မကွေးမီးဘေးအတွက် သမဂ္ဂတွေ ကူညီ

မကွေးတိုင်းဒေသကြီး စေတုတ္တရာမြို့နယ်၊ အမှတ် ၂ အလယ်စုရပ်ကွက်က မီးဘေးဒုက္ခသည်တွေကို မကွေးတိုင်း တက္ကသိုလ်ကျောင်းသားသမဂ္ဂတွေနဲ့ တောင်သူလယ်သမားသမဂ္ဂတွေက ငွေကျပ်သိန်း ၂၀ လောက်တန်ဖိုး ရှိတဲ့ ကျောင်းသုံးစာအုပ်တွေ၊ ကျောင်းဝတ်စုံတွေနဲ့ အခြေခံစားသောက်ကုန်တွေကို ဒီကနေ့ လှူဒါန်းခဲ့တယ်လို့ သိရပါတယ်။

ပြီးခဲ့တဲ့ မေလ ၁၄ ရက်နေ့က စေတုတ္တရာမြို့နယ် အမှတ် ၂ အလယ်စုရပ်ကွက်မှာ မီးလောင်ခဲ့ရာ အိမ်ခြေ ၁၀၀ နီးပါး မီးထဲပါသွားပြီး လူဦးရေ ၄၀၀ လောက် အိုးမဲ့အိမ်မဲ့ ဖြစ်ခဲ့ပါတယ်။ မီးဘေးဒုက္ခသည်တွေ အကူအညီ လိုအပ်နေတဲ့အကြောင်း အဲဒီအမှတ် ၂ အလယ်စုရပ်ကွက်မှာ နေထိုင်သူ ကိုဝင်းမြင့်ထွေးက ပြောပါတယ်။

"ဌာနဆိုင်ရာအနေနဲ့ ကူညီမယ်ဆိုရင်တော့ တန်ဖိုးနည်းအိမ်ရာကို မိုးမကျမီမှာ အမြန်ဆုံး စီစဉ်ပေးစေချင်ပါတယ် ၊ နောက်ထပ်အလှူရှင်များလာမယ်ဆိုရင်လည်း ဒီမှာအခြေခံစားသောက်ကုန်တွေက ပြည့်စုံနေပြီဖြစ်တဲ့ အတွက် စောင်၊ ခြင်ထောင်၊ ခေါင်းအုန်းတို့ လောလောဆယ် အရေးပေါ်လိုအပ်နေပါတယ်လို့၊ ကလေးတွေရဲ့ ကျန်းမာရေး၊ ပညာရေးအနေနဲ့ရော ရာသီဥတုကလည်း မိုးရွာလာတော့မယ့် အနေအထားကို ရောက်နေရတဲ့ အတွက် အခက်အခဲလေးတွေရှိပါတယ်"

မီးဘေးဒုက္ခသည်အများစုဟာ နီးစပ်ရာဆွေမျိုးအိမ်တွေမှာ လိုက်လံနေထိုင်နေကြပြီး စလင်း၊ ပွင့်ဖြူ၊ စကု စတဲ့မြို့နယ်တွေက လူမှုအဖွဲ့အစည်းတွေကလည်း  ကူညီပေးကြတယ်လို့ သိရပါတယ်။