ပြင်ဦးလွင်-နောင်ချိုလမ်းပိုင်းကို စစ်ကောင်စီတပ် စစ်ကြောင်းထိုး

မန္တလေးတိုင်း၊ ပြင်ဦးလွင်မြို့နယ်နဲ့ ရှမ်းပြည်နယ်မြောက်ပိုင်း နောင်ချိုမြို့အစပ်က ရွာတွေကို အောက်တိုဘာလ ၂၀ ရက်နေ့ကစလို့ စစ်ကောင်စီတပ်က စစ်ကြောင်းထိုးနေပြီး ခရီးသွားလာခွင့်ကိုလည်း ကန့်သတ်ထားတယ်လို့ ဒေသခံတွေက ပြောပါတယ်။

နောင်ချိုမြို့နယ် ဂန့်ကော်ရွာ၊ အုမ္မသီးကျေးရွာ လမ်းခွဲနေရာအထိ စစ်ကောင်စီတပ်က စစ်ကြောင်းထိုးလာတာကြောင့် တအာင်းအမျိုးသားလွတ်မြောက်ရေးတပ်မတော် (TNLA)၊ မန္တလေးတိုင်း ပြည်သူ့ကာကွယ်ရေးတပ်ဖွဲ့ (MDY-PDF) တို့နဲ့လည်း စစ်ရေးတင်းမာနေတယ်လို့ နောင်ချိုဒေသခံတစ်ဦးက RFA ကို ပြောပါတယ်။

"စစ်တပ်ဘက်က စစ်ကြောင်းပြန်ထိုးလာတယ်။ သေနတ်သံတွေလည်း ကြားရတယ်။ အုမ္မသီးလမ်းခွဲနေရာကို ပြန်ရချင်တဲ့သဘောလို့ ပြောလို့ရတယ်။ ခရီးသည်ကားတွေကို ပိတ်ထားပြီ။ ပေးမသွားတော့ဘူး။ အစက သီတင်းကျွတ် ငါးရက် ဖွင့်ပေးမယ်ဆိုပြီး သတင်းတွေထွက်နေတာ။ အခုမရတော့ဘူး"

မန္တလေးနဲ့ ပြင်ဦးလွင်ကနေ နောင်ချို၊ သီပေါ၊ မိုးကုတ်၊ လားရှိုးမြို့တွေကိုသွားတဲ့ကားတွေကို ပြင်ဦးလွင်-နောင်ချိုလမ်းပေါ်မှာရှိတဲ့ ဝက်ဝံရွာစစ်ဆေးရေးဂိတ်ကနေ စစ်ကောင်စီတပ်က ပိတ်ဆို့ထားတယ်လို့လည်း အဲဒီလမ်းမှာ ခရီးသွားနေတဲ့ ခရီးသည်တချို့က ပြောပါတယ်။

ဒီအခြေအနေတွေနဲ့ ပတ်သက်လို့ စစ်ကောင်စီရဲ့ ရှမ်းပြည်နယ်ပြောခွင့်ရသူ ပြည်နယ်စီးပွားရေးဝန်ကြီး ဦးခွန်သိန်းမောင်နဲ့ TNLA ပြောခွင့်ရသူ လွေးယေဦးတို့ကို RFA က ဆက်သွယ်ခဲ့ပေမဲ့ လက်ခံဖြေဆိုတာ မရှိသေးပါဘူး။

ပြင်ဦးလွင်-နောင်ချိုလမ်းပေါ်မှာရှိတဲ့ အုမ္မသီးလမ်းခွဲဟာ ရှမ်းပြည်နယ်မြောက်ပိုင်းနဲ့ မန္တလေးတိုင်း မိုးကုတ်၊ မတ္တရာ၊ သပိတ်ကျင်းမြို့တွေကို အဓိက ဆက်သွယ်ထားတဲ့လမ်းကြောင်း ဖြစ်ပါတယ်။

ဒါ့ကြောင့် စစ်ကောင်စီတပ်က စစ်ကြောင်းတွေ ထပ်တိုးလာရင် တိုက်ပွဲတွေ ပိုပြီးပြင်းထန်လာနိုင်တယ်လို့ နောင်ချိုဒေသခံတွေက ပြောပါတယ်။

၁၀၂၇ စစ်ဆင်ရေး ဒုတိယလှိုင်း ကာလအတွင်းမှာ နောင်ချိုမြို့ကို TNLA၊ MDY-PDF၊ ဓနု-PDF ပူးပေါင်းအဖွဲ့ တွေက သိမ်းပိုက်ထားပြီး နောင်ချိုမြို့နဲ့ မိုင်နှစ်ဆယ်ကျော်အကွာ တောင်ခမ်းရွာ စစ်ကောင်စီအမြောက်တပ်တွေ အနီးမှာတော့ အောက်တိုဘာလ ၂၀ ရက်နေ့အထိ တိုက်ပွဲတွေ ဆက်ဖြစ်နေပါတယ်။

စစ်ကောင်စီတပ်က နောင်ချိုမြို့ကို ပြန်ရရေးအတွက် ရှမ်းပြည်နယ်တောင်ပိုင်းနဲ့ ပြင်ဦလွင်မြို့နယ်တွေဘက်ကနေ စစ်ကြောင်း နှစ်ကြောင်းခွဲပြီး ပြန်လည် ထိုးစစ်ဆင်နေတာ ဒေသခံတွေက ပြောပါတယ်။