ཚེས་དྲུག་ཉིན་བོད་རང་སྐྱོང་ལྗོངས་ཟེར་བ་ཁྱོན་ཡོངས་སུ་ཏོག་དབྱིབས་རིམས་ནད་འགོས་བའི་ནད་པ་མི་གྲངས་༢༦༠བྱུང་འདུག

བོད་ནང་ཏོག་དབྱིབས་རིམས་ནད་འགོས་ཁྱབ་བྱུང་བའི་གྲངས་ཐོ། ༢༠༢༢།༠༩།༦ཉིན་རྒྱབ་བར།

བོད་ནང་ཏོག་དབྱིབས་རིམས་ནད་འགོས་ཁྱབ་བྱུང་བའི་གྲངས་ཐོ། ༢༠༢༢།༠༩།༥ཉིན།

འདི་ཚེས་༦ཉིན་བོད་རང་སྐྱོང་ལྗོངས་ཟེར་བ་ཁྱོན་ཡོངས་སུ་ཏོག་དབྱིབས་རིམས་ནད་འགོས་ཁྱབ་བྱུང་བ་མི་གྲངས་༢༦༠འཕར་ནས་ད་བར་བསྡོམས་འབོར་མི་གྲངས་༡༤༠༡༧ཟིན་འདུག་ལ་མང་པོ་ཞིག་སྨན་ཁང་ནས་ཐོན་འདུག
རྒྱ་ནག་གིས་འབོད་པའི་བོད་རང་སྐྱོང་ལྗོངས་ཟེར་བ་གཙོས་བོད་ཀྱི་ས་ཁུལ་གང་སར་ཏོག་དབྱིབས་ནད་ཡམས་འགོས་ཁྱབ་ཀྱི་གྲངས་འབོར་མུ་མཐུད་དུ་འཕར་བཞིན་པ་དང་། འདི་ཚེས་༦ཉིན་གྱི་ཉིན་རྒྱབ་བར། བོད་རང་སྐྱོང་ལྗོངས་ཟེར་བའི་ནང་ཏོག་དབྱིབས་ནད་ཡམས་འགོས་ཡོད་པ་ནད་རྟགས་ཅན་༣༢མང་དུ་ཕྱིན་པའི་ཁྲོད་ནས་ལྷ་ས་གྲོང་ཁྱེར་དུ་༧དང་། གཞིས་ཀ་རྩེ་གྲོང་ཁྱེར་དུ་༡། ཆབ་མདོ་གྲོང་ཁྱེར་དུ་༢༡། ནག་ཆུ་གྲོང་ཁྱེར་དུ་༣བཅས་ཐོན་ཡོད་པ་དང་། ནད་རྟགས་མི་མངོན་པའི་ནད་པ་༢༢༨མང་དུ་ཕྱིན་པའི་ཁྲོད་ནས། ལྷ་ས་གྲོང་ཁྱེར་དུ་༡༤༧དང་། གཞིས་ཀ་རྩེ་གྲོང་ཁྱེར་དུ་༤༡། ལྷོ་ཁ་གྲོང་ཁྱེར་དུ་༦། ཆབ་མདོ་གྲོང་ཁྱེར་དུ་༦། ནག་ཆུ་གྲོང་ཁྱེར་དུ་༡༦། མངའ་རིས་ས་ཁུལ་དུ་༡༢བཅས་ཐོན་འདུག གཞན་དེའི་སྔར་ཉིན་སྤྱི་ཚེས་༥ཉིན་གྱི་ཆུ་ཚོད་ཉེར་བཞིའི་རིང་། བོད་རང་སྐྱོང་ལྗོངས་ཟེར་བ་ཡོངས་སུ་ཏོག་དབྱིབས་ནད་ཡམས་ཕོག་པ་ནད་རྟགས་ཅན་༥༢མང་དུ་ཕྱིན་ཡོད་པ་དང་། ནད་རྟགས་མེད་པའི་ནད་པ་༤༥༣མང་དུ་ཕྱིན་ཡོད་པ་ནས་མང་པོ་ཞིག་ལོགས་བཀར་ལྟ་སྡོམ་ཁུལ་ནས་ཤེས་རྟོགས་བྱུང་བ། བོད་རང་སྐྱོང་ལྗོངས་ཟེར་བའི་ཏོག་གསར་གློ་ཚད་རིམས་ནད་འགོག་ཟོན་བྱེད་པའི་གསར་འགྱུར་ཡོངས་བསྒྲགས་ཚོགས་འདུ་ཐེངས་ཉེར་དགུ་པའི་ཐོག་བསྒྲགས་འདུག་པ་ལྟར། ཁྱོན་བསྡོམས་འདི་ཚེས་༦ཉིན་གྱི་ཉིན