မောင်တောမှာ အာဆာ (ARSA) တိုက်ခိုက်မှုတွေ ရှိနေကြောင်း AA ပြော

အာရက္ခတပ်တော် (AA) ထိန်းချုပ်ထားတဲ့ ရခိုင်ပြည်နယ် မောင်တောမြို့နယ်အတွင်းမှာ အာရကန် ရိုဟင်ဂျာ ကယ်တင်ရေးတပ် (ARSA) ရဲ့ တိုက်ခိုက်မှုတွေ ဆက်ရှိနေပြီး ဒီဇင်ဘာလ ၂၄ ရက်နေ့က အရပ်သားကားတစ်စီး တိုက်ခိုက်ခံရတာကြောင့် အမျိုးသမီး တစ်ဦး သေဆုံးတယ်လို့ AA က ထုတ်ပြန်ပါတယ်။

မောင်တောမြို့ ကြိမ်ချောင်းကနေ တောင်ပြိုမြို့ကို ဈေးသွားဝယ်တဲ့ အရပ်သားကားတစ်စီးကို ARSA တပ်ဖွဲ့ဝင် ၂၅ ဦးခန့်က ချုံခိုပစ်ခတ်တိုက်ခိုက်တာကြောင့် ကားပေါ်မှာပါလာတဲ့ စေတနာ့ဝန်ထမ်းအမျိုးသမီးနဲ့ ဈေးဝယ် အမျိုးသမီး စုစုပေါင်း ၁၆ ဦးထဲက တစ်ဦး သေဆုံးသွားပြီး ဒဏ်ရာရသူတချို့လည်း ရှိနေတယ်လို့ ဆိုပါတယ်။

ဒဏ်ရာရထားတဲ့ အမျိုးသမီးတွေကို ဆေးကုပေးပြီး တိုက်ခိုက်သွားတဲ့ ARSA တပ်ဖွဲ့ဝင်တွေကို လိုက်လံရှာဖွေနေတယ်လို့ AA က ပြောပါတယ်။

မောင်တောမြို့နယ်တစ်ခုလုံးကို ဒီဇင်ဘာလထဲမှာ AA က သိမ်းပိုက်ထိန်းချုပ်ထားပေမဲ့ ထွက်ပြေးလွတ်မြောက်နေတဲ့ စစ်ကောင်စီတပ်သားတွေနဲ့ အဲဒီဒေသအခြေစိုက် မွတ်စလင် လက်နက်ကိုင်အဖွဲ့အစည်းတွေရဲ့ တိုက်ခိုက်မှုတွေ ဆက်ရှိနေတာလို့ ဒေသခံတွေက ပြောပါတယ်။

အောက်တိုဘာလအတွင်းကလည်း တောင်ပြိုမြို့ကနေ စားသောက်ကုန်ပစ္စည်းတွေဝယ်ပြီး ပြန်လာတဲ့ အရပ်သားကားတစ်စီးကို ARSA အဖွဲ့က ပစ်ခတ်တိုက်ခိုက်ခဲ့တာကြောင့် အမျိုးသမီး တစ်ဦးသေဆုံးပြီး နောက်ထပ် လေးဦးဒဏ်ရာရခဲ့တယ်လို့ AA က ထုတ်ပြန်ထားပါတယ်။

ဒီအခြေအနေတွေနဲ့ ပတ်သက်လို့ ARSA အဖွဲ့ဘက်က တစ်စုံတစ်ရာ ထုတ်ပြန်ပြောဆိုလာတာ မတွေ့ရသေးပါဘူး။

ရခိုင်ပြည်နယ်မှာ ၁၇ မြို့နယ်ရှိတဲ့အနက် ရိုဟင်ဂျာတွေ အများဆုံးနေထိုင်တဲ့ ဘူးသီးတောင်နဲ့ မောင်တောမြို့နယ်အပါအဝင် မြို့နယ်ပေါင်း ၁၃ မြို့နယ်ကို အာရက္ခတပ်တော် (AA) က သိမ်းပိုက်ထိန်းချုပ်ထားပါတယ်။