན་རྒྱབ་ཆུ་ཚོད་གཉིས་བ་བར་བོད་རང་སྐྱོང་ལྗོངས་ཟེར་བའི་ནང་ཁྱོན་ཡོངས་སུ་ཏོག་དབྱིབས་རིམས་ནད་འགོས་ཁྱབ་བྱུང་བ་མི་གྲངས་༡༥༩༠༡ཟིན་འདུག་ལ། དེའི་ཁྲོད་ནས་མང་པོ་ཞིག་དྲག་སྐྱེད་བྱུང་ནས་ས་ཁུལ་འདྲ་མིན་གྱི་ལོགས་བཀར་སྨན་ཁང་ནས་ཐོན་དང་ཐོན་བཞིན་པ་ཡང་བསྒྲགས་འདུག
ནད་ཡམས་ཁྱབ་གདལ་གྱི་གནས་སྟངས་ལྟར། འདི་ཚེས་༡༢ཉིན་བོད་རང་སྐྱོང་ལྗོངས་ཟེར་བའི་ནང་ནད་ཡམས་ཁྱབ་གདལ་གྱི་ཉེན་ཁ་ཆེ་ཁུལ་ས་གནས་༡༦༠དང་། ཉེན་ཁ་འབྲིང་ཁུལ་༢༠༧ཡོད་པ་བསྒྲགས་འདུག་ལ། ནད་པ་དང་ཕྱོགས་འདྲ་མིན་ནས་འབྲེལ་འདྲིས་བྱུང་བ་མང་པོ་མུ་མཐུད་དུ་གཅིག་བསྡུས་ཐོག་ལོགས་སུ་བཀར་ནས་ལྟ་ཞིབ་བྱེད་བཞིན་ཡོད་འདུག
དེ་ལྟར་དེང་སང་རྒྱ་ནག་སྤྱི་དང་བྱེ་བྲག་བོད་རང་སྐྱོང་ལྗོངས་ཟེར་བས་མཚོན་བོད་ཀྱི་ས་ཁུལ་ཁག་ཏུ་(Covid-19)་ཏོག་དབྱིབས་རིམས་ནད་དང་རྣམ་པ་འགྱུར་བའི་ཏོག་དབྱིབས་རིམས་ནད་འགོས་ཁྱབ་ཤུགས་ཆེར་འགྲོ་བཞིན་པ་དང་བསྟུན། ས་གནས་གང་སར་ཕྱོགས་འདྲ་མིན་ནས་དམ་དྲག་དང་བཀག་སྡོམ་བྱས་ཡོད་རྐྱེན། ཁ་གསལ་ཡོད་མིན་ལ་མ་བལྟོས་བར་རྒྱ་ནག་གཞུང་འབྲེལ་གྱི་གྲངས་ཐོ་བཏོན་པ་ཙམ་ལས། དོན་དངོས་བོད་ཀྱི་ས་ཁུལ་སྤྱི་ཡོངས་སུ་ཏོག་དབྱིབས་རིམས་ནད་འགོས་པའི་གྲངས་འབོར་དང་དངོས་ཡོད་གནས་སྟངས་གསལ་བོ་རག་ཁག་པོ་ཡོད་པ་རེད།
གཞན་ཉེ་ལམ་དཀར་མཛེས་ཕྱོགས་སུ་ས་ཡོམ་རྒྱབ་པའི་ཐད། པེ་ཅིང་ནས་རོའུ་ཊར་གསར་ལས་ཁང་གིས་གནས་ཚུལ་སྤེལ་བའི་ནང་། ལྕགས་ཟམ་རྫོང་དང་དར་རྩེ་མདོར་འགུལ་ཚད་རིམ་པ་དྲུག་དང་གྲངས་ཆུང་བརྒྱད་བརྒྱབ་པའི་ས་འགུལ་ཁྲོད་ད་བར་མིའི་ཚེ་སྲོག་ཤོར་བའི་གྲངས་འབོར་༩༣བར་འཕར་ཡོད་འདུག འི་ས་ཡོམ་ཁྲོད་རྐྱེན་འདས་སུ་སོང་བ་ཁྱོན་མི་གྲངས་ ༨༢ ཟིན་ཡོད་པ་དང་། ས་འགུལ་རྗེས་གར་སོང་ཆ་མེད་དུ་གྱུར་པའི་ཁོངས་ནས་མི་གྲངས་༢༥འདི་ཚེས་༡༡རེས་གཟའ་ཉི་མའི་ཉིན་བརྙེད་སོན་བྱུང་བ་རྒྱ་ནག་གཞུང་འབྲེལ་གསར་ཁང་(CCTV)་གིས་གནས་ཚུལ་སྤེལ་ཡོད་པ་དང་། ས་འགུལ་གྱི་གནོད་ཐེབས་ས་ཁུལ་གྱི་ཡུལ་མི་མང་པོ་ཞིག་འཕྲལ་སེལ་སྡོད་གུར་ནང་གནས་སྤོར་བྱེད་བཞིན་པ་དང་། ཐེངས་འདིའི་ས་ཡོམ་གྱིས་ཁྲིན་ཏུའུ་གྲོང་ཁྱེར་ནང་ལའང་གནོད་སྐྱོན་ཕོག་ཡོད་འདུག
ཁྲིན་ཏུའུ་གྲོང་ཁྱེར་ནང་རེས་གཟའ་ཟླ་བའི་ཉིན་ཏོག་དབྱིབས་རིམས་ནད་འགོས་བའི་ནད་པ་༡༤༣ཐོན་ཡོད་པ་དང་། དེའི་ནང་ནས་ཕྱེད་ལ་ལྷག་ཙམ་ནི་ནད་རྟགས་མེད་པའི་ནད་པ་ཡིན་འདུག

གསར་འགོད་པ། ཚེ་དབང་དངོས་གྲུབ། ཀླུ་འབུམ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲ་ཐོག་སྤེལ་མཁན། ཀླུ་འབུམ།