လယ်ယာသုံးစက်ကိရိယာထုတ် လုပ်ရေးစက်ရုံက အလုပ်သမားတွေ ဆန္ဒပြ

ရန်ကုန်မြို့ပြည်လမ်းပေါ်က Young Investment Group(YIG) ကုမ္ပဏီဟာ အစိုးရနဲ့ ချုပ်ဆိုထားတဲ့စာချုပ်ကို လိုက်နာမှုမရှိတဲ့အတွက် အရေးယူပေးဖို့ ကုမ္ပဏီဝန်ထမ်းတွေက ဒီနေ့ တာမွေမြို့နယ်က ဗိုလ်စိန်မှန်ကွင်းမှာ ဆန္ဒပြတောင်းဆိုကြပါတယ်။

YIG ကုမ္ပဏီဟာ အစိုးရနဲ့ ချုပ်ဆိုထားတဲ့ စာချုပ်ပါ စည်းကမ်းချက်တွေကို ဖောက်ဖျက်ပြီး တခြားလုပ်ငန်းတွေကို လုပ်ကိုင်ဆောင်ရွက်နေတာကြောင့် ကုမ္ပဏီကို ဖယ်ရှားပေးဖို့တောင်းဆို တာဖြစ်ကြောင်း YIG ကုမ္ပဏီဝန်ထမ်း ကိုအောင်ကျော်ထွန်းနိုင်ဦးက ပြောပါတယ်။

"ကုမ္ပဏီက ဒီ ၃ နှစ်တာအတွင်းမှာပေါ့နော် ကျနော်တို့ အရင်လက်ရှိအစိုးရ လုပ်နေတဲ့အတိုင်းတော့ မလုပ်ဆောင်ဘဲနဲ့ တခြားပေါ့နော် ဒီလယ်ယာအလုပ်နဲ့ မဆိုင်တဲ့လုပ်ငန်းတွေ လုပ်နေတယ်ပေါ့၊ လုပ်နေတော့ ကျနော်တို့ ဘာဖြစ်လာလဲဆိုတော့ လုပ်ငန်းခွင်မှာ အလုပ်မရှိတော့ လုပ်ငန်းခွင် မတည်မြဲမှုတွေ စတင်ဖြစ်ပေါ်လာတယ်ပေါ့၊ အလုပ်ဖြုတ်မှုတွေ ဖြစ်ပေါ်လာတယ်ပေါ့၊ အဲ့ဒီအတွက် စာချုပ်ပါအတိုင်းလုပ်ဆောင်မှ ကျနော်တို့ဟာ လုပ်ငန်းခွင်တည်မြဲမှာဖြစ်တယ်၊ အလုပ်မလုပ်တဲ့အတွက် ကျနော်တို့ဟာ မလိုအပ်တဲ့လူက ဖြုတ်လိုက်တယ်ပေါ့နော်၊ အဲ့အတွက် ကျနော်တို့က စာချုပ်ပါအတိုင်း လုပ်ဆောင်ပေး၊ မလုပ်ဆောင်ရင်လည်း နောက်ထပ်ကုမ္ပဏီတစ်ခုကို လွှဲပြောင်းပေးပေါ့၊ ဒီကုမ္ပဏီကို ဖယ်ရှားပေးဖို့ ကျနော်တို့က တောင်းဆိုတယ်"