အပစ်ခတ်ရပ်စဲရေး မြန်မာအစိုးရ ကိုယ်စားလှယ်လွှတ် ဆွေးနွေး

KNG က ရေးသားရာမှာ ကြံ့ခိုင်ဖွံ့ဖြိုးရေးပါတီ ခေါင်းဆောင်တဦးလည်း ဖြစ်၊ ကချင်ပြည်နယ်က လွှတ်တော် ကိုယ်စားလှယ်တဦးလည်း ဖြစ်တဲ့ ဦးသိန်းဇော်က ကချင် အတိုင်ပင်ခံကောင်စီ KNCA အဖွဲ့ဝင် ၄ ဦးကို KIO ဌာနချုပ် လိုင်ဇာကို စေလွှတ်ခဲ့တယ်လို့ ဆိုပါတယ်။

ကြံ့ခိုင်ဖွံ့ဖြိုးရေးပါတီ ခေါင်းဆောင် ဦးသိန်းဇော်က … မြန်မာအစိုးရဟာ KIA နဲ့ အပစ်ရပ်ဖို့ အဆင်သင့်ရှိကြောင်း ကချင် အတိုင်ပင်ခံကောင်စီ ကတဆင့် သတင်းစကား ပါးခဲ့တယ်လို့ သိရပါတယ်။ KIO ဘက်ကတော့ အပစ်အခတ် ရပ်စဲရေးကိစ္စကို အခုလို နှုတ်နဲ့ ပြောဆိုတာမျိုး မဟုတ်ဘဲ၊ စာနဲ့ ရေးသားပြီး ပြောဆိုဖို့ ပြန်လည် တောင်းဆိုထားတယ်လို့ KNG သတင်းမှာ ရေးသားထားပါတယ်။

ဒီအတောအတွင်း KWAT ခေါ် ကချင်အမျိုးသမီး အစည်းအရုံးကလည်း စစ်အစိုးရတပ်တွေက ကချင်ပြည်သူတွေကို ထိုးစစ်ဆင်နေတဲ့ကိစ္စ ရပ်တန်းက ရပ်ဖို့ တောင်းဆိုလိုက်ပါတယ်။

မြန်မာအစိုးရတပ်တွေနဲ့ KIA ကချင်တပ်တွေကြား တိုက်ပွဲတွေကြောင့် မြန်မာနိုင်ငံမြောက်ပိုင်း ရေကာတာ စီမံကိန်းတွေမှာ အလုပ်လုပ်နေ ကြတဲ့ တရုတ်အလုပ်သမား ၂ဝဝ ကျော်ဟာ လာရင်း တရုတ်ပြည်ကို ပြန်သွားကြပြီလို့ မြန်မာအစိုးရထုတ် သတင်းစာတွေက ဖော်ပြပါတယ်။ ဧပြီလ ၉ ရက်ကနေ ၁၄ ရက်အတွင်း တရုတ်အလုပ်သမား ၂၁၅ ဦး နေအိမ် ပြန်သွားတယ်လို့ သတင်းမှာ ရေးသားထားပါတယ်။