ကချင်ပြည်နယ်စစ်ပွဲမှာ လေကြောင်း တိုက်ခိုက်မှုကို နိုင်ငံတကာ ကန့်ကွက်

ကချင်ပြည်နယ်မှာ စစ်ပွဲတွေပြန်ဖြစ်လာတဲ့အပေါ် အထူးစိုးရိမ်မိတယ်လို့ အမေရိကန်နိုင်ငံခြားရေးဌါနက ပြောလိုက်ပါတယ်။

ဒါကြောင့် မြန်မာအစိုးရရော ကေအိုင်အေ ဘက်ကပါ တိုက်ပွဲတွေရပ်ပြီး စစ်မှန်တဲ့ တွေ့ဆုံဆွေးနွေးပွဲတွေပြုလုပ်ဖို့ တိုက်တွန်းတဲ့အကြောင်း အမေရိကန်နိုင်ငံခြားရေးဝန်ကြီးဌါန ပြောခွင့်ရပုဂ္ဂိုလ် Victoria Nuland မစ္စစ် ဗစ်တိုးရီယား နူလန်က မနေ့က ပြောလိုက်ပါတယ်။

ဒီအတောအတွင်းမှာပဲ ကုလသမဂ္ဂအတွင်းရေးမှူးချုပ် ဘန်ကီမွန်းကလဲ ကချင်ပြည်နယ်ကစစ်ပွဲမှာ မြန်မာစစ်တပ်က လေကြောင်းကနေ တိုက်တာကိုရပ်ဖို့နဲ့ အရပ်သားတွေကို ထိခိုက်စေတဲ့ ဘယ်လိုဆောင်ရွက်ချက်မျိုးမဆို ဆက်မလုပ်ဖို့ မြန်မာအစိုးရကို တောင်းဆိုလိုက်ပါတယ်။

ဒါ့အပြင် လက်ရှိတိုက်ပွဲတွေကြောင့် စစ်ပြေးဒုက္ခသည်ပိုများလာပြီး သူတို့အတွက် အကူအညီတွေပေးဖို့ လိုအပ်လာသလို၊ အချိန်မှီထောက်ပံ့ ကူညီနိုင်ဖို့ကလဲ အရေးကြီးတယ်လို့ ပြောလိုက်ပါတယ်။ ပြီးခဲ့တဲ့ ဒီဇင်ဘာလ ၃ဝရက်နေ့က ကချင်ပြည်နယ်တိုက်ပွဲမှာ မြန်မာ့တပ်မတော်က လေကြောင်းအကူအညီကို အသုံးပြုခဲ့တယ်လို့ ဒီနေ့ထုတ် အစိုးရသတင်းစာတွေမှာ ဖေါ်ပြထားပါတယ်။