ཏོག་དབྱིབས་ནད་འབུ་གསར་པ་གང་ནས་བྱུང་མིན་བརྟག་དཔྱད་སླད་ཝུའུ་ཧན་དུ་ཡོང་བཅུག་དགོས།

ཨ་མི་རི་ཀའི་ཕྱི་སྲིད་དྲུང་ཆེ་མཡེཀ་པོམ་པེ་ཡོ་(Mike Pompeo)མཆོག་གིས་རྒྱ་ནག་གཞུང་འཛིན་དམར་ཤོག་ཚོགས་པར་ཝུའུ་ཧན་ནད་འབུ་བརྟག་དཔྱད་ཁང་དུ་ཚན་རིག་ཞིབ་འཇུག་པ་ཡོང་བཅུག་དགོས་པའི་ནན་སྐུལ་གནང་འདུག

ཨ་མི་རི་ཀའི་ཕྱི་སྲིད་དྲུང་ཆེ་མཡེཀ་པོམ་པེ་ཡོ་(Mike Pompeo)མཆོག་གིས་ང་ཚོས་རྒྱ་ནག་དམར་ཤོག་ཚོགས་པར་ནད་འབུ་རྟག་དཔྱད་ཁང་དུ་ཆེད་ལས་པ་ཡོང་བཅུག་དགོས་པའི་རེ་བསྐུལ་ད་ལྟའང་བྱེད་བཞིན་ཡོད། དེའི་བརྒྱུད་ནས་ནད་འབུ་དེ་དངོས་སུ་གང་ནས་བྱུང་ཡོད་མེད་ང་ཚོས་ཐག་གཅོད་བྱེད་ཐུབ་རྒྱུ་ཡིན་པ་རེད་ཅེས་ཁ་སང་རེས་གཟའ་པ་སངས་ཉིན་Fox News ཞེས་པའི་གསར་ལས་ཁང་ལ་གསུངས་འདུག

ཨ་མི་རི་ཀའི་ཕྱི་སྲིད་དྲུང་ཆེ་མཡེཀ་པོམ་པེ་ཡོ་(Mike Pompeo)མཆོག་གིས་གོང་ཞུས་གནས་ཚུལ་གསལ་སྟོན་གནང་བ་དང་ཆབས་ཅིག་ཨ་མི་རི་ཀའི་སྲིད་འཛིན་སྐུ་ཞབས་Donald Trump མཆོག་ནས་ཀྱང་ད་རེས་རྒྱ་ནག་ནང་ཏོག་དབྱིབས་ནད་འབུ་གསར་པའི་ནད་ཡམས་ཀྱི་འོག་དངོས་སུ་རྐྱེན་འདས་སུ་ཕྱིན་པའི་མིའི་གྲངས་འབོར་ཐོག་ལ་དོགས་པ་ཡོད་ལུགས་ཁོང་གི་Twitter དྲ་ཚིགས་ཐོག་ཁ་སང་བྲིས་གནང་ཡོད་པ་རེད།

ཕྱི་སྲིད་དྲུང་ཆེ་སྐུ་ཞབས་Mike Pompeo མཆོག་གིས་གསུང་པའི་བཀའ་མོལ་དེ་ཡིས་ཏོག་དབྱིབས་ནད་འབུ་གསར་པའི་ནད་ཡམས་དེ་རྒྱ་ནག་ཝུའུ་ཧན་གྱི་རི་སྐྱེས་སྲོག་ཆགས་ཁྲོམས་རྭ་ནས་བྱུང་བ་ཞིག་མ་ཡིན་པར་དེ་ནི་ཝུའུ་ཧན་གྱི་ནད་འབུ་བརྟག་དཔྱད་ཁང་ནས་བྱུང་བ་ཞིག་ཡིན་པའི་ལབ་གླེང་ཞིག་ཡོང་བཞིན་པ་དེ་གསལ་བཏོན་གནང་གི་ཡོད་པ་རེད།

རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པས་ཁ་སང་ཨ་མི་རི་ཀའི་གཞུང་ཕྱོགས་ནས་ནད་འབུ་ཁྱབ་གདལ་འགྲོ་སྟངས་སྐོར་སྐད་ཆ་འདྲ་མིན་བཤད་ཀྱི་ཡོད་པའི་སྐྱོན་བརྗོད་བྱས་ཡོད་པ་རེད།།