འབྲུག་ཡུལ་གྱི་རྒྱལ་པོའི་འཁྲུངས་སའི་རྟེན་འབྲེལ།

༄༅༎དགུང་གྲངས་ ༣༡ ལ་ཕེབས་པ་ དབྱིན་ཇིའི་སྙན་གྲགས་ཅན་གྱི་ཨོཀ་སི་ཕོདྲ་མཐོ་རིམ་གཙུག་ལག་སློབ་གྲྭའི་སློབ་ཐོན་པ་འབྲུག་གི་རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་ནས་ དགུང་གྲངས་ ༢༡ ཡིན་པ་རྗེ་བཙུན་པདྨ་མཆོག་དང་གཟའ་ཕུར་བུའི་ཉིན་འཇིག་རྟེན་གཉེན་སྒྲིག་གི་རྟེན་འབྲེལ་གནང་སྟེ་ རྒྱལ་པོའི་ཁབ་ཏུ་བཞེས་རྒྱུ་ཡིན་འདུག།
འབྲུག་གི་རྒྱལ་པོའི་འཇིག་རྟེན་གཉེན་སྒྲིག་ཀྱི་རྟེན་འབྲེལ་མཛད་སྒོ་དེ་ འབྲུག་གི་རྒྱལ་ས་རྙིང་པ་ པུ་ན་ཀ་ཞེས་པའི་ས་གནས་སུ་ཡོད་པའི་དུས་རབས་བཅུ་བདུན་ནང་བཞེངས་པའི་མཁར་གཟི་བརྗིད་ལྡན་པ་ཞིག་ཡོད་པ་དེའི་ནང་གནང་རྒྱུ་ཡིན་འདུག་ཅིང་ དེ་བཞིན་རྒྱལ་ས་ཐིམ་པུའི་རྩེད་ཐང་ཞིག་གི་ནང་གཟའ་ཕུར་བུའི་ཉིན་མི་དམངས་ཁྱོན་ཆེ་ཞིག་འདུ་འཛོམས་བྱེད་རྒྱུ་ཡིན་འདུག།
འབྲུག་གི་རྒྱལ་པོའི་གཉེན་སྒྲིག་རྟེན་འབྲེལ་གྱི་གནས་ཚུལ་ཐད་མང་ཚོགས་ནས་དགའ་སྤོབས་བྱེད་འོས་པའི་དུས་ཚིགས་ཁྱད་པར་ཅན་ཞིག་ཏུ་ངང་སྒུག་ཤུགས་ཆེ་བྱེད་བཞིན་པའི་དུས་འདིར་ སྟབས་མ་ལེགས་པའི་གནས་ཚུལ་ཞིག་ཀྱང་བྱུང་ཡོད་པ་དེ་ནི་ འབྲུག་ཡུལ་ལ་ངོ་རྒོལ་བྱེད་མཁན་གྱི་སྒྲིག་འཛུགས་བལ་ཡུལ་ནང་རྟེན་གཞི་བྱེད་པའི་ འབྲུག་གི་གསར་བརྗེ་མདུན་བསྐྱོད་ཆིག་སྒྲིལ་ཚོགས་པ་ཟེར་བ་དེས་འབར་རྫས་ཁག་གཉིས་གས་གཏོར་བྱས་ཏེ་ མི་བཞི་ཙམ་ལ་རྨས་སྐྱོན་བཏང་པའི་དོན་རྐྱེན་དེ་ཡིན་པ་རེད།
འབྲུག་རྒྱལ་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་ནི་ འབྲུག་གི་རྒྱལ་ཐོག་ལྔ་པ་དེ་ཡིན་ཞིང་ ཁོང་གི་འཇིག་རྟེན་གཉེན་སྒྲིག་གི་རྟེན་འབྲེལ་མཛད་སྒོ་དེ་འབྲུག་ཡུལ་གྱི་རིག་གཞུང་དང་མཐུན་ལ་ ཧ་ཅང་གྲ་རྒྱས་མིན་པའི་ཐོག་ནས་གནང་རྒྱུ་ཡིན་འདུག་ལ་ རྒྱལ་ཁབ་གཞན་གྱི་རྒྱལ་པོ་དང་རྒྱལ་མོའམ་ གཞུང་གི་འགོ་འཁྲིད་སུ་ཡང་གདན་འདྲེན་ཞུས་མེད་པ་རེད་འདུག།
ཕྱི་ལོ་ ༢༠༠༦ ལོར་གཏན་འབེབས་བྱས་པའི་འབྲུག་ཡུལ་གྱི་རྩ་ཁྲིམས་གཞིར་བཟུང་ལྟར་ན་ འབྲུག་གི་རྒྱལ་པོས་བཙུན་མོ་གཅིག་ལས་་ཁབ་ཏུ་བཞེས་ཆོག་རྒྱུ་མིན་ཞིང་ ད་ལྟའི་འབྲུག་རྒྱལ་གྱི་ཡབ་འཇིགས་མེད་སེངྒེ་དབང་ཕྱུག་མཆོག་ནས་བཙུན་མོ་བཞི་ཁབ་ཏུ་བཞེས་ཡོད་པ་རེད།
འབྲུག་གི་མ་འོངས་པའི་བཙུན་མོ་རྗེ་བཙུན་པདྨ་ལགས་ནི་ འབྲུག་གི་གནམ་གྲུ་གཏོང་མཁན་ཞིག་གི་བོུ་ཡིན་འདུག་པ་དང་ ཁོང་ནི་མཛེས་སྡུག་ལྡན་ལ་ གཤིས་སྤྱོད་བཟང་བ་མ་ཟད་ ཐུགས་སེམས་ཧ་ཅང་གི་བཟང་པོ་ཡོད་པ་ཞིག་ཡིན་པ་འགྲེལ་བརྗོད་བྱེད་བཞིན་ཡོད་པ་རེད།