ရိုဟင်ဂျာဒုက္ခသည်တွေအတွက် ဘေးကင်းဇုန်ထားရှိပေးဖို့ ဘင်္ဂလားဒေ့ရှ် တောင်းဆို

ရခိုင်ပြည်နယ်က ရိုဟင်ဂျာဒုက္ခသည်တွေအတွက် ကုလသမဂ္ဂက ဘေးကင်းဇုန်တစ်ခု သတ်မှတ်ထားရှိပေးဖို့ ဘင်္ဂလားဒေ့ရှ် ကြားဖြတ်အစိုးရခေါင်းဆောင် နိုဘယ်ငြိမ်းချမ်းရေးဆုရှင် မိုဟာမက် ယူနွတ်က တောင်းဆိုလိုက်ကြောင်း ဘင်္ဂလားဒေ့ရှ် အခြေစိုက် Dhaka Tribune သတင်းမှာ အောက်တိုဘာ ၁၄ ရက်နေ့က ဖော်ပြပါတယ်။

မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေး အထူးကိုယ်စားလှယ် မစ္စတာ တွမ်အင်ဒရူးရဲ့ ဒါကာအခြေစိုက်ရုံးမှာ နှစ်ဦးတွေ့ဆုံချိန် ယူနွတ်က အခုလို တောင်းဆိုခဲ့တာလို့ ဆိုပါတယ်။

ဒါဟာ ရိုဟင်ဂျာဒုက္ခသည်တွေကို ထောက်ပံ့ကူညီရေး နည်းလမ်းတွေရှာဖွေဖို့နဲ့ အကူအညီတွေ ရရှိဖို့အတွက် အကောင်းဆုံးဖြစ်တယ်လို့ ယူနွတ်က ပြောပါတယ်။

ဒီ့အပြင် ရခိုင်ပြည်နယ်က ပဋိပက္ခကို ဖြေရှင်းဖို့အတွက် အကောင်းဆုံးစတင်ခြင်းဖြစ်ပြီး ဘင်္ဂလားဒေ့ရှ်နိုင်ငံကို ထောင်နဲ့ချီတဲ့ ဒုက္ခသည်အသစ်တွေ ဝင်ရောက်လာတာကိုလည်း တားဆီးပေးနိုင်လိမ့်မယ်လို့ ဆိုပါတယ်။

တွမ်အင်ဒရူးဟာ ယူနွတ်ရဲ့ ရိုဟင်ဂျာအရေး အဆိုပြုချက်တွေအပေါ် ကျေးဇူးတင်ရှိကြောင်း ပြောကြားခဲ့ပြီး ရိုဟင်ဂျာ အပါအဝင် ဒုက္ခသည်တွေအတွက် လူသားချင်းစာနာမှု အကူအညီတွေအရေးပေါ် လိုအပ်နေကြောင်းလည်း ပြောကြားခဲ့တယ်လို့ ဖော်ပြပါတယ်။

တွမ်အင်ဒရူးနဲ့ တွေ့ဆုံရာမှာ ရခိုင်ပြည်နယ်က အကြမ်းဖက်မှုတွေနဲ့ ရိုဟင်ဂျာဒုက္ခသည် အရေးအပေါ် အာဆီယံ အပါအဝင် နိုင်ငံတကာအသိုင်းအဝိုင်းနဲ့ ဆွေးနွေးညှိနှိုင်းကြဖို့ ယူနွတ်က အကြုံပြုခဲ့တယ်လို့ ဆိုပါတယ်။ ဒါ့အပြင် ထောင်နဲ့ချီတဲ့ ရိုဟင်ဂျာ ဒုက္ခသည်တွေကို တတိယနိုင်ငံကို ရွှေ့ပြောင်းဖို့အတွက်လည်း ယူနွတ်က တွမ်အင်ဒရူးနဲ့ ဆွေးနွေးခဲ့တယ်လို့ ဖော်ပြပါတယ်။

အခုလဆန်းပိုင်းကလည်း ဘင်္ဂလားဒေ့ရှ်နိုင်ငံ မြို့တော်ဒါကာကို အလည်အပတ်ရောက်နေတဲ့ မလေးရှား ဝန်ကြီးချုပ် အန်ဝါအီဘရာဟင်နဲ့ တွေ့ဆုံစဉ်မှာ မြန်မာရိုဟင်ဂျာဒုက္ခသည်တွေ နေရပ်ပြန်ရေးအတွက် မလေးရှားအစိုးရက ကူညီဆောင်ရွက်ပေးဖို့ ယူနွတ်က တောင်းဆိုခဲ့ပါတယ်။

မြန်မာစစ်တပ်ရဲ့ အကြမ်းဖက်မှုတွေကြောင့် ထွက်ပြေးလာတဲ့ ရိုဟင်ဂျာဒုက္ခသည် တစ်သန်းကို ဘင်္ဂလားဒေ့ရှ်က လက်ခံထားပါတယ်။ ဒီဒုက္ခသည်တွေဟာ ဘင်္ဂလားဒေ့ရှ်နိုင်ငံက စခန်းတွေမှာ ငတ်မွတ်ခေါင်းပါးစွာ နေထိုင်နေရပြီး နေရပ်မြန်မာနိုင်ငံကို ဘေးကင်းလုံခြုံစွာ ပြန်နိုင်ရေး တောင်းဆိုနေကြတာ ကြာမြင့်နေပြီ ဖြစ်ပါတယ်။