သတင်းသမား ၃ ဦးအမှု အာမခံ ဒုတိယအကြိမ် ပယ်ချ

မတရားအသင်း ဆက်သွယ်မှု ဥပဒေပုဒ်မ ၁၇/၁ နဲ့တရားစွဲဆိုခံထားရတဲ့ DVB နဲ့ ဧရာဝတီ သတင်းဌာနတွေက သတင်းသမားသုံးဦး အပါအဝင် ၆ဦးရဲ့ ဒုတိယအကြိမ် အာမခံလျှောက်ထားမှုကို သီပေါတရားရုံးက ဒီကနေ့ ထပ်မံ ပယ်ချလိုက်ပါတယ်။

အမှုနဲ့ဆိုင်တဲ့ သက်သေခံချက်တွေ၊ တရားလိုပြသက်သေတွေ စစ်ဆေးဖို့ ကျန်နေတဲ့အပြင် အရေးယူခံထားရ သူတွေဟာ သီပေါမြို့မှာ နေထိုင်သူတွေ မဟုတ်တာကြောင့် အမှုစစ်ဆေးရာမှာ ကြန့်ကြာနိုင်တဲ့အတွက် အာမခံ ပယ်ချတာဖြစ်တယ်လို့ တရားရုံးက ဒီကနေ့ အမိန့်ချမှတ်လိုက်တာပါ။

သတင်းသမားတွေအတွက် ပထမအကြိမ်အဖြစ် အာမခံလျောက်ထားမှုကို ပြီးခဲ့တဲ့ ဇူလိုင်လ ၂၈ ရက်နေ့ ရုံးချိန်းမှာ လျောက်ထားခဲ့ပြီး တရာလိုပြ သက်သေတွေစစ်ဖို့ ကျန်နေတာနဲ့ အမှုရုပ်လုံး မပေါ်သေးတာကြောင့်ဆိုပြီး အခုလ၄ရက်နေ့မှာ ပထမကြိမ်အဖြစ် ပယ်ချခဲ့တာဖြစ်ပါတယ်။

DVB သတင်းဌာနက သတင်းထောက်တွေ ဖြစ်တဲ့ ဦးအေးနိုင်၊ ကိုပြည့်ဘုန်းအောင်နဲ့ ဧရာဝတီသတင်းဌာနက သတင်းထောက် ကိုသိန်းဇော် ခေါ် ကိုလဝီ တို့ဟာ ပြီးခဲ့တဲ့ ဇွန်လ ၂၆ ရက်နေ့က တအာင်းအမျိုးသား လွတ်မြောက်ရေး တပ်မတော် TNLA  က ပြုလုပ်တဲ့ မူးယစ်ဆေးဝါး ဖျက်ဆီးတဲ့ အခမ်းအနားကို သွားရောက် သတင်းယူပြီး အပြန်မှာ ဖမ်းဆီးခံခဲ့ရတာဖြစ်ပါတယ်။

သူတို့စီးလာတဲ့ကားတွေမှာ အတူပါလာသူ သုံးယောက်ကိုလည်း မတရားအသင်း ဆက်သွယ်မှု ပုဒ်မ ၁၇/၁ နဲ့ တရားစွဲဆိုဖမ်းဆီးထားပြီး အဲဒီအထဲက မိုင်းဆန်းညွန့်နဲ့ မိုင်းအောင်ခမ်းတို့ နှစ်ယောာက်ကို သူတို့ မောင်းတဲ့ ကားတွေဟာ လိုင်စင်မဲ့ကားတွေဖြစ်လို့ဆိုပြီး ပို့ကုန်သွင်းကုန် ဥပဒေနဲ့ပါ တရားစွဲဆိုထားပါတယ်။

အမှုအတွက် နောက်ထပ်ရုံးချိန်းကိုတော့ လာမယ့် သြဂုတ်လ ၂၅ ရက်နေ့ကို ချိန်းဆိုထားပါတယ်။