AA တိုက်ခိုက်မှုကို ကန့်ကွက်ရှုတ်ချ

ဇန်နဝါရီလ ၄ ရက်နေ့ ၇၁ နှစ်မြောက် လွတ်လပ်ရေးနေ့မှာ ရခိုင်ပြည်နယ်၊ ဘူးသီးတောင် မြို့နယ်အတွင်းက နယ်ခြားစောင့်ရဲကင်းစခန်း ၄ ခုကို ရက္ခိုင့်တပ်မတော် AA က ဝင်ရောက် တိုက်ခိုက်ခဲ့တာကို ကန့်ကွက်ရှုတ်ချကြောင်း လူ့အခွင့်အရေးကော်မရှင်နဲ့ မဘသ အဖွဲ့က ကြေညာချက် ထုတ်ပြန်လိုက်ပါတယ်။

AA က ရဲကင်းစခန်းတွေကို အင်အားသုံးတိုက်ခိုက်ခဲ့မှုကြောင့် တပ်မတော်ဘက်က ပြန်လည်ခုခံရာမှာ နှစ်ဖက်တိုက်ပွဲတွေဖြစ်ခဲ့ပြီး ဒေသခံတွေ ထိခိုက်ဒဏ်ရာရတာတွေ၊ ကျွဲနွားတိရိစ္ဆာန်တွေ သေကြေ ပျက်စီးတာတွေရှိခဲ့တဲ့အတွက် လူ့အခွင့်အရေးကော်မရှင်အနေနဲ့ ကန့်ကွက်ရတာဖြစ်တယ်လို့ ကော်မ ရှင်အဖွဲ့ဝင် ဦးယုလွင်အောင် က ပြောပါတယ်။

အစိုးရက ရခိုင်ပြည်နယ် တည်ငြိမ်အေးချမ်းရေး ကြိုးပမ်းဆောင်ရွက်နေချိန်မှာ AA က အခုလိုအကြမ်း ဖက်လုပ်ရပ်တွေ လုပ်ခဲ့တဲ့အတွက် အခြေအနေတွေ ပိုရှုပ်ထွေးပြီး အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးလုပ်ငန်းစဉ်တွေ ထိခိုက်နိုင်တယ်လို့ လူ့အခွင့်အရေးကော်မရှင်က ဆိုပါတယ်။

အမျိုးဘာသာ သာသနာစောင့်ရှောက်ရေးအဖွဲ့ မဘသ ( အထက်မြန်မာပြည်) ကလည်း AA အဖွဲ့ အနေနဲ့ ရဲကင်းစခန်းတွေကို ဝင်ရောက်တိုက်ခိုက်တာဟာ တိုင်းရင်းသားစည်းလုံးညီညွတ်ရေးကို ထိခိုက်စေတယ်လို့ ပြောပါတယ်။

ဘူးသီးတောင်မြို့နယ်က ရဲတပ်ဖွဲ့ဝင်တချို့ဟာ ရွာသားတွေကို နှိပ်စက်ညှင်းပန်းမှုတွေရှိတာကြောင့် AA က သတိပေးတားမြစ်တာတွေရှိခဲ့ပြီး လိုက်နာမှုမရှိတာကြောင့် ရဲကင်းစခန်းတွေကို ဝင်ရောက် တိုက်ခိုက်ရတာဖြစ်တယ်လို့ AA ရဲ့ ပြန်ကြားရေးတာဝန်ခံ ခိုင်သုခက တုံ့ပြန်ပါတယ်။

ဒီသတင်းကို RFA သတင်းထောက် မဝေမာထွန်း ပေးပို့တာပါ။