စစ်အစိုးရကို လိုလားသော ပါတီများမှ ကိုယ်စားလှယ်လောင်းများ အပယ်ခံရ

ပယ်ချခံလိုက်ရတဲ့ ကိုယ်စားလှယ်လောင်းတွေကတော့ ပြည်ထောင်စု ကြံ့ခိုင်ဖွံ့ဖြိုးရေးပါတီ ကိုယ်စားပြုပြီး ဟားခါးမြို့နယ်ကနေ ဝင်ရောက် ယှဉ်ပြိုင်ဖို့ ပြင်ထားတဲ့ ဦးဆန်ကြိုးနဲ့ ထန်းတလန်မြို့ကနေ ကိုယ်စားလှယ်အမည် တင်သွင်းထားတဲ့ ဦးငွန်ဆန်းတို့ ဖြစ်ကြပြီး ဖလမ်းမြို့နယ်ကနေ အရွေးချယ်ခံဖို့ စီစဉ်ထားတဲ့ တိုင်းရင်းသား စည်းလုံးညီညွတ်ရေးပါတီ (တစည) က ဦးထန်ကျင်တို့ ဖြစ်ပါတယ်။

ခုလို အပယ်ခံလိုက်ရတဲ့ အကြောင်းကြားစာကို ရွေးကောက်ပွဲ ကော်မရှင်ကနေ ပြီးခဲ့တဲ့ သီတင်းပတ်ထဲမှာ ကြေးနန်းနဲ့ ပေးပို့လာတာ ဖြစ်တယ်လို့ ပြောပြလာသူကတော့ ချင်းပြည်နယ် အမျိုးသား ဒီမိုကရေစီအဖွဲ့ချုပ်ရဲ့ စည်းရုံးရေးမှူး ဥက္ကဋ္ဌ ဦးပန်လျှန်း ဖြစ်ပါတယ်။

“သူတို့ နှစ်ယောက်က နိုင်ငံခြားသွားဘူးတယ်၊ အဲဒါ ကိစ္စနဲ့ များလား မပြောတတ်ဘူး၊ အခု ဦးငွန်းဆန်းက အယူခံတော့ နေပြည်တော်ကနေ ခေါ်ပြီးတော့ ဒီမနက်ပဲ နေပြည်တော်ကို ထွက်သွားတယ်၊ နောက်တယောက်တော့ ဟားခါးမှာပဲ၊ အယူခံတာတို့ ဘာတို့ မကြားဘူး၊ နောက်ပြီးတော့ ဖလမ်းမှာ တစည ထဲက တယောက် ထပ်ပယ်တယ်၊ ဦးထန်ကျင် ပြည်နယ်လွှတ်တော်မှာ အရွေးခံမည့်သူ၊ ကျနော်ထင်တာက သူက ပါစတာ လုပ်ဖူးတယ်၊ ခရစ်ယာန် တရားဟောဆရာ လုပ်ဖူးတယ်၊ လုပ်ဖူးတော့ အဲ့ဒီကိစ္စနဲ့ ပယ်တယ်လို့ ကြားတယ်၊ သူက အယူခံဝင်တာ မကြားဘူး။”

အသေးစိတ်သိရအောင် ဟားခါးမြို့နယ် ကြံ့ခိုင်ဖွံ့ဖြိုးရေးပါတီရုံးကို ဆက်သွယ်ခဲ့ရာမှာတော့ ဖုန်းလာကိုင်သူက သူ မသိရှိကြောင်း၊ ဖြေဆိုမဲ့သူ မရှိကြောင်းနဲ့ လူကြီးတွေကိုသာ မေးမြန်းဖို့ ပြောသွားပါတယ်။