နိုင်ငံတကာကြက်ခြေနီအဖွဲ့ ICRC မြန်မာနိုင်ငံ က အကျဉ်းထောင်တွေကို လာကြည့်မည်

အမေရိကန်သမ္မတ အိုဘားမား မြန်မာပြည်ကို မလာရောက်ခင်မှာ ဦးသိန်းစိန်အစိုးရက ICRC ကို မြန်မာနိုင်ငံ အကျဉ်းထောင်တွေဆီ လာရောက်ကြည့်ရှုနိုင်ကြောင်း ဖိတ်ခေါ်ခဲ့ပါတယ်။

ဒါပေမဲ့ မြန်မာနိုင်ငံကို သွားရောက်မယ့်ရက် အတိအကျကို မပြောနိုင်သေးကြောင်း၊ ဖြစ်နိုင်သမျှ မြန်မြန်သွားမှာဖြစ်ကြောင်း အရှေ့တောင်အာရှနဲ့ ပစိဖိတ်ဒေသဆိုင်ရာ ICRC အကြီးအကဲ Alain Aeschimann က ပြောပါတယ်။

ဦးဆုံးပထမ ရှေ့ပြေး အလည်အပတ်အစီအစဉ်နဲ့ စတင်ဖို့ မြန်မာအာဏာပိုင်တွေနဲ့ မိမိတို့ သဘောတူညီ ထားပါတယ်၊ အဲဒီအစီအစဉ်မှာ နိုင်ငံတကာမှာ မိမိတို့ ကျင့်သုံးနေတဲ့နည်းလမ်းတွေ၊ ဆောင်ရွက်ပုံတွေအတိုင်း အကျဉ်းထောင်တွေကို ကြည့်ရှုစစ်ဆေးသွားမှာဖြစ်ပါတယ်၊ ရှေ့ပြေးအစီအစဉ်ပြီးတဲ့အခါ ကျန်နေသေးတဲ့ အကျဉ်းထောင်တွေအတွက် တိုးချဲ့ဆောင်ရွက်ဖို့ စီစဉ်မှာဖြစ်ပါတယ် လို့ Alain က ပြောပါတယ်။

ဒါ့ပြင် လူမျိုးရေး ပဋိပက္ခတွေဖြစ်ပွားနေတဲ့ ရခိုင်ပြည်နယ်ကို သွားရောက်ကူညီခွင့်ရရှိလိမ့်မယ်လို့ မျှော်လင့်ကြောင်းလည်း ပြောဆိုပါတယ်။

ICRC ဟာ ၂ဝဝ၅ ခုနှစ် ကစပြီး မြန်မာနိုင်ငံက အကျဉ်းထောင်တွေကို သွားရောက်ကြည့်ရှုတာတွေ ရပ်ဆိုင်းခဲ့ပါတယ်။ အဲဒီတုန်းက စစ်အစိုးရက ICRC အနေနဲ့ အကျဉ်းထောင်တွေကို ဝင်ရောက်တဲ့အခါ အစိုးရကိုယ်စားလှယ် အဖွဲ့အစည်းတွေနဲ့အတူ ဝင်ရောက်ရမယ်လို့ ကန့်သတ်လိုက်တဲ့အတွက် ICRC  က မြန်မာပြည်က လုပ်ငန်းတွေကို ရပ်ဆိုင်းခဲ့တာဖြစ်ပါတယ်။