သီလဝါ အထူးစီးပွားရေးဇုန် B အကောင်အထည်ဖော်ရေး စာချုပ်လက်မှတ်ရေးထိုး


2016.10.21
thilawa-economic-zoneb-620.jpg သီလဝါစီမံကိန်း ဒုတိယအဆင့် အကောင်အထည်ဖေါ်ဖို့အတွက် နေပြည်တော် Park Royal ဟိုတယ်မှာ အောက်တိုဘာလ ၂၁ ရက်နေ့က မြန်မာနဲ့ ဂျပန် နှစ်နိုင်ငံနားလည်မှု စာချွန်လွှာ လက်မှတ်ရေးထိုးစဉ်
Photo: Win Ko Ko Latt/RFA

သီလဝါ အထူးစီးပွားရေးဇုန် ဒုတိယအဆင့် ဇုန် B စီမံကိန်းကို မြေယာပြဿနာ ဖြေရှင်းပြီးတဲ့ မြေနေရာတွေမှာပဲ အကောင်အထည်ဖော်မယ်လို့ သီလဝါအထူးစီးပွားရေးဇုန် စီမံခန့်ခွဲမှုကော်မတီ ဥက္ကဌ ဦးဆက်အောင် က ပြော ပါတယ်။

ဒီကနေ့ နေပြည်တော် Park Royal Hotel မှာ မြန်မာနဲ့ ဂျပန်နှစ်နိုင်ငံက သီလဝါစီမံကိန်း ဒုတိယအဆင့် အကောင် အထည်ဖေါ်ဖို့အတွက် နှစ်ဖက်နားလည်မှု စာချွန်လွှာ လက်မှတ်ရေးထိုးတာ ဖြစ်ပါတယ်။ စီမံကိန်းလုပ်မယ့်နေ ရာမှာ မြေယာပြဿနာတွေဖြစ်နေရင် ဆက်မလုပ်ဘူးဆိုတဲ့ ဂျပန်ကုမ္ပဏီ တာဝန်ရှိသူရဲ့ စကားနဲ့ ပတ်သက်ပြီး သတင်းထောက်တွေက မေးမြန်းရာမှာ သီလဝါအထူးစီးပွားရေးဇုန် စီမံခန့်ခွဲမှုကော်မတီ ဥက္ကဌ ဦးဆက်အောင် က ပြန်လည်ဖြေကြားတာ ဖြစ်ပါတယ်။

မြန်မာ - ဂျပန်သီလဝါ ဖွံ့ဖြိုးရေးကုမ္ပဏီ လီမိတက်က အမှုဆောင်အရာရှိ ချုပ် မစ္စတာ တာကာရှီက ဒေသခံတွေနဲ့ အစိုးရအကြား မြေယာပြဿနာတွေကို ပြေလည်အောင် မညှိနှိုင်းနိုင်ရင် သီလဝါအထူးစီးပွားရေးဇုန် ဘီ ကို ဆက်လက် အကောင်အထည်ဖော်နိုင်မှာ မဟုတ်ဘူးလို့ မနေ့က သတင်းထောက်တွေကို ပြောထားပါတယ်။

သီလဝါ အထူးစီးပွားရေးဇုန် ဇုန် B ကို ဟက်တာ ၇၀၀ (ဧကပေါင်း ၁၆၈၀) မှာ အကောင်အထည်ဖော်မှာဖြစ် ပါတယ်။

အကျယ်အဝန်း ဟက်တာ ၄၀၀၊ ဧကအားဖြင့် ၉၆၀ နီးပါးရှိတဲ့ သီလဝါအထူးစီးပွားရေးဇုန် A ကိုတော့ ၂၀၁၂ ခုနှစ်မှာ လက်မှတ်ရေးထိုး သဘောတူခဲ့ပြီး ၂၀၁၅ ခုနှစ်၊ စက်တင်ဘာလမှာ စတင်လည်ပတ်ခဲ့တာဖြစ်ပါတယ်။

လက်ရှိမှာတော့ နိုင်ငံပေါင်း ၁၇ နိုင်ငံက ရင်းနှီးမြှုပ်နှံသူပေါင်း ၇၂ ဦးကို ခွင့်ပြုထားပြီး စီးပွားဖြစ်စက်ရုံပေါင်း ၁၉ ခုစတင်လည်ပတ်နေတယ်လို့ သိရပါတယ်။

ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။