စစ်ကောင်စီဥက္ကဋ္ဌ ခရီးစဉ်ကြောင့် စစ်တွေမြို့ စျေးဆိုင်အားလုံးပိတ်ထားရ

ရခိုင်ပြည်နယ်၊ စစ်တွေမြို့ကို ဖေဖော်ဝါရီလ ၂၆ ရက်နေ့ စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် လာရောက်ဖို့ရှိတာကြောင့် ဈေးဆိုင်တွေအားလုံး ပိတ်ခိုင်းထားတယ်လို့ ဒေသခံတွေက ပြောပါတယ်။

၂၀၂၃ ခုနှစ်၊ ဖေဖော်ဝါရီလ ၂၆ ရက်နဲ့ ၂၇ ရက်နေ့တွေမှာ ဈေးဆိုင်တွေပိတ်ဖို့ စစ်ကောင်စီရဲ့ အာဏာပိုင်တွေက တစ်ရက်ကြို ညွှန်ကြားထားတာလို့ လုံခြုံရေးအရ အမည်မဖော်လိုတဲ့ ဒေသခံတစ်ဦးက RFA ကို ပြောပါတယ်။

"စစ်တွေပွိုင့်က ဈေးတွေလည်း ပိတ်ခိုင်းထားတယ်။ နောက်ပြီး လမ်းဘေးမှာ ဆိုင်ခန်းတွေလည်းပါတယ်။ ဦးဥတ္တမ ပန်းခြံနားက ဆိုင်ခန်းတွေလည်း ခဏ ပိတ်ခိုင်းထားတယ်။ လုံခြုံရေးချထားတာတွေလည်း တွေ့တယ်"

စစ်တွေမြို့ပေါ်မှာ လုံခြုံရေးတိုးမြှင့်ချထားတာတွေ တွေ့ရပြီး စည်ပင်ဝန်ထမ်းတွေကလည်း လမ်းသန့်ရှင်းရေးလုပ်နေကြတယ်လို့ သူက ဆက်ပြောပါတယ်။

စစ်ကောင်စီဥက္ကဋ္ဌနဲ့ စီးပွားရေးလုပ်ငန်းရှင်တွေ စစ်တွေမြို့မှာ တွေ့ဆုံဖို့ရှိတယ်လို့ သတင်းတွေထွက်နေပေမယ့် RFA အနေနဲ့ သီးခြား အတည်မပြုနိုင်သေးပါဘူး။

စစ်ကောင်စီကလည်း တစ်စုံတစ်ရာ သတင်းထုတ်ပြန်ထားတာမရှိသလို စစ်ကောင်စီရဲ့ ရခိုင်ပြည်နယ်ပြောခွင့်ရ ပြည်နယ်ဥပဒေချုပ် ဦးလှသိန်းကို RFA က တယ်လီဖုန်းနဲ့ ဆက်သွယ်ခဲ့ပေမယ့် ဆက်သွယ်လို့မရပါဘူး။

ဇန်နဝါရီလ ၁၉ ရက်နေ့ကလည်း ရခိုင်ပြည်နယ်၊ သံတွဲမြို့နယ်၊ ငပလီကမ်းခြေမှာ စစ်ကောင်စီဥက္ကဋ္ဌနဲ့ ထိုင်းကာကွယ်ရေးဦးစီးချုပ် ဗိုလ်ချုပ်ကြီး ချလမ်ပိုလ် ဆရီဆဝဒ်နဲ့ တွေ့ဆုံခဲ့ပြီး (၈) ကြိမ်မြောက် ထိုင်း-မြန်မာ နှစ်နိုင်ငံ စစ်ဘက်ဆိုင်ရာ အဆင့်မြင့် အရာရှိကြီးများ ကော်မတီအစည်းအဝေးကို သုံးရက်ကြာ ကျင်းပခဲ့ပါတယ်။