ဂျပန်အထူးကိုယ်စားလှယ် တိုင်းရင်းသားလက်နက်ကိုင် ခေါင်းဆောင်အချို့နှင့် တွေ့ဆုံ

"လူသားချင်းစာနာမှုဆိုင်ရာ အထောက်အကူတွေပေးရင်းနဲ့ ငြိမ်းချမ်းရေးဆွေးနွေးဖို့ကိစ္စတွေကို ချဉ်းကပ်လိမ့်မယ်လို့ ယူဆရတာပေါ့”

တိုင်းရင်းသား လက်နက်ကိုင် ခေါင်းဆောင်တချို့ကတော့ စစ်အာဏာသိမ်းပြီးနောက်ပိုင်း ရပ်တန့်နေတဲ့ ငြိမ်းချမ်းရေးဆွေးနွေးပွဲတွေ ဖြစ်လာဖို့ အခုလို လာရောက်တွေ့ဆုံတာ ဖြစ်နိုင်တယ်လို့ သုံးသပ်ကြပါတယ်။

စစ်ကောင်စီဟာ ဒီနှစ်ကုန်အထိ အပစ်အခတ်ရပ်စဲထားပြီး ငြိမ်းချမ်းရေးဆွေးနွေးဖို့ ဖိတ်ခေါ်ထားပေမယ့် တိုင်းရင်းသား လက်နက်ကိုင်အများစုကတော့ ဒီဖိတ်ခေါ်ချက်ကို အယုံအကြည်မရှိဘူးလို့ တုံ့ပြန်ထားကြပါတယ်။

မစ္စတာ ဆာဆာကာဝါဟာ စစ်ကောင်စီအတွက် ပွဲစားလာလုပ်တာဆိုရင်တော့ အောင်မြင်မှုရမှာ မဟုတ်ဘူးလို့ ပြည်ထောင်စုလွှတ်တော် ကိုယ်စားပြုကော်မတီ(CRPH) ဥက္ကဋ္ဌ ဦးအောင်ကြည်ညွန့် က ပြောပါတယ်။

“လက်ရှိအခြေအနေမှာ ဒီလမ်းကြောင်းက ထွက်ပေါက်မရှိဘူး။ စစ်ကောင်စီက အခုသွားနေတဲ့ ရွေးကောက်ပွဲနဲ့ပဲ သွားရမယ်ဆိုတဲ့နည်းနဲ့ လာပြီး ပွဲစားလုပ်တဲ့ကိစ္စဟာ အောင်မြင်မယ့် လုပ်ရပ် မဟုတ်ဘူး။ ပြည်သူတွေရဲ့ ဆန္ဒနဲ့လည်း မကိုက်ညီဘူး။ ဘယ်လိုနည်းနဲ့မှ တရား မျှတတဲ့ အနေအထားမျိုး မရှိနိုင်လောက် အောင် ရက်စက်ကြမ်းကြုတ်မှုတွေ၊ ဖိနှိပ်မှုတွေနဲ့ ပြည်သူတစ်ရပ်လုံးကို ဒုက္ခပေးနေတဲ့ လက်နက်ကိုင် အကြမ်းဖက်အုပ်စုက လုပ်ပေးနိုင် ပါတယ်ဆိုတဲ့ ရွေးကောက်ပွဲဟာ မြန်မာနိုင်ငံအတွက် တကယ်လိုလားတဲ့ ထွက်ပေါက်တစ်ခု မဟုတ်ဘူးလို့ မြင်တယ်”

ပြီးခဲ့တဲ့ မတ်လ ၇ ရက်နေ့မှာပဲ မစ္စတာ ဆာဆာကာဝါဟာ ကမ္ဘောဒီးယားနိုင်ငံ ဖနွမ်းပင်မြို့မှာ အာဆီယံဥက္ကဋ္ဌ ကမ္ဘောဒီးယားဝန်ကြီးချုပ် မစ္စတာ ဟွန်ဆန်၊ မြန်မာနိုင်ငံဆိုင်ရာ အာဆီယံ အထူးကိုယ်စားလှယ်ဖြစ်တဲ့ ကမ္ဘောဒီးယား နိုင်ငံခြားရေးဝန်ကြီး ပရက်ဆော့ခွန်းတို့နဲ့ တွေ့ဆုံခဲ့ပါတယ်။

အဲဒီ တွေ့ဆုံမှုအတွင်း ကမ္ဘောဒီးယားဝန်ကြီးချုပ်က မြန်မာ့အရေး ဖြေရှင်းတဲ့နေရာမှာ မစ္စတာ ဆာဆာကာဝါ အနေနဲ့ အာဆီယံအထူး ကိုယ်စားလှယ်ကို ကူညီပေးဖို့ ပြောဆိုခဲ့ပါတယ်။

နိုင်ငံရေးလေ့လာသုံးသပ်သူ ဦးရဲထွန်းကလည်း မစ္စတာ ဆာဆာကာဝါအနေနဲ့ တိုင်းရင်းသား လက်နက်ကိုင် အဖွဲ့အစည်းတွေနဲ့ လာရောက်ဆွေးနွေးတာဟာ အာဆီယံအထူးကိုယ်စားလှယ်နဲ့ ညှိနှိုင်းဆောင်ရွက်တာ ဖြစ်နိုင်တယ်လို့ သုံးသပ်ပါတယ်။

“ဆာဆာကာဝါကို အခု အာဆီယံဥက္ကဋ္ဌ ကမ္ဘောဒီးယားနိုင်ငံဝန်ကြီးချုပ်ကိုယ်တိုင်က သူ့ရဲ့ အာဆီယံကလွှတ်မယ့် မြန်မာကိုယ်စားလှယ်ကို ကူညီပေးဖို့ဆိုပြီးတော့ အကူအညီတောင်း ထားတာရှိတယ်။ ဆိုတော့ သူတို့ နှစ်ယောက်ပူးပေါင်းအကြံဉာဏ်ထုတ်ပြီးတော့ မြန်မာနိုင်ငံ အရေးကိစ္စ ဝင်ပြီးဆောင်ရွက်ဖို့ဆိုတဲ့ဟာ အဲဒါ သူတို့ အဓိက တာဝန်ရှိနေတယ်။ လူသားချင်း စာနာမှုဆိုင်ရာ အထောက်အကူတွေပေးရင်းနဲ့ ငြိမ်းချမ်းရေးဆွေးနွေးဖို့ကိစ္စတွေကို ချဉ်းကပ်လိမ့်မယ်လို့ ယူဆရတာပေါ့”