བོད་རང་སྐྱོང་ལྗོངས་ཟེར་བ་ཁྱོན་ཡོངས་སུ་ཏོག་དབྱིབས་རིམས་ནད་འགོས་ཁྱབ་བྱུང་བ་མི་གྲངས་༡༧༠འཕར་འདུག

བོད་ཀྱི་ས་ཁུལ་གང་སར་ཏོག་དབྱིབས་ནད་ཡམས་འགོས་ཁྱབ་ཀྱི་གྲངས་འབོར་མུ་མཐུད་དུ་འཕར་བཞིན་པ་དང་། འདི་ཚེས་༢༤ཉིན་གྱི་ཉིན་རྒྱབ་བར། བོད་རང་སྐྱོང་ལྗོངས་ཟེར་ནང་ཏོག་དབྱིབས་ནད་ཡམས་འགོས་ཡོད་པ་གཏན་འཁེལ་ནད་པ་༡༢མང་དུ་ཕྱིན་པ་ནས་ཉིང་ཁྲི་གྲོང་ཁྱེར་དུ་༨དང་། ནག་ཆུ་གྲོང་ཁྱེར་དུ་༣། མངའ་རིས་ས་ཁུལ་དུ་༡ཡོད་ཅིང་། ནད་རྟགས་མི་མངོན་པའི་ནད་པ་༡༥༨མང་དུ་ཕྱིན་ཡོད་པ་ནས། ལྷ་ས་གྲོང་ཁྱེར་དུ་༣༥དང་། གཞིས་ཀ་རྩེ་གྲོང་ཁྱེར་དུ་༥༡། ལྷོ་ཁ་གྲོང་ཁྱེར་དུ་༢༢། ཉིང་ཁྲི་གྲོང་ཁྱེར་དུ་༤། ཆབ་མདོ་གྲོང་ཁྱེར་དུ་༥། ནག་ཆུ་གྲོང་ཁྱེར་དུ་༢༢། མངའ་རིས་ས་ཁུལ་དུ་༡༨ཡོད་བཅས་ཐོན་འདུག གཞན་སྤྱི་ཚེས་༢༣ཉིན་གྱི་ཆུ་ཚོད་ཉེར་བཞིའི་རིང་། བོད་རང་སྐྱོང་ལྗོངས་ཟེར་བ་ཡོངས་སུ་ཏོག་དབྱིབས་ནད་ཡམས་ཕོག་པའི་གཏན་འཁེལ་ནད་པ་༢༣མང་དུ་ཕྱིན་ཡོད་པ་དང་། ནད་རྟགས་མེད་པའི་ནད་པ་༥༤༣མང་དུ་ཕྱིན་ཡོད་པ་བོད་རང་སྐྱོང་ལྗོངས་ཟེར་བའི་ཏོག་གསར་གློ་ཚད་རིམས་ནད་འགོག་ཟོན་བྱེད་པའི་གསར་འགྱུར་ཡོངས་བསྒྲགས་ཚོགས་འདུ་ཐེངས་བཅུ་དྲུག་པའི་ཐོག་བསྒྲགས་འདུག་པ་བསྡོམས་ན། འདི་ཚེས་༢༤བར་བོད་རང་སྐྱོང་ལྗོངས་ནང་ཁྱོན་ཡོངས་སུ་ཏོག་དབྱིབས་རིམས་ནད་འགོས་ཁྱབ་བྱུང་བ་མི་གྲངས་༦༤༡༧ཟིན་འདུག་ལ་དེའི་ཁྲོད་ནས་མང་པོ་ཞིག་དྲག་སྐྱེད་བྱུང་ནས་སྨན་ཁང་ནས་ཐོན་དང་ཐོན་བཞིན་པ་ཡང་བསྒྲགས་འདུག
གནས་སྟངས་དེའི་འོག་ནད་ཡམས་ཁྱབ་གདལ་གྱི་གནས་སྟངས་ལྟར་འདི་ཚེས་༢༤ཉིན་བོད་རང་སྐྱོང་ལྗོངས་ཟེར་བའི་ནང་ཉེན་ཁ་ཆེ་ཁུལ་ས་གནས་༥༤༣དང་། ཉེན་ཁ་འབྲིང་ཁུལ་༢༨༠ཡོད་པ་བསྒྲགས་འདུག་ལ་ནད་པ་དང་ཕྱོགས་འདྲ་མིན་ནས་འབྲེལ་འདྲིས་བྱུང་བ་ད་ལྟ་མི་༤༧༦༢༢གཅིག་བསྡུས་ཐོག་ལོགས་སུ་བཀར་ནས་ལྟ་ཞིབ་བྱེད་བཞིན་ཡོད་འདུག
གཞན་བོད་ཀྱི་ས་ཁུལ་ཡུལ་ཤུལ་དང་། རྨ་ལྷོ་བཅས་ས་ཁུལ་གཞན་དུ་ཡང་ཏོག་དབྱིབས་ནད་ཡམས་འགོས་ཁྱབ་འགྲོ་བཞིན་པས་ས་གནས་སུ་རྒྱ་ནག་གི་འབྲེལ་ཡོད་ཚན་པས་ཡུལ་མི་ཚོའི་འགྲོ་འོང་དང་འདུ་འཛོམས་སོགས་ལ་ཚོད་འཛིན་དང་སྟངས་འཛིན་བྱེད་བཞིན་ཡོད་པ་རེད།

གསར་འགོད་པ། ཀླུ་འབུམ།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།