တပ်မတော်က ကုန်စည်ကားတွေကို ပိတ်ထား

ဒီကနေ့ ညနေ သုံးနာရီအထိ ဖြတ်သန်းခွင့် ပိတ်ထားဆဲဖြစ်ပြီး ကုန်ကားတွေဟာ ဒွန်ဘန်ရွာလယ် ဈေးဆိုင်တန်းတွေရှေ့မှာ ရပ်နားထားရတယ်လို့ ရွာသားတစ်ဦးကပြောပါတယ်။

ပြည်နယ်ဝန်ကြီးချုပ်နဲ့ လုံခြုံရေးနဲ့ နယ်စပ်ရေးရာဝန်ကြီးတို့က ကုန်ကားတွေပိတ်ထားတာနဲ့ ပတ်သက်ပြီး ဆွေးနွေးနေကြတယ်လို့ အစိုးရအဖွဲ့နဲ့ နီးစပ်သူတစ်ဦးကပြောပါတယ်။

တုံမဏီ၊ ဒလူး၊ ဝမ်းပလာ စတဲ့ မှော်ရွာတွေနဲ့ ထိစပ်နေတဲ့ တနိုင်းဒေသဘက်မှာ ကေအိုင်အေ တပ်မဟာ ၂ လက်အောက်ခံ တပ်ရင်း ၁၄ က လှုပ်ရှားနေတာဖြစ်ပါတယ်။

မြစ်ကြီးနားဘက်ကနေ အခြေခံစားကုန် ဆန်၊ ဆီ၊ ကုန်ခြောက်မျိုးစုံနဲ့ စက်သုံးဆီတွေကို ကုန်တင်ကားကြီးတွေနဲ့ တင်ပို့နေတာဖြစ်ပြီး တနိုင်းဒေသက ပြည်သူတွေနဲ့ ရွှေမှော်၊ ပယင်းမှော် လုပ်ကိုင်သူတွေဟာလည်း အဲဒီလမ်းကြောင်းကိုပဲ အဓိက သယ်ယူနေရတာဖြစ်ပါတယ်။

အစိုးရတပ်မတော်နဲ့ ကေအိုင်အေတပ်ဖွဲ့တွေအကြား စစ်ရေးပဋိပက္ခတွေဖြစ်ပွားနေတဲ့ ကချင်ပြည်နယ်မှာ မိုးကောင်း-ဖားကန့်၊ မြစ်ကြီးနား-တနိုင်း၊ မြစ်ကြီးနား-ဗန်းမော်၊မြစ်ကြီးနား-ဆွမ်ပရာဘွမ်-ပူတာအို စတဲ့ လမ်းကြောင်းတွေကို လုံခြုံရေးအခြေအနေအရ နှစ်ဖက်တပ်တွေက မကြာခဏပိတ်ထားလေ့ရှိပါတယ်။