မြစ်ဆုံစီမံကိန်း အပြီးရပ်တန့်ရေး လက်မှတ် ၁ သန်း တရုတ်အစိုးရထံပို့ဖို့ စီစဉ်

မန္တလေး မဟာအောင်မြေမြို့နယ်၊ ရဲမွန်တောင်ရပ်၊ ကံတက်ကုန်း မစိုးရိမ်ကျောင်းတိုက်မှာ “မပြီးဆုံးသေးသော မြစ်ဆုံ” အမည်နဲ့ ဧရာဝတီနဲ့ သဘာဝ ပတ်ဝန်းကျင်ရေးရာများ ဟောပြောပွဲတရပ်ကို ဒီကနေ့ နေ့လည်၁နာရီက ကျင်းပခဲ့ရာမှာ သဘာဝပတ်ဝန်းကျင် ထိန်းသိမ်းရေး ဟောပြောသူ ဦးဝင်းမျိုးသူရဲ့ ဆွေးနွေးတင်ပြချက်ကို ကိုးကားပြီး ဦးငြိမ်းချမ်းက အခုလိုပြောကြားလိုက်ခြင်း ဖြစ်ပါတယ်။

ဒီဟောပြောပွဲမှာ ဆရာဦးဝင်းမျိုးသူနဲ့ စာရေးဆရာ ကိုတာ တို့ ဟောပြောကြပြီး စိတ်ပါဝင်စားသူ လူ ၂ ရာကျော် တက်ရောက်ခဲ့တယ်လို့ သိရပါတယ်။

ဟောပြောပွဲမှာ ဆရာဦးဝင်းမျိုးသူက ကောက်ခံရရှိတဲ့ လက်မှတ်တွေနဲ့အတူ တရုပ်အစိုးရနဲ့ CPI ကုမ္ပဏီကို သွားရောက် ဆွေးနွေးပြီး မြန်မာပြည်သားတွေရဲ့ သဘောထားကို တင်ပြမယ့်အကြောင်း အကြံပြု ဆွေးနွေးသွားတယ်လို့ သိရပါတယ်။ စာရေးဆရာ ကိုတာ ကတော့ တရုတ်ကုမ္ပဏီတွေကို တိုင်းတာတဲ့ အခြေခံမူ (၆) ချက်နဲ့ ပတ်သက်လို့ ဆွေးနွေးတင်ပြသွားတယ်လို့ တက်ရောက်သူတွေက ပြောပါတယ်။

အခမ်းအနား အဖွင့်အမှာစကား ပြောကြားတဲ့ ကံတက်ကုန်း မစိုးရိမ်ကျောင်းတိုက် ပဓာနဆရာတော် အရှင် ဘဒ္ဒန္တ တေဇောဘာသက- ပြည်သူ့ဆန္ဒနဲ့ ညီညီညွတ်ညွတ်လုပ်ကြရင် ဘာမဆို အောင်မြင်ကြောင်း၊ ရေဘေးကို ရင်ဆိုင်ရာကအစ အခုနောက်ဆုံး ဖြစ်ပွားခဲ့တဲ့ အစာအဆိပ်သင့်မှုမှာလည်း အာဏာပိုင်တွေ အပါအဝင် ပြည်သူတွေ ညီညီညွတ်ညွတ် လုပ်ဆောင်တဲ့အတွက် အောင်မြင်ခဲ့တာ ဖြစ်ကြောင်း မိန့်ကြားသွားတယ်လို့ သိရပါတယ်။