ထိုင်းရောက် မြန်မာတွေကို သံရုံး သတိပေး

လာမယ့် သြဂုတ်လ ၇ ရက်နေ့မှာ ထိုင်းနိုင်ငံမှာ ဖွဲ့စည်းပုံအခြေခံဥပဒေမူကြမ်း ပြည်လုံးကျွတ် ဆန္ဒခံယူပွဲ ကျင်းပမှာဖြစ်တဲ့အတွက် လုံခြုံရေးကို တိုးမြှင့်ထားတာကြောင့် ထိုင်းနိုင်ငံရောက် မြန်မာနိုင်ငံသားတွေအနေနဲ့ အထူးသတိပြု သွားလာကြဖို့ ထိုင်းနိုင်ငံဆိုင်ရာ မြန်မာသံရုံးက မနေ့က သတင်းထုတ်ပြန်လိုက်ပါတယ်။

ထိုင်းနိုင်ငံရောက် မြန်မာနိုင်ငံအလုပ်သမားတွေ အပြင်ထွက်တဲ့အခါ ၊ ခရီးသွားလာတဲ့အခါ စာရွက်စာတန်း အထောက်အထားအပြည့်အစုံ ယူဆောင်သွားကြဖို့ လိုအပ်တယ်လို့ ထိုင်းနိုင်ငံဆိုင်ရာ မြန်မာ သံအမတ်ကြီး ဦးဝင်းမောင် က ပြောပါတယ်။

"သူတို့နိုင်ငံမှာ သူတို့ဘာသာအလုပ်လုပ်တာလေ၊ သူတို့ကိစ္စလုပ်တဲ့အချိန်မှာ ကိုယ့်လူတွေမပါအောင် လို့ပါ၊ ကိုယ့်လူကကြားထဲမှာ သွားရင်းလာရင်းနဲ့ မတော်တဆဖြစ်မှာစိုးလို့ တားတဲ့သဘောပါ၊ သွားစရာရှိရင် အထောက်အထားအပြည့်အစုံနဲ့ သွားဖို့လိုတာပေါ့၊ အထောက်အထားပြည့်စုံလို့ ဖမ်းတာလား၊ မပြည့်စုံလို့ဖမ်းတာလား၊ အဲ့လိုတိတိကျကျသိရင်တော့ ဖွဲ့စည်းထားတဲ့အဖွဲ့ရှိတယ်လေ၊ ကူညီမယ့်အဖွဲ့အစည်းတွေဖွဲ့ထားပြီးသား၊ အဲ့ကော်မတီက သူ့ဘာသာသူလိုက်ရှင်းလိမ့်မယ်"