သရုပ်ဖော်ပြဇာတ် စီစဉ်သူ နှစ်ဦး အမှုအတွက် မြစ်ကြီးနားမှာ ဆန္ဒပြ

ကချင်စစ်ဘေးသရုပ်ဖော်ပြဇာတ် ဦးဆောင်ခဲ့သူ နှစ်ဦးကို ထောင်ဒဏ် ၁၅ ရက် ချမှတ်ခဲ့တာကို ကန့်ကွက်ကြောင်း မြစ်ကြီးနားမြို့မှာ ဒေသခံ ၅၀ ခန့် ဒီနေ့မနက်က ဆန္ဒပြခဲ့ကြပါတယ်။

ဆန္ဒပြသူတွေက စစ်ဘေးဒုက္ခသည်တွေရဲ့ ခံစားချက်တွေကို မေ့ပျောက်ထားတာကို ကန့်ကွက်ကြောင်းနဲ့ စစ်ဘေး ဒုက္ခသည်အရေးဆောင်ရွက်တဲ့ ကိုပေါလုနဲ့ မဆိုင်းနူးပန် တို့ကို စက်တင်ဘာ ၂ ရက်နေ့က ပြစ်ဒဏ်ချမှတ်ခဲ့တာဟာ လွတ်လပ်စွာထုတ်ဖော်ပြောဆိုခွင့်ကို ပိတ်ပင်ရာရောက်ကြောင်း ဆန္ဒပြပွဲ ဦးဆောင်သူတွေက ပြောပါတယ်။

ပြီးခဲ့တဲ့ ဇွန် ၉ ရက်နေ့မှာ စစ်ဘေးဒုက္ခသည်တွေ ၈ နှစ်အတွင်း သူတို့ခံစားခဲ့ရတဲ့ ခံစားချက်တွေကို ထင်ဟပ်တဲ့ သရုပ်ဖော်ပြဇာတ်ကို မြစ်ကြီးနားမြို့ ဗိုလ်ချုပ်ကြေးရုပ်ပန်းခြံရှေ့နဲ့ ပြည်သူ့ရင်ပြင်မှာ တင်ဆက်ခဲ့ကြအပြီး  ကချင်လူငယ် နှစ်ဦး အရေးယူခံရတာဖြစ်ပါတယ်။

စီရင်ချက်ကို မကျေနပ်တဲ့အတွက်  လာမယ့် စက်တင်ဘာ ၆ ရက်နဲ့ ၉ ရက်နေ့တွေမှာလည်း ဆက်လက်ဆန္ဒပြ သွားမယ်လို့ ဦးဆောင်သူတွေက ပြောပါတယ်။

(RFA သတင်းထောက် အဲလိဇဘက်ဂျန်မာ ပေးပို့သည်)