ဒီမိုကရေစီအင်အားစုနဲ့ နီးစပ်အောင် တပ်မတော် ကြိုးစားလာပြီလို့ သူရဦးတင်ဦးပြော

တပ်မတော်ဟာ ပျော့ပြောင်းညင်သာတဲ့ လမ်းကို ပြောင်းလဲလာနေပြီဖြစ်ပြီး ဒီမိုကရေစီအင်အားစုဘက်ကို နီးစပ်အောင် ကြိုးစားလာပြီဖြစ်ကြောင်း အမျိုးသားဒီမိုကရေစီအဖွဲ့ချုပ်ပါတီ နာယက သူရဦးတင်ဦး က ပြောပါတယ်။

ဒီနေ့ ရန်ကုန်မြို့ ရွှေဂုံတိုင်က အမျိုးသားဒီမိုကရေစီအဖွဲ့ချုပ် ရုံးချုပ်မှာ ကျင်းပတဲ့ ၇၂ နှစ်မြောက် ဖက်ဆစ်တော် လှန်ရေးနေ့ အခမ်းအနားမှာ ပါတီနာယက သူရဦးတင်ဦး က ပြောခဲ့တာဖြစ်ပါတယ်။

"တပ်မတော်နေ့ သဘောထားကြေညာချက်ထဲမှာ ရှေ့သို့လည်းပဲ လက်ရှိ ရှိနေတဲ့ အစိုးရအဖွဲ့အစည်းနဲ့တကွ နောက်ဒီမိုကရေစီနည်းအရတက်လာမယ့် အဖွဲ့အစည်းများအားလုံးကို သူတို့ဟာ အစဉ်လေးစားလိုက်နာစွာဖြင့် အောင်မြင်စွာ ပူးပေါင်းဆောင်ရွက်မယ်ဆိုတဲ့ သဘောထားရဲ့ သဘောတူညီချက် သဘောမျိုးတွေကို အခု သူတို့ပြောလာတဲ့ အခြေအနေရောက်လာတာကို ကျနော်တို့တွေ့မြင်ရတာဖြစ်ပါတယ်"