ཨཕ་ག་ནིསྟན་ནང་ཨིན་ཇིའི་དམག་མི་གཅིག་རྐྱེན་ལམ་དུ་བཏང་བ།

༄༅༎ཨིན་ཡུལ་གྱི་གོར་ཁའམ་བལ་ཡུལ་གྱི་མི་རིགས་ཀྱི་དམག་མི་གཅིག་ཨཕ་ག་ནིསྟན་གྱི་ཧེལ་མན་ཞིང་ཆེན་གྱི་ན་ཧར་ཨི་ས་ར་ཇེ་ཞེས་པའི་ས་ཁུལ་ནང་གྱེན་ལོག་ཤོག་ཁག་དང་འཐབ་རྩོད་སྐབས་རྐྱེན་ལམ་དུ་ཕྱིན་ཡོད་ལུགས་ཨེ་ཨེཕ་པི་གསར་ལས་ཁང་གིས་གནས་ཚུལ་སྤེལ་འདུག  ཕྱི་ལོ་༢༠༠༡ལོར་རྒྱལ་སྤྱིའི་དཔུང་དམག་ཨཕ་ག་ནིསྟན་དཔུང་འཇུག་འགོ་བཙུགས་པ་བཟུང་ད་བར་ཨིན་ཇིའི་དམག་མི་༣༨༣གྱི་ཚེ་སྲོག་ཤོར་ཡོད་པ་ནས་༣༣༨གོ་མཚོན་ལག་ཆའི་འོག་རྐྱེན་ལམ་དུ་ཕྱིན་ཡོད་འདུག། ལོ་འདིའི་ནང་གོང་ཞུས་མིང་འདོན་མེད་པའི་དམག་མི་གཙོས་པའི་ཨིན་ཇིའི་དམག་ཞབས་པ་༣༥རྐྱེན་ལམ་དུ་ཕྱིན་ཡོད་འདུག། ཨཕ་ག་ནིསྟན་ནང་ཨིན་ཇིའི་དཔུང་དམག་དགུ་སྟོང་ལྔ་བརྒྱ་ཐམ་པ་ཡོད་པ་དེ་ནི་ནེ་ཊོ་སྤྱི་ཆིངས་སྒྲིག་འཛུགས་ཀྱི་སྣེ་ཁྲིད་པའི་དཔུང་དམག་མང་ཤོས་གཉིས་པ་དེ་ཡིན་པ་དང་ མང་ཆེ་བ་གྱེན་ལོག་པ་ཏ་ལི་བྭན་གྱི་ལྟེ་གནས་ཧེལ་མན་ཞིང་ཆེན་ནང་རྟེན་གཞི་བྱས་ཡོད་རེད། འཛམ་གླིང་དམག་ཆེན་དང་པོ་དང་གཉིས་པའི་ནང་གྲགས་ཆེ་བའི་གོར་ཁའི་དམག་མི་འབུམ་གཉིས་ཙམ་ཨིན་ཇིའི་དམག་ཞབས་ཞུས་ཡོད་པ་ནས་བཞི་ཁྲི་ལྔ་སྟོང་ལྷག་དམག་ཤར་རྐྱེན་ལམ་ཕྱིན་ཡོད་རེད༎