ထွက်ပြေးလာတဲ့ စစ်ကောင်စီတပ်ဖွဲ့ဝင် ၃ဝဝ ကျော်ကို တရုတ်ပြန်ပို့

ကချင်ပြည်နယ် ဝိုင်းမော်မြို့နယ် အထူးဒေသ (၁) က ကန်ပိုက်တီမြို့သိမ်းတိုက်ပွဲမှာ တရုတ်နိုင်ငံထဲ ထွက်ပြေးသွားတဲ့ စစ်ကောင်စီ တပ်ဖွဲ့ဝင် ၃ဝဝ ကျော်ကို တရုတ်အာဏာပိုင်တွေက ရှမ်းပြည်နယ်မြောက်ပိုင်း မူဆယ်မြို့က စစ်ကောင်စီထံ နိုဝင်ဘာ ၂၃ ရက်ညမှာ ပြန်လွှဲပြောင်းပေးလိုက်ပါတယ်။

တရုတ်အစိုးရက စစ်ကောင်စီတပ်ဖွဲ့ဝင် ၃ဝ၂ ဦးကို မူဆယ်မြို့ကို ပြန်ပို့ချိန်မှာ စစ်ကောင်စီ တပ်မ ၉၉ တပ်မမှူး က လက်ခံခဲ့တယ်လို့ စစ်ရေးသတင်းရင်းမြစ်တစ်ဦးက RFA ကို ပြောပါတယ်။ အွန်လိုင်းမှာ ပျံ့နှံ့လာတဲ့ ဗီဒီယိုတွေအရ တရုတ်စစ်တပ်ဘက်က လုံခြုံရေးအပြည့်နဲ့ စစ်ကောင်စီတပ်ဖွဲ့ဝင်တွေကို ပြန်လွှဲပြောင်းပေးခဲ့တာ တွေ့ရပါတယ်။ 

ဒီအခြေအနေကို စစ်ကောင်စီဘက်က သတင်းထုတ်ပြန်တာ မတွေ့ရသေးပါဘူး။ စစ်ကောင်စီပြောခွင့်ရှိသူ ဗိုလ်ချုပ်ဇော်မင်းထွန်းကို RFA က တယ်လီဖုန်းနဲ့ ဆက်သွယ်ပေမဲ့လည်း ဖုန်းမဖြေပါဘူး။

တရုတ်နယ်စပ်ကုန်သွယ်ရေးမြို့ ဖြစ်တဲ့ ကန်ပိုက်တီမြို့ကို ကချင်အမျိုးသားလွတ်မြောက်ရေးတပ်မတော် (KIA) နဲ့ ပူးပေါင်းတပ်တွေ နိုဝင်ဘာ ၂ဝ ရက်နေ့က သိမ်းယူခဲ့တာပါ။

ကန်ပိုက်တီမြို့ကို နိုဝင်ဘာ ၂ဝရက်နေ့မနက်အစောကတည်းက KIA နဲ့ ပူးပေါင်းအဖွဲ့တွေ ထိုးစစ်ဆင်တိုက်ခိုက်ပြီး ညပိုင်းမှာ အပြီးသတ်သိမ်းယူခဲ့တာဖြစ်ပါတယ်။ လက်ရှိ မူဆယ်မြို့ကိုတော့ စစ်ကောင်စီ ထိန်းချုပ်ထားဆဲဖြစ်ပြီး အခုချိန်မှာတော့ စစ်ရေးငြိမ်သက်နေတယ်လို့လည်း စစ်ရေးသတင်းရင်းမြစ်တစ်ဦးက ပြောပါတယ်။