ဇောတိက ဓာတ်ငွေ့လုပ်ငန်းအတွက် ရင်းနှီးမြှုပ်နှံမှုရဖို့ ထိုင်းကြိုးပမ်း

PTTEP အနေနဲ့ ထိုင်းဖက်က ထိန်းချုပ် လည်ပတ်မယ့် လုပ်ကွက် ၅ ခုဖြစ်တဲ့ M3, M4, M7, M9 နဲ့ M11 တွေ အတွက် အကျိုးတုူ ပူးပေါင်းလုပ်ကိုင်နိုင်မယ့် နိုင်ငံခြား ရင်းနှီးမြှုပ်နှံသူတွေကို ရှာဖွေနေပြီး လုပ်ကွက်တခုကို ရှယ်ယာရှင် တဦးချင်းစီထက် အားလုံးနဲ့ အကျိုးတူလုပ်နိုင်သူတွေကို ဦးစားပေး ဆွေးနွေးနေတယ်လို့ မစ္စတာ အန်နွံက ပြောပါတယ်။

လုပ်ကွက် ၅ ခုစလုံးအတွက် ထိုင်းဖက်က တာဝန်ယူလုပ်ကိုင်ဖို့ သဘောတူထားပေမယ့် ဓာတ်ငွေ့ဝယ်ယူရေး စာချုပ်ကိုတော့ PTTEP နဲ့ မြန်မာ့ရေနံနဲ့ သဘာဝဓာတ်ငွေ့လုပ်ငန်းတို့အကြား ပြီးခဲ့တဲ့ ဇူလိုင်လ ၃၀ ရက်နေ့က သဘောတူ လက်မှတ်ရေးထိုးခဲ့တာ ဖြစ်ပါတယ်။

စာချုပ်အရ ဒီလုပ်ငန်းတွေကို မြန်မာစစ်အစိုးရရဲ့ မြန်မာ့ရေနံနဲ့ သဘာဝဓာတ်ငွေ့ လုပ်ငန်း MOGE က အစုရှယ်ယာ ၁၅ ရာခိုင်နှုန်းကနေ ၂၀ ရာခိုင်နှုန်းအထိ ပိုင်ဆိုင်ထားပြီး ကျန်တဲ့ အစုရှယ်ယာ ၈၀ ရာခိုင်နှုန်းကျော်ကို ထိုင်းကုမ္ပဏီက ပိုင်ဆိုင်ထားပါတယ်။

M9 လုပ်ကွက် ဇောတိက ဓာတ်ငွေ့တွင်းက ထွက်မယ့် ဓာတ်ငွေ့တွေကို ၂၀၁၃ ခုနှစ်ကစပြီး တနေ့ကို ကုဗပေ သန်း ၃၀၀ အထိ ထုတ်လုပ်မှာ ဖြစ်ပါတယ်။ ဒီအထဲက ကုဗပေ သန်း ၂၄၀ ကျော်ကို ထိုင်းနိုင်ငံဖက်ကို တင်ပို့သွားမှာ ဖြစ်တယ်လို့ သိရပါတယ်။