ကချင်ဒေသ ထိုးစစ်တွေရပ်ဖို့ အမေရိကန် ပြောကြား

ဝါရှင်တန်မြို့တော်က အမေရိကန် နိုင်ငံခြားရေး ဝန်ကြီးဌာန အဆောက်အဦ။

မြန်မာအစိုးရရဲ့ ထိုးစစ်ဆင် တိုက်ခိုက်မှုတွေကြောင့် ဒေသခံ ပြည်သူတွေ အိမ်နီးချင်း တရုတ်နိုင်ငံထဲကို အလုံးအရင်းနဲ့ ထွက်ပြေး ဝင်ရောက်ခဲ့ပြီးနောက် အမေရိကန် အစိုးရက အခုလို ပြောဆိုလိုက်တာပါ။

အမေရိကန် အစိုးရ အနေနဲ့ မြန်မာနိုင်ငံရဲ့ အခြေအနေတွေကို အလေးထား စောင့်ကြည့်နေတယ်လို့ အမေရိကန် နိုင်ငံခြားရေး ဝန်ကြီး ဌာန ပြောခွင့်ရ အမျိုးသမီး Kelly McKellogg က ပြောပါတယ်။ ဒါ့ပြင် မြန်မာအာဏာပိုင်တွေ အနေနဲ့ အခုလို ရန်လို တိုက်ခိုက်မှု မှန်သမျှကို အဆုံးသတ်ပြီး အမျိုးသား ပြန်လည် သင့်မြတ်ရေး အတွက် အတိုက်အခံတွေ၊ တိုင်းရင်းသား အုပ်စုတွေနဲ့ စတင် ဆွေးနွေးဖို့ တိုက်တွန်းလိုကြောင်း Ms. McKellogg က ပြောပါတယ်။

ကချင်ပြည်နယ်မှာ တရုတ်နိုင်ငံ အတွက် ရေအား လျှပ်စစ် ပံ့ပိုးနိုင်ဖို့ တည်ဆောက်နေတဲ့ ရေအား လျှပ်စစ် ထုတ်လုပ်ရေး စီမံကိန်းကြီး တခု အနီးမှာ ကေအိုင်အေ ကချင် တိုင်းရင်းသား လက်နက်ကိုင်တပ်တွေနဲ့ မြန်မာ စစ်အစိုးရတပ်တွေ အကြား တိုက်ပွဲ ဖြစ်ပွားနေတာ သီတင်းတပတ် နီးပါး ရှိသွားပြီ ဖြစ်ပြီး ရှမ်းပြည် မြောက်ပိုင်း အထိ တိုက်ပွဲတွေ ပြန့်နှံ့ ဖြစ်ပွားခဲ့ပါတယ်။