ཡུ་གུར་མི་རིགས་ཀྱི་དབུ་ཁྲིད་སྐོར་གློག་བརྙན་སྟོན་རྒྱུར་འགོག་རྐྱེན།

༄༅༎ཨོ་སོ་ཀྲོ་ལི་ཡའི་ནང་ཡུ་གུར་མི་རིགས་ཀྱི་དབུ་འཁྲིད་རེ་བི་ཡ་ཀ་རྡིར་གྱི་ལོ་རྒྱུས་བཀོད་པའི་གློག་བརྙན་བཏོན་རྒྱུར་རྒྱ་ནག་ཕྱོགས་ནས་འགོག་རྐྱེན་བཟོ་རྩིས་བྱས་ཡོད་འདུག

དེ་ཡང་ཨོ་སོ་ཀྲོ་ལི་ཡའི་ནང་འདི་ཚེས་ཉི་ཤུ་བཞི་ཉིན་ནས་བཟུང་བདུན་ཕྲག་གཉིས་ཙམ་རིང་རྒྱལ་སྤྱིའི་གློག་བརྙན་གྱི་དུས་སྟོན་ཞིག་ཚུགས་ཀྱི་ཡོད་པ་དང་དེའི་ནང་སྐུ་ཞབས་དྲེ་ནི་ཡིལ་ནས་བཟོ་བཀཀོད་གནང་བའི་གློག་བརྙན་དེའི་ནང་ཡུ་གུར་མི་རིགས་ཀྱི་དབུ་འཁྲིད་ལྕམ་རེ་བི་ཡ་ཀ་རྡིར་མཆོག་གི་སྐུ་ཚེ་དང་འབྲེལ་ཡོད་དངོས་བྱུང་གི་ལོ་རྒྱུས་བཀོད་པའི་གློག་བརྙན་ཞིག་ཡིན་འདུག

གོང་ཞུས་གློག་བརྙན་དེ་བཏོན་རྒྱུར་རྒྱ་ནག་གཞུང་ནས་འགོག་རྐྱེན་བཟོ་རྩིས་བྱས་ཡོད་འདུག དེ་ཡང་གློག་བརྙན་འཇུས་བཀོད་པའི་གྲས་སྐུ་ཞབས་མུ་རིས་མེལ་སྦོན་ནང་ཡོད་པའི་རྒྱ་ནག་གཞུང་ཚབ་ཀྱི་ལས་ཁུངས་ཀྱི་ལས་བྱེད་བུད་མེད་ཆན་ཞེས་པས་ཁ་པར་བཏང་ནས་གོང་དུ་ཞུས་པའི་གློག་བརྙན་དེ་བཞིན་དུས་སྟོན་དེའི་ཐོག་བཏོན་རྒྱུ་ཕྱིར་འཐེན་བྱེད་དགོས་པའི་འབོད་སྐུལ་ཞུ་གི་ཡོད་ཅེས་བཤད་བྱུང་ཞེས་འགྲེལ་བརྗོད་གནང་འདུག འོན་ཀྱང་གློག་བརྙན་བཟོ་མཁན་སྐུ་ཞབས་དྲེ་ནི་ཡལ་ནས་རྒྱ་ནག་གཞུང་ནས་གློག་བརྙན་ཕྱིར་འཐེན་བྱེད་རྒྱུར་འགོག་རྐྱེན་སྤྲད་རྩིས་བྱས་ནས་ཡུ་གུར་མི་རིགས་ཀྱི་དཀའ་རྙོག་སེལ་རྒྱུའི་ཚབ་ཏུ་གཡོལ་ཐབས་བྱེད་པའི་སྲིད་བྱུས་དེ་ནི་ནོར་འཁྲུལ་ཅན་ཞིག་རེད་ཅེས་གསུངས་འདུག་ལ་ཁོང་ནས་རྒྱ་ནག་གཞུང་ཚབ་མང་པོར་ཡུ་གུར་མི་རིགས་ཀྱི་དཀའ་རྙོག་དང་ལྷག་པར་དུ་ལྕམ་རེ་བི་ཡ་ཀ་རྡིར་གྱི་སྐོར་སྐད་ཆ་ཤོད་རྩིས་བྱས་པའི་སྐབས་ཡ་ལན་ཡག་པོ་ཞིག་སྤྲད་ཀྱི་མི་འདུག་ཅེས་སྔོན་ཚུད་ནས་འདིའི་སྐོར་རྒྱ་ནག་གཞུང་དང་འབྲེལ་བ་གནང་ཡོད་པའི་སྐོར་འགྲེལ་བརྗོད་གནང་འདུག།