အလုပ်သမားအဖွဲ့ပိုင်မြေ ပြန်ရဖို့ ဆန္ဒပြ

"ကျနော်တို့ အလုပ်သမားနာမည်နဲ့ ပေါက်ပြီးသားဂရန်ကို အဖွဲ့အနေနဲ့ ပေါက်ထားတဲ့ဂရန်ကို တစ်ဦး တစ်ယောက်အနေနဲ့ သူပိုင်ပါတယ်ဆိုပြီးတော့ တစည တာဝန်ရှိသူတစ်ယောက်နဲ့ အဲဒီဂရန်ကို မြေစာရင်းမှာ မှတ်ပုံတင်ပြီးတော့ နာမည်ပြောင်းယူသွားတယ်၊ အဲဒီကိစ္စကို မကျေနပ်လို့ပါ"

ဆိပ်ကမ်းအလုပ်သမားအဖွဲ့ပိုင်အဖြစ် မြေဂရန်ပေါက်ထားတဲ့ မြေနေရာနဲ့ အလုပ်သမားရုံး အဆောက်အဦးကို အလုပ်သမားအဖွဲ့ ဥက္ကဌဟောင်းက တစည ပါတီကို လွဲပြောင်းပေးအပ်ခဲ့ပြီး ၁၉၉၅ ခုနှစ်မှာ တစညပါတီအမည်နဲ့ ဂရန်ပြောင်းလျှောက်ထားတဲ့အချိန်မှာ အလုပ်သမားတွေက ဝိုင်းဝန်းကန့်ကွက်ခဲ့တယ်။

အဲဒီနောက် ၂၀၀၉ ခုနှစ်မှာလည်း တစညပါတီက ထပ်မံလျှောက်ထားခဲ့ပြီး ၂၀၁၂ ခုနှစ်မှာ တစညပါတီမြေ ဂရန်ပေါက်ပြီး နောက်ပိုင်းမှသာ အလုပ်သမားတွေက သိရှိခဲ့ရတဲ့အတွက် စစ်ကိုင်းတိုင်းအစိုးရအဖွဲ့နဲ့ သက်ဆိုင်ရာ တာဝန်ရှိတဲ့ဌာနတွေကို တိုင်ကြားခဲ့ပေမယ့်လည်း ဖြေရှင်းပေးတာမရှိဘူးလို့ သိရပါတယ်။

ဆန္ဒပြသူတွေဟာ ဒီနေ့မနက် ၉ နာရီမှာ တ.စ.ည ပါတီကို လွှဲပြောင်းခံလိုက်ရတဲ့ အလုပ်သမားရုံးရှေ့မှာ စုဝေးဟောပြောတာတွေ ဆောင်ရွက်ခဲ့ပြီး မြို့တစ်ပတ် ပတ်ကာ ဆန္ဒပြခဲ့ကြတာဖြစ်ပါတယ်။

လက်ရှိအချိန်မှာ အလုပ်သမားအဖွဲ့အစည်း ပိုင်ဆိုင်ခဲ့တဲ့ အဲဒီအဆောက်အအုံမှာ အလုပ်သမားတွေနားခိုခွင့် မရှိတော့ဘဲ တစညပါတီက ရုံးခန်းအဖြစ်ဖွင့်လှစ်ထားတယ်လို့ ဆိပ်ကမ်းကုန်တင်ကုန်ချ အလုပ်သမားအဖွဲ့ထံက သိရပါတယ်။