འབྲུག་ཡུལ་དུ་རྒྱལ་སྤྱིའི་གསང་སྔགས་རྡོ་རྗེ་ཐེག་པའི་བགྲོ་གླེང་ལྷན་ཚོགས་ཐེངས་བཞི་པ་ཚོགས་འདུག
འབྲུག་ཡུལ་དུ་རྒྱལ་སྤྱིའི་གསང་སྔགས་རྡོ་རྗེ་ཐེག་པའི་བགྲོ་གླེང་ལྷན་ཚོགས་ཐེངས་བཞི་པའི་ཚོགས་ཞུགས་པ་རྣམ། ༡༠།༠༤།༢༠༢༢
@Centre for Bhutan & GNH Studies
དེ་ཡང་འབྲུག་རྒྱལ་ཁབ་ཀྱི་རྒྱལ་ས་ཐིམ་ཕུ་(Thimphu)་རུ་ཡོད་པའི་བཞི་ཆེན་མཁར་སྣང་གྲགས་དྲན་རིག་དཔེ་མཛོད་དུ་ཉེ་ལམ་སྤྱི་ཟླ་༡༠པའི་ཚེས་༤བར་ཉིན་གྲངས་བཞིའི་རིང་། རྒྱལ་སྤྱིའི་གསང་སྔགས་རྡོ་རྗེ་ཐེག་པའི་བགྲོ་གླེང་ལྷན་ཚོགས་ཐེངས་བཞི་པ་དེ་བསྐོང་ཚོགས་གནང་ཡོད་པ་དང་། བགྲོ་གླེང་ཉིན་གཉིས་པར་འབྲུག་རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་ཕེབས་འདུག་ལ་ད་ཐེངས་ཀྱི་བགྲོ་གླེང་ལྷན་ཚོགས་དེའི་ཐོག་རྒྱལ་ཁབ་མི་འདྲ་བ་༤༠ཙམ་ནས་མི་སྣ་མཉམ་བཞུགས་གནང་བའི་ཁྲོད་བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་སོགས་ནས་བོད་མི་ཉམས་ཞིབ་པ་དང་མཁས་དབང་བཅས་མི་གྲངས་༡༠མཉམ་ཞུགས་གནང་ཡོད་འདུག
མཉམ་ཞུགས་གནང་མཁན་གྲས་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་ཏཱ་ལའི་བླ་མའི་མཐོ་རིམ་སློབ་གཉེར་ཁང་གི་ལོ་རྒྱུས་དང་ཞིབ་འཇུག་རིག་པའི་སློབ་དཔོན་གཉན་ཐར་ལགས་ཀྱིས། བགྲོ་གླེང་ལྷན་ཚོགས་འདི་ལྟ་བུ་ནི་ལོ་རྒྱུས་ཐོག་ནས་ཧ་ཅང་གི་གལ་འགངས་ཆེན་པོ་ཞིག་ལ་ངོས་འཛིན་གྱིས་ད་རེས་མཉམ་བཞུགས་བྱས་པ་ཡིན། གསང་སྔགས་རྡོ་རྗེ་ཐེག་པ་ཉམས་ལེན་དང་སློབ་གཉེར་བྱེད་སའི་ཁྱབ་ཁོངས་དེ་བོད་ཚུད་པའི་སོག་ཡུལ་དང་། འབྲུག དེ་བཞིན་ལ་དྭགས་སོགས་ཧི་མ་ལ་ཡིའི་རི་རྒྱུད་དང་དམིགས་བསལ་འབྲེལ་བ་ཡོད་པ་མ་ཟད། འབྲུག་རྒྱལ་ཁབ་ངོས་ནས་དེ་ཧ་ཅང་གི་གལ་ཆེ་པོ་དང་བརྩི་མཐོང་གནང་གི་འདུག་ཅེས་འགྲེལ་བརྗོད་གནང་བྱུང་།
ཉེ་ལམ་༢༠༢༢ལོའི་འགོ་སྟོད་དུ་རྒྱལ་སྤྱིའི་དགེ་ལྡན་ལྷན་ཚོགས་ཀྱི་གོ་སྒྲིག་འོག གདན་ས་ཁག་གིས་གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པའི་སྐབས་དང་པོའི་བགྲོ་གླེང་ལྷན་ཚོགས་བསྐོང་ཚོགས་གནང་ཞིང་། སྐབས་དེར་དབུ་འབྱེད་མཛད་སྒོའི་ཐོག་༧བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དྲ་ལམ་ཐད་གཏོང་བརྒྱུད་དབུ་བཞུགས་ཀྱིས། གཞུང་ཆེན་བཀའ་པོད་ལྔ་གཙོ་བོ་གྱུར་བའི་རིགས་ཚོགས་དེ་དག་ལ་སློབ་སྦྱོང་བྱ་རྒྱུ་ཧ་ཅང་གི་གལ་ཆེན་པོ་ཡིན་པ་བཀའ་གནང་ཡོད་པ་མ་ཟད། གདན་ས་ཁག་གིས་ཐུགས་ཁུར་བཞེས་བའི་ཐོག་གཞུང་ཆེན་དེ་དག་ལ་སློབ་གཉེར་གནང་རྒྱུའི་ལམ་སྲོལ་དེ་ཉམས་པ་མེད་པའི་ཐོག་ནས་རྒྱུན་འཛིན་གནང་བཞིན་པར་ཡིད་རང་བསྔགས་བརྗོད་གནང་འདུག
