ဖားကန့် မြေပြိုမှု ၃ ဦးသေ၊ ၇ ဦး ဒဏ်ရာရ

ကချင်ပြည်နယ်၊ ဖားကန့်မှာ မနေ့ညနေ ၄ နာရီလောက်က ပုဂ္ဂလိက မှော်လုပ်ကွက်ဟောင်းတစ်ခုမှာ ရေမဆေးကျောက်ရှာဖွေနေတဲ့ လုပ်သားတွေ မြေတူးနေရင်း တွင်းပြိုကျမှုကြောင့် ၃ ဦး သေဆုံးခဲ့ပြီး ၇ ဦးခန့် ဒဏ်ရာရရှိခဲ့တယ်လို့ သိရပါတယ်။ 

ဒီဖြစ်စဉ်နဲ့ ပတ်သက်လို့ မျက်မြင်တစ်ဦးဖြစ်သူ ဦးဇော်မိုးထက်က RFA ကို အခုလို ပြောပါတယ်။

"ဒီမှာက ဒေသခံပြည်သူတွေ သူတို့ဘာသာသူတို့ လက်လုပ်ကျင်းလေးတွေပေါ့၊ သံတိုင်လေးတွေနဲ့ လုပ်ကွက်ဟောင်းတွေထဲမှာ တူးဖော်ပြီး လုပ်ကိုင်စားသောက်ကြတဲ့အချိန်မှာ မိုးရွာတော့ မြေသားတွေမခိုင်တော့ မြေပြိုပြီးတော့ မြေပိတာပေါ့၊ ၃ ယောက်ကတော့ မြေကြီးထဲကနေဖော်တာ ပွဲချင်းပြီး ဆုံးသွားတယ်ပေါ့"

ဒီလိုမြေပြိုကျမှု ဖြစ်စဉ်တွေဟာ အခုနှစ်ထဲမှာဆိုရင် သုံးကြိမ်လောက် ရှိသွားပြီလို့ သိရပါတယ်။ အခုဖြစ်စဉ်ကြောင့် ဒဏ်ရာရရှိခဲ့တဲ့သူတွေကို ဖားကန့်ဆေးရုံမှာ ဆေးဝါးကုသမှု ခံယူနေတယ်လို့ ဦးဇော်မိုးထက်က ပြောပါတယ်။

လုပ်ကွက်တွေမှာ ရေမဆေးကျောက်ရှာဖွေပြီး လုပ်ကိုင်စားသောက်နေသူတွေကို အာဏာပိုင်တွေ တားမြစ်ထားပေမယ့် တပိုင်တနိုင် ရေမဆေး ကျောက်ရှာသူတွေကတော့ ဝမ်းရေးအတွက် ဆက်လက်ရှာဖွေ လုပ်ကိုင်နေကြဆဲဖြစ်တယ်လို့ ဒေသခံတွေက ပြောပါတယ်။