သမ္မတ ဦးသိန်းစိန် အမေရိကန်ခရီးစတင်

တစ်ချိန်တည်းမှာလည်း အမေရိကန်အစိုးရက အရင်က ပိတ်ပင်ထားခဲ့တဲ့ ဖွံ့ဖြိုးတိုးတက်ရေး ချေးငွေဆိုင်ရာ ကိစ္စကိုလည်း အမေရိကန်လွှတ်တော်က ဥပဒေတစ်ရပ် ပြဋ္ဌာန်းပြီး ဖယ်ရှားပေးလိုက်ပြီလို့ သိရပါတယ်။

ဒါကြောင့် အမေရိကန်အစိုးရ အနေနဲ့ ကမ္ဘာ့ဘဏ်၊ နိုင်ငံတကာ ငွေကြေးရန်ပုံငွေအဖွဲ့ (IMF) လိုမျိုး အဖွဲ့အစည်းတွေနဲ့ ပူးတွဲပြီး မြန်မာနိုင်ငံကို ချေးငွေဆိုင်ရာကိစ္စတွေ ပြန်လည် ကူညီနိုင်တော့မှာလို့ ရိုက်တာသတင်းက ရေးသားပါတယ်။

အလားတူ ဥရောပသမဂ္ဂကလည်း မြန်မာနိုင်ငံအနေနဲ့ ဥရောပဈေးကွက်မှာ ကုန်သွယ်မှု အခွင့်အရေး အထူးအလေးပေးခံရတဲ့ GSP စနစ်ကို ပြန်လည် ခံစားခွင့်ရှိကြောင်း ပြီးခဲ့တဲ့ သီတင်းပတ်က ဆုံးဖြတ်ခဲ့တယ်လို့ ရိုက်တာသတင်းက ရေးသားပါတယ်။

သမ္မတ ဦးသိန်းစိန်ဟာ အမေရိကန်နိုင်ငံ ခရီးစဉ်အတွင်း ကုလသမဂ္ဂ အထွေထွေညီလာခံမှာ မိန့်ခွန်းပြောကြားဖို့ရှိပြီး အမေရိကန်အစိုးရ တာဝန်ရှိပုဂ္ဂိုလ်တွေ၊ နိုင်ငံတကာ ခေါင်းဆောင်တွေနဲ့ တွေ့ဆုံ ဆွေးနွေးဖို့ ရှိတယ်လို့ ဦးဇော်ဌေးက ပြောပါတယ်။

နယူးယောက်မြို့ ကုလသမဂ္ဂဌာနချုပ်မှာ ကျင်းပမယ့် ကုလသမဂ္ဂ အထွေထွေညီလာခံကို တက်ရောက်ဖို့ သမ္မတ ဦးသိန်းစိန်နဲ့အဖွဲ့ဟာ ဒီကနေ့ ညနေပိုင်းမှာ ရန်ကုန်မြို့ မင်္ဂလာဒုံလေဆိပ်ကနေ ထွက်ခွာသွားပြီလို့ သိရပါတယ်။

တစ်ချိန်တည်းမှာလည်း လွှတ်တော်က အတည်ပြုပြီး သမ္မတရုံးကို ပေးပို့ထားတဲ့ နိုင်ငံခြားရင်းနှီးမြုပ်နှံမှု ဥပဒေကို သမ္မတက အတည်ပြုပေးဖို့ ဆိုင်းငံ့ထားလိုက်ပြီး၊ လိုအပ်ချက်တချို့၊ ပြင်ဆင်ချက် တချို့ကို သမ္မတရုံးက ပြင်ဆင်ဖြည့်စွက်ပြီး လွှတ်တော်မှာ ပြန်လည် ဆွေးနွေးကြဖို့အတွက် ပေးပို့လိုက်ပြီလို့ သိရပါတယ်။

အမေရိကန်ပြည်ထောင်စုဘက်က မြန်မာ့သွင်းကုန်ကို ပြန်လည်လက်ခံဖို့ကိစ္စမှာ ဘယ်အရာတွေ အနှောင့်အယှက် အတားအဆီးဖြစ်နိုင်မလဲ၊ နိုင်ငံခြားရင်းနှီးမြှုပ်နှံမှု ဥပဒေကို သမ္မတက ဘာကြောင့်လက်မှတ် မရေးထိုးသေးတာလဲ စတာတွေနဲ့ ပတ်သက်လို့ မအင်ကြင်းနိုင်က ဦးဇော်ဌေးကို ဆက်သွယ်မေးမြန်းထားပါတယ်။

	ဆက်သွယ်မေးမြန်းချက်။
	အသံဖိုင်ယူရန်။