་རྒྱབ་ཆུ་ཚོད་གཉིས་བ་བར་བོད་རང་སྐྱོང་ལྗོངས་ནང་ཁྱོན་ཡོངས་སུ་ཏོག་དབྱིབས་རིམས་ནད་འགོས་ཁྱབ་བྱུང་བ་མི་གྲངས་༡༤༠༡༧ཟིན་འདུག་ལ། དེའི་ཁྲོད་ནས་མང་པོ་ཞིག་དྲག་སྐྱེད་བྱུང་ནས་ས་ཁུལ་འདྲ་མིན་གྱི་ལོགས་བཀར་སྨན་ཁང་ནས་ཐོན་དང་ཐོན་བཞིན་པ་ཡང་བསྒྲགས་འདུག
ནད་ཡམས་ཁྱབ་གདལ་གྱི་གནས་སྟངས་ལྟར། འདི་ཚེས་༦ཉིན་བོད་རང་སྐྱོང་ལྗོངས་ཟེར་བའི་ནང་ནད་ཡམས་ཁྱབ་གདལ་གྱི་ཉེན་ཁ་ཆེ་ཁུལ་ས་གནས་༤༤༤དང་། ཉེན་ཁ་འབྲིང་ཁུལ་༢༣༨ཡོད་པ་བསྒྲགས་འདུག་ལ། ནད་པ་དང་ཕྱོགས་འདྲ་མིན་ནས་འབྲེལ་འདྲིས་བྱུང་བ་ཁྲི་ཚོ་བརྒལ་བ་ད་དུང་གཅིག་བསྡུས་ཐོག་ལོགས་སུ་བཀར་ནས་ལྟ་ཞིབ་བྱེད་བཞིན་ཡོད་འདུག
དེང་སང་རྒྱ་ནག་སྤྱི་དང་བྱེ་བྲག་བོད་རང་སྐྱོང་ལྗོངས་ཟེར་བས་མཚོན་བོད་ཀྱི་ས་ཁུལ་ཁག་ཏུ་(Covid-19)་ཏོག་དབྱིབས་རིམས་ནད་དང་རྣམ་པ་འགྱུར་བའི་ཏོག་དབྱིབས་རིམས་ནད་འགོས་ཁྱབ་ཤུགས་ཆེར་འགྲོ་བཞིན་པ་ཡིན་ནའང་། ས་གནས་གང་སར་དམ་དྲག་དང་རྒྱ་ནག་གཞུང་གི་འབྲེལ་ཡོད་འཕྲོད་བསྟེན་སྡེ་ཁག་སོགས་གཞུང་འབྲེལ་བརྒྱུད་ལམ་ཁག་ནང་དུས་ཐོག་གྲངས་ཐོ་ཁ་གསལ་མ་བཏོན་པ་སོགས་ཀྱི་རྐྱེན་བོད་ཀྱི་ས་ཁུལ་སྤྱི་ཡོངས་སུ་ཏོག་དབྱིབས་རིམས་ནད་འགོས་པའི་གྲངས་འབོར་ཚོད་ཁ་གསལ་རག་རྒྱུ་ཁག་པོ་ཡོད་པ་དང་། དམ་དྲག་དང་བཀག་སྡོམ་གྱི་གནས་སྟངས་འོག་ས་གནས་མི་མང་གི་ཉིན་རེའི་འཚོ་བ་དང་བཟའ་ཆས་ཐད་དཀའ་ངལ་འཕྲད་བཞིན་པ་མང་པོ་ཡོད་པ་དང་། ཏོག་དབྱིབས་རིམས་ནད་འགོས་ཡོད་པ་རྣམས་ཟུར་བཀག་ཁང་དུ་ཁྲིད་ཀྱི་ཡོད་ནའང་། ཁང་པ་ཆེན་པོ་རེའི་ནང་ནད་པ་ཚོ་མཉམ་དུ་བཅུག་པ་ལས་སྨན་བཅོས་ལྟ་རྟོག་བྱེད་མཁན་མེད་པ་སོགས་དངོས་ཡོད་གནས་སྟངས་རྒྱ་ནག་གཞུང་གི་དྲིལ་བསྒྲགས་དང་ལྡོག་ཟླ་ཡིན་པ་རྒྱལ་སྤྱིའི་བོད་དོན་ལས་འགུལ་ཁང་གིས་ཤེས་རྟོགས་བྱུང་བ་གསལ་བཏོན་གནང་ཡོད་པ་རེད།

གསར་འགོད་པ། ཀླུ་འབུམ།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།