တရုတ်လို အဓိပ္ပာယ်မကောင်းလို့ ကန်ပိုက်တီမြို့ကို စစ်ကောင်စီအမည်ပြောင်း

ကချင်ပြည်နယ် ဝိုင်းမော်မြို့နယ်အတွင်းက ‘ကန်ပိုက်တီ’ မြို့ဟာ တရုတ်ဘာသာစကားအရ ‘ခြောက်သွေ့ပျက်စီးတဲ့နေရာ’ လို့ အဓိပ္ပာယ်ထွက်တဲ့အတွက် ‘ကံပိုင်တည်’ လို့ အမည်ပြောင်းလဲလိုက်ကြောင်း စစ်ကောင်စီက ဖေဖော်ဝါရီလ ၂၁ ရက်နေ့မှာ သတင်းထုတ်ပြန်ပါတယ်။

တရုတ်ဘာသာစကားနဲ့ အဓိပ္ပာယ်ဖွင့်ဆိုတဲ့အခါ ‘ကန်=ခြောက်သွေ့ခြင်း၊ ပိုက်=ပျက်စီးခြင်း၊ တီ=နေရာ’ ဆိုပြီး အဓိပ္ပာယ်ထွက်တဲ့အတွက် မြန်မာစာလုံးပေါင်းသတ်ပုံကျမ်းအရ ‘ကံ=ကံကောင်းခြင်း၊ ပိုင်=ပြည်ထောင်စုက ပိုင်ဆိုင်ခြင်း၊ တည်=တည်ငြိမ်ခြင်း’ လို့ အဓိပ္ပာယ်ရအောင် ‘ကံပိုင်တည်’ ဆိုပြီး ပြောင်းလိုက်တာလို့ ဆိုပါတယ်။

ကချင်အထူးဒေသ (၁) ထာဝရငြိမ်းချမ်းရေးအဖွဲ့ချုပ် ဥက္ကဋ္ဌ ဦးဇခုန်တိန့်ယိန်းက ပြည်နယ်အစိုးရအဖွဲ့ ထောက်ခံချက်နဲ့ စစ်ကောင်စီထံ တင်ပြခဲ့ပြီး ပြည်ထဲရေးဝန်ကြီးဌာနက ခွင့်ပြုခဲ့တယ်လို့ ဆိုပါတယ်။

တရုတ်နိုင်ငံနဲ့နယ်နိမိတ်ချင်း ထိစပ်နေတဲ့ ကန်ပိုက်တီမြို့ဟာ မြန်မာ-တရုတ် ကုန်သွယ်ရေးစခန်း တည်ရှိတဲ့မြို့ဖြစ်ပါတယ်။ ရပ်ကွက် သုံးရပ်ကွက်၊ ကျေးရွာအုပ်စု သုံးအုပ်စု၊ ကျေးရွာပေါင်း ၃၀ တို့နဲ့ ဖွဲ့စည်းထားပြီး ၂၀၁၄ ခုနှစ်မှာ မြို့နယ်ခွဲအဆင့်ကနေ ‘မြို့’ အဆင့် သတ်မှတ်ခဲ့တာ ဖြစ်ပါတယ်။