သမ္မတ ဦးသိန်းစိန် ဟားခါးမြို့က ချင်းအမျိုးသားနေ့ တက်ရောက်

ဒီနေ့ကျရောက်တဲ့ ၆၇ နှစ်မြောက် ချင်းအမျိုးသားနေ့ကို ချင်းပြည်နယ် ဟားခါးမြို့ ဝမ္မသူးမောင်အားကစားကွင်း မှာ ကျင်းပခဲ့ပြီး နိုင်ငံတော် သမ္မတ ဦးသိန်းစိန် တက်ရောက်ခဲ့ပါတယ်။

ချင်းအမျိုးသားနေ့ အထိမ်းအမှတ်အဖြစ် မဟာဓာတ် အားလိုင်းနဲ့ဟားခါးဆေးရုံရဲ့ နှစ်ထပ်ခွဲစိတ်ဆောင်ကို ဖွင့်လှစ်နိုင်ခဲ့တယ်လို့ ချင်းပြည်နယ်သစ်တောရေးရာ ဝန်ကြီး ဦးကျော်ငြိမ်းက ပြောပါတယ်။

"ဒီနေ့ကတော့ ချင်းအမျိုးသားနေ့ပဲ၊ ၆၇ နှစ်မြောက် အထိမ်းအမှတ်နေ့ တစ်နေ့ပေါ့ ၊ နောက်တစ်ခါ မဟာဓါတ်အားလိုင်း အထိမ်း အမှတ်လည်းပဲရှိတယ်၊ အဲ့ဒါရတာ အထိမ်းအမှတ် ရယ်၊ နောက် ဆေးရုံမှာလည်း ခွဲစိတ်ဆောင်တွေ ဖွင့်ဖို့ရှိတယ်၊ "

မဟာဓာတ်အားလိုင်းကြောင့် ပြီးခဲ့တဲ့ ၂ဝ၁၄ ဇူလိုင်လကတည်းက ဟားခါးမြို့မှာ ၂၄ နာရီ လျပ်စစ်မီးရရှိနေပြီ လို့ ပြောပါတယ်။

အလားတူ ချင်းအမျိုးသားနေ့ အခမ်းအနားကို ကချင်ပြည်နယ် မြစ်ကြီးနားမြို့ စီတာပူရပ်ကွက်က ချင်းနှစ်ခြင်း အသင်းတော်ခန်းမမှာလည်း ကျင်းပခဲ့ပါတယ်။

၆၇ နှစ်မြောက် ချင်းအမျိုးသားနေ့ အခမ်းအနားတွေကို ချင်းပြည်နယ်မှာအပြင် ရန်ကုန်၊ နေပြည်တော်စတဲ့ မြို့ကြီးတွေမှာလည်း ကျင်းပနေပါတယ်။