နှစ်လအတွင်း ရေပူဂိတ်ကနေ ၂ဘီလီယံကျော်ဖိုး တရားမဝင် ကုန်ပစ္စည်းတွေ ဖမ်းဆီးရမိ

တရားမဝင်ကုန်ပစ္စည်းဝင်ရောက်မှု၊ လက်နက်ခဲယမ်းတွေသယံဇာတနဲ့ သစ်တော ထွက်ပစ္စည်းတွေ ပြည်တွင်း ကိုဝင်ရောက်မှုနဲ့ပြည်ပကိုတင်ပို့မှု မရှိစေဖို့ ရေပူစစ်ဆေးရေးစခန်းက သက်ဆိုင်ရာ အစိုးရဌာနအဖွဲ့၁၂ဖွဲ့နဲ့ ပူးပေါင်းပြီး စစ်ဆေးမှုတွေပြုလုပ်နေတာဖြစ်ပါတယ်။

ဖမ်းဆီးရမိတဲ့ ပစ္စည်းတွေကို ၂၄ နာရီအတွင်း လားရှိုးမြို့မှာရှိတဲ့ အကောက်ခွန်ဌာနကို ပေးပို့တာဖြစ်တယ်လို့လည်း သိရပါတယ်။

နယ်မြေအခြေအနေ၊ ဝန်ထမ်းအင်အားမလုံလောက်မှု၊ ကုန်ပစ္စည်းစစ်ဆေးတဲ့ စက်လိုအပ်ချက်တွေကြောင့် အခက်အခဲရှိသလို ကုန်ပစ္စည်းဖမ်းဆီးနေချိန်နဲ့ဖမ်းဆီးမှုရပ်တန့်နေချိန်တွေကို သတင်းပေးသူတွေ ရှိနေတဲ့အတွက်လည်း ဖမ်းဆီးရေးမှာ အခက်အခဲရှိနေတယ်လို့ ဦးတက်ထွန်းအောင် က ပြောပါတယ်။

ရေပူစစ်ဆေးရေးဂိတ်မှာ တာဝန်ထမ်းဆောင်နေတဲ့ ဝန်ထမ်းတွေအတွက် အစိုးရက လစာအပြင် တစ်ဦးကို နေ့တွက် စရိတ်အဖြစ် ငွေကျပ် ၅ ထောင် သတ်မှတ်ပေးသလို ဖမ်းဆီးရမိတဲ့ ကုန်ပစ္စည်တန်ဖိုးရဲ့ ငါးဆယ်ရာခိုင်နှုန်းကို ဆုကြေးအနေနဲ့ ပေးတဲ့အတွက် ဝန်ထမ်းတွေဟာ လာဘ်ပေးလာဘ်ယူတာ လက်ခံမှာမဟုတ်ဘူးလို့လည်း ပြောပါတယ်။

၂၀၁၂ ခုနှစ် ဇန်နဝါရီလမှာ ပိတ်သိမ်းခဲ့တဲ့ ရေပူစစ်ဆေးရေးစခန်းဟာ အရင်စစ်အစိုးရလက်ထက်က အဂတိလိုက်စားမှုနဲ့ ပတ်သက်ပြီး နာမည်ကြီးခဲ့တဲ့ ဂိတ်တစ်ခုဖြစ်ခဲ့ပါတယ်။ ဒီအတွက် ရေပူစစ်ဆေးရေး စခန်းပြန်လည်ဖွင့်လှစ်မှာနဲ့ ပတ်သက်ပြီး ဒေသခံတွေ၊ နိုင်ငံရေးပါတီတွေနဲ့ ကုန်သည်တွေက ကန့်ကွက် ခဲ့ကြပေမယ့် ပြီးခဲ့တဲ့ ဇန်နဝါရီလ ၁၆ ရက်နေ့က ပြန်လည်ဖွင့်လှစ်ခဲ့တာ ဖြစ်ပါတယ်။