တရုတ် ကယ်ဆယ်ရေးအဖွဲတွေရဲ့ လုံခြုံရေးကို အာမခံဖို့ တရုတ်အစိုးရပြော

ငလျင်ဘေးအတွက် မြန်မာနိုင်ငံကိုလာတဲ့ တရုတ် ကယ်ဆယ်ရေးအဖွဲ့တွေနဲ့ ကယ်ဆယ်ရေး ပစ္စည်းတွေရဲ့ လုံခြုံရေးကို အာမခံချက်ပေးဖို့ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mr. Guo Jiakun က ဧပြီလ ၂ရက်မှာ ပြောဆိုလိုက်ပါတယ်။

ငလျင်ဘေး ကယ်ဆယ်ရေးပစ္စည်းတွေပါတဲ့ တရုတ်ကြက်ခြေနီယာဉ်တန်းဟာ ဧပြီလ ၁ရက်နေ ညပိုင်းက ရှမ်းပြည်နယ်မြောက်ပိုင်း နောင်ချိုမြို့နယ် အုမ္မတီးရွာအနီး သေနတ်နဲ့ ပစ်ခတ်ခံရပြီးနောက် ဧပြီလ ၂ရက်မှာ အခုလိုပြောလိုက်တာပါ။

တရုတ်နိုင်ငံအနေနဲ့ မြန်မာနိုင်ငံမှာ ငလျင်ကယ်ရေးလုပ်ငန်းတွေ အင်တိုက်အားတိုက် လုပ်ဆောင်နေပြီး တရုတ်ကြက်ခြေနီအသင်းက ပေးပို့ခဲ့တဲ့ သဘာဝဘေး ကယ်ဆယ်ရေး ပစ္စည်းတွေလည်း မန္တလေးကို ပို့ဆောင်နေတယ်လို့ တရုတ်နိုင်ငံခြားရေးဝန်ကြီးဌာန ပြောခွင့်ရသူက ပြောပါတယ်။

ကြီးမားတဲ့ကပ်ဘေးကြီး ရင်ဆိုင်ရတဲ့အခါ လူ့အသက်တွေဟာ အရေးကြီးဆုံးဖြစ်လို့ လက်ရှိဦးစားပေးရမဲ့ကိစ္စဟာ ငလျင်ဘေး ကယ်ဆယ်ရေး ဖြစ်တယ်လို့ ဆိုပါတယ်။

စစ်ကောင်စီကတော့ တရုတ်ကြက်ခြေနီယာဉ်တန်းကို သူတို့ သေနတ်နဲ့ပစ်ခတ် တားဆီး ခဲ့တယ်ဆိုတာကို ဧပြီလ ၂ရက်နေ့ မနက်ပိုင်းမှာ ဝန်ခံခဲ့ပါတယ်။

တရုတ်-မြန်မာ နယ်စပ်ကနေတဆင့် ဝင်လာတဲ့ တရုတ်ကြက်ခြေနီယာဉ်တန်းဟာ စစ်ကောင်စီကို ကြိုတင်အကြောင်းကြားတာ မရှိတဲ့အတွက် သေနတ်နဲ့ မိုးပေါ်ထောင်ပစ်ပြီး တားဆီးခဲ့တာလို့ စစ်ကောင်စီ ပြောခွင့်ရသူ ဗိုလ်ချုပ်ဇော်မင်းထွန်းက ပြောဆိုခဲ့ပါတယ်။