AA ဖမ်းဆီးထားတဲ့ ALP အဖွဲ့ဝင် ငါးဦး ပြန်လွတ်လာ


2020.08.18
alp-office-622.jpg ကျောက်တော်မြို့မှာရှိတဲ့ ရခိုင်ပြည်လွတ်မြောက်ရေးပါတီ (ALP) ဆက်ဆံရေးရုံးကို တွေ့ရစဉ်
Photo: RFA

ရခိုင်ပြည်နယ် ပုဏ္ဏားကျွန်းမြို့ကနေ ရက္ခိုင့်တပ်တော် (AA) က ဖမ်းဆီးထိန်းသိမ်းထားတဲ့  ရခိုင်ပြည်လွတ်မြောက်ရေးပါတီ (ALP) က တွဲဘက်အတွင်းရေးမှူးအပါအဝင် ၅ ဦးကို ဒီနေ့ ပြန်လွှတ်ပေးလိုက်တယ်လို့ သိရပါတယ်။

ALP  ဒုတိယ ဗိုလ်မှူးကြီး ခိုင်ကျော်လှိုင်က သူတို့ ၅ ဦး  ဒီနေ့ နေ့လယ် ၂ နာရီလောက်က အားလုံးကျန်းကျန်းမာမာနဲ့ ပြန်လွတ်လာကြတာဖြစ်တယ်လို့ RFA ကို ဒီနေ့ညနေက ပြောပါတယ်။

ပြီးခဲ့တဲ့ သြဂုတ်လ ၁၀ ရက်နေ့က ပုဏ္ဏားကျွန်းမြို့နယ် မြောင်ကြီးကျေးရွာအနီးမှာ ALP အဖွဲ့က  တွဲဘက်အတွင်းရေးမှူး  ခိုင်အောင်စိုးသန်းနဲ့ ခိုင်မျိုးဇံ တို့အပြင် ဆေးဝန်ထမ်းတွေ ဖြစ်တဲ့ ခိုင်ဌေး၊ ခိုင်မိုးဇက်၊ ခိုင်ဟိန်းဇော်တို့ကို သူတို့နေအိမ်တွေကနေ  ဖမ်းဆီးသွားခဲ့တာလို့ ALP က သြဂုတ်လ ၁၁ ရက်နေ့က ထုတ်ပြန်ခဲ့ပါတယ်။

ဒီနေ့ ပြန်လွှတ်ပေးလိုက်တဲ့ကိစ္စနဲ့ ပတ်သက်လို့ AA က တစုံတရာထုတ်ပြန်ကြေညာတာ မတွေ့ရသေးပါဘူး။

AA အဖွဲ့ဟာ  ALP ပါတီဝင်တွေနဲ့ဆက်စပ်သူတွေကို အလားတူ ဖမ်းဆီးခေါ်ဆောင်မှုမျိုး  ၂၀၁၇ ခုနှစ်မှာ ၂ ကြိမ်၊ ဒီနှစ်ဆန်းပိုင်းမှာ ၁ ကြိမ် ပြုလုပ်ခဲ့ဖူးတယ်လို့ သိရပါတယ်။  

ရခိုင်ပြည်လွတ်မြောက်ရေးပါတီ ALP ဟာ တနိုင်ငံလုံး ပစ်ခတ်တိုက်ခိုက်မှုရပ်စဲရေးစာချုပ် NCA လက်မှတ်ရေးထိုးထားတဲ့အဖွဲ့ ဖြစ်ပြီး၊ AA ကတော့ အပစ်ရပ်စာချုပ်မထိုးသေးတဲ့အဖွဲ့ ဖြစ်ပါတယ်။

ရခိုင်ပြည်နယ်မှာ  တိုက်ပွဲတွေစတင်ဖြစ်ပွားခဲ့တဲ့ ၂၀၁၈ ခုနှစ် ဒီဇင်ဘာလကစလို့  အခုအချိန်ထိ တပ်မတော်ကရော AA အဖွဲ့ကပါ သူတို့မသင်္ကာသူတွေကို ဖမ်းဆီးစစ်ဆေးမှုတွေ ရှိနေပါတယ်။

ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။