ထိုင်းတောင်ပိုင်းကို လှေတွေနဲ့ ဝင်လာတဲ့ ရိုဟင်ဂျာ ထောင်ဂဏန်းနီးပါးရှိလာနေ

ထိုင်းနိုင်ငံတောင်ပိုင်း Phra Thong ဖရာသွန်ကျွန်းကို မနေ့ကလှေတွေနဲ့ ဝင်ရောက်လာသူ ၈၈ယောက်ဟာ မိမိတို့ ရိုဟင်ဂျာတွေဖြစ်ပါတယ်လို့ ထိုင်းလူဝင်မှုကြီးကြပ်ရေးအဖွဲ့ထံမှာ ပြောဆိုခဲ့ပါတယ်။

အလားတူ မုတ္တမပင်လယ်ကွေ့ထဲက ထိုင်းနိုင်ငံပိုင်ကျွန်းတစ်ခုကို နောက်ထပ် ၄၈ယောက် ဝင်ရောက်လာတယ်လို့ သိရပါတယ်။ သူတို့အားလုံးကို ထိုင်းလူဝင်မှုကြီးကြပ်ရေးက မြန်မာနိုင်ငံဖက် ပြန်ပို့ရေးအတွက် စစ်ဆေးမှုတွေလုပ်နေပါတယ်။

အလားတူ ပြီးခဲ့တဲ့ သီတင်းပတ်အတွင်းကလည်း ထိုင်းတောင်ပိုင်းကို ဝင်ရောက်လာတဲ့ ရိုဟင်ဂျာ ဦးရေ ၈၅၀ကျော်ရှိခဲ့ပြီး သူတို့ဟာ ထိုင်းနဲ့ မလေးရှားနယ်စပ် ရော်ဘာခြံတွေထဲမှာ ပုန်းအောင်းနေခဲ့ရာမှာ ထိုင်းအာဏာပိုင်တွေက ဖမ်းဆီးတာဖြစ်ပါတယ်။

သူတို့အားလုံးကို တွေ့ခွင့်ရဖို့အတွက် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး UNHCR က ထိုင်းအစိုးရထံ ခွင့်တောင်းရာမှာ ထိုင်းအစိုးရက မနေ့က ဇန်နဝါရီလ ၁၆ရက်နေ့မှာ ခွင့်ပြုခဲ့ပါတယ်။