ད་ཐེངས་བགྲོ་གླེང་ཚོགས་ཆེན་ཐོག་འཛམ་གླིང་གང་སའི་གསང་སྔགས་ཉམས་ལེན་པ་དང་། མཁས་དབང་། ཉམས་ཞིབ་པ་སོགས་མཉམ་ཞུགས་གནང་ནས། གསང་སྔགས་རྡོ་རྗེ་ཐེག་པའི་ཉམས་ལེན། གསང་སྔགས་དང་སྨན། གསང་སྔགས་རྡོ་རྗེ་ཐེག་པ་དང་དེང་རབས་ཅན། གསང་སྔགས་རྡོ་རྗེ་ཐེག་པ་དང་གཞི་གྲངས་ཀྱི་དུས་རབས་སོགས་བརྗོད་གཞི་མི་འདྲ་བ་༢༠ལྷག་གི་ཐད་བགྲོ་གླེང་གནང་ཡོད་འདུག
གསར་འགོད་པ། བློ་བཟང་དགེ་ལེགས།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།
བལྟ་བཤེར་མང་ཤོས་བྱས་པའི་གནས་ཚུལ།
RFA
- ཨ་རིའི་གཞུང་ངོས་ནས་རྒྱ་ནག་དང་ལྷན་ཚོང་འབྲེལ་གྲོས་མོལ་བྱས་ཚེ་རྒྱ་ནག་གིས་ཨ་རིའི་ཅ་དངོས་ཐོག་སྒོ་ཁྲལ་གུ་ཡངས་གཏང་རྒྱུ་ཡིན་པ་བརྗོད་འདུག
- རྒྱ་ནག་གཞུང་གི་བཀོད་བྱུས་འོག་གཞུང་འབྲེལ་མིན་པའི་ཚོགས་པས་མཉམ་འབྲེལ་རྒྱལ་ཚོགས་སུ་འགྲོ་བ་མིའི་ཐོབ་ཐང་གི་གནད་དོན་ཐད་ཐེ་བྱུས་བྱེད་བཞིན་ཡོད་སྐོར་སྙན་ཐོའི་གསར་པའི་ནང་གསལ་སྟོན།
- ༸གོང་ས་༸སྐྱབས་མགོན་ཆེན་པོའི་གསེར་ཁྲི་མངའ་གསོལ་མཛད་སྒོའི་སྐབས་ཀྱི་གནས་སྟངས་གསལ་བའི་ཆུ་ཚོན་རི་མོ་ངོ་མ་ ༤༠ ཚོང་སྒྱུར་གནང་རྒྱུ་རེད་འདུག
- བཙན་བྱོལ་ནང་གི་མི་རབས་གཞོན་པ་རྣམས་ལ་བོད་ནང་གི་ཛ་དྲག་གནས་སྟངས་ངོ་སྤྲོད་བྱ་ཆེད། སྙིང་སྟོབས་ཀྱི་འབོད་སྒྲ ཅེས་པའི་གཏམ་བརྗོད་གཟིགས་འབུལ་ཞུ་བཞིན་འདུག
- བྱེས་ཀྱི་གདན་ས་བཀྲིས་ལྷུན་པོ་གཙོས་པའི་བོད་མི་གནས་སྡོད་ས་གནས་ཁག་ཏུ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུས།
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
- རྒྱ་ནག་དང་རྒྱ་གར་གཉིས་གྲོས་མོལ་གྱིས། རྒྱ་གར་གྱི་གནས་སྐོར་བ་རྣམས་བོད་ནང་གངས་རིན་པོ་ཆེར་གནས་མཇལ་དུ་བསྐྱོད་རྒྱུ་བསྐྱར་དུ་སྒོ་འབྱེད་རྒྱུ་རེད་འདུག
- ༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་པ་ ༣༠༠ ལྷག་ལ་མང་མཇལ་སྩལ་བ།
- ལྷོ་ཀོ་རི་ཡའི་མི་སྒེར་གྱི་གནས་ཚུལ་སྲུང་སྐྱོབ་ལྟ་ཞིབ་ཁང་གིས་ཌིབ་སིག་གིས་ལྷོ་ཀོ་རི་ཡའི་མི་ས་ཡ་༡.༥ཡི་གནས་ཚུལ་ཁྲིམས་འགལ་ཐོག་རྐུ་ཁྱེར་བྱེད་བཞིན་པ་གསལ་སྟོན་བྱས་འདུག
- རྒྱ་ནག་གིས་ཀཤ་མིར་དོན་རྐྱེན་དང་འབྲེལ་ཞིབ་འཇུག་ཚད་ལྡན་དགོས་སྐོར་བརྗོད་བཞིན་པ་ནི་རྒྱ་ནག་གིས་གཉེར་བཞིན་པའི་བྱ་གཞག་དང་འགལ་ཟླར་འགྲོ་བཞིན་ཡོད་པ། ཉམས་ཞིབ་པས་གསུངས་འདུག
- ༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་མང་སྤྱི་འཐུས་སྦྲེལ་པོ་རྣམ་གཉིས་ལ་མཇལ་ཁ་སྩལ་བ།