လူမှုကာကွယ်ရေး မဟာဗျူဟာ လိုအပ်နေကြောင်း သမ္မတ ပြောဆို

နှစ်ရက်ကြာ ကျင်းပမယ့် အဲဒီညီလာခံကို တက်ရောက်နေတဲ့ မင်္ဂလာမြန်မာအဖွဲ့က ညှိနှိုင်းရေးမှူး မမြတ်စုက သမ္မတမိန့်ခွန်းနဲ့ ပတ်သက်လို့ ပြောပြတာက -

"သမ္မတကြီးအနေနဲ့ သူ့အနေနဲ့ပေါ့၊ ဒီမြန်မာနိုင်ငံမှာ အခုတံခါးဖွင့်ပေးနေတယ်ပေါ့နော်၊ တခါးဖွင့်ပေးနေတဲ့ အတွက် ပြည်ပက အကူအညီပေးဖို့ အဓိကအားဖြင့် အလုပ်လက်မဲ့တွေ၊ ဝင်ငွေနိမ့်ပြည်သူတွေကို အကူအညီပေးဖို့ အတွက်ပေါ့၊ လူမှုရေး အကာအကွယ် လုပ်ပေးဖို့ အတွက်ပေါ့။ နောက်တစ်ခုက တတိယဦးစားပေးပေါ့နော်၊ မက်ခရိုအဆင့် လူမှုရေးတွေကိုလည်း ကောင်းအောင်လုပ်ပေးပါ အဲဒီလိုပြောသွားပါတယ်ရှင့်"

အခုလို အစိုးရအနေနဲ့ နိုင်ငံတကာ အကူအညီတွေ ပိုပြီးရလာဖို့ လမ်းကြောင်းတွေ ဖွင့်ပေးမယ်ဆိုရင် မြန်မာနိုင်ငံမှာ အကူအညီ လိုအပ်နေတဲ့ ကလေးသူငယ်တွေကို အရင်ကထက် ပိုပြီး ကာကွယ် စောင့်ရှောက်လာနိုင်မယ်လို့ မျှော်လင့်ကြောင်းလည်း မမြတ်စုက ပြောပါတယ်။

သမ္မတရဲ့အဖွင့်မိန့်ခွန်းမှာ မြန်မာနိုင်ငံဟာ ဖွံ့ဖြိုးမှု နောက်ကျနေ ဆဲ ဖြစ်တာကြောင့် ကျေးလက်နေ ပြည်သူတွေနဲ့ နယ်စပ်ဒေသက တိုင်းရင်းသား နယ်မြေတွေမှာ ဆင်းရဲမွဲတေမှုဟာ မြို့ပြဒေသတွေနဲ့ ကွာဟမှုတွေ ရှိနေသေးကြောင်း၊ ဒါ့အပြင် ဝင်ငွေကွာဟမှု ကြီးမားနေ တာကြောင့် ဆင်းရဲသားတွေရဲ့ လူမှုဖူလုံရေးအတွက် အားလုံး လက်တွဲ လုပ်ဆောင်မှ ရမယ့်အခြေအနေ ဖြစ်ကြောင်း ထည့်သွင်း ပြောဆိုသွား ပါတယ်။

ဒီညီလာခံကို အမေရိကန်ပြည်ထောင်စု အခြေစိုက် National Democratic Institute နဲ့ ကုလသမဂ္ဂ လက်အောက် UNICEF တို့က ဦးစီးကျင်းပတာဖြစ်ပြီး နိုင်ငံတကာ အဖွဲ့အစည်းတွေ ပညာရှင်တွေနဲ့ အစိုးရ ဝန်ကြီးဌာန ပေါင်းစုံက တာဝန်ရှိသူတွေ အပြင် လူမှုအဖွဲ့ အစည်း ပေါင်းစုံက ကိုယ်စားလှယ်တွေ တက်ရောက်ခဲ့ကြပါတယ်။