ཨ་རིའི་ཕྱི་སྲིད་དྲུང་གཞོན་རྒྱ་ནག་ཏུ་འཚམས་གཟིགས།

༄༅༎ཨ་མི་རི་ཀ་དང་རྒྱ་ནག་དབར་གྱི་འབྲེལ་ལམ་ཉམས་གསོ་བྱ་རྒྱུའི་ཆེད་ཨ་མི་རི་ཀའི་ཕྱི་སྲིད་དྲུང་ཆེ་གཞོན་པ་སྐུ་ཞབས་ཇེམ་སི་སི་ཀྲའེན་སྦག་རྒྱ་ནག་ཏུ་འཚམས་གཟིགས་སུ་ཕེབས་ཡོད་པ་རེད།

ཨ་མི་རི་ཀས་ཐའེ་ལྦ་ལ་ཌོ་ལར་ཐེར་འབུམ་དྲུག་གི་མ་གནས་ཀྱི་གོ་མཚོན་ཚོང་བསྒྱུར་བྱ་རྒྱུའི་ཐག་གཅོད་གནང་པ་དང་ དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་དང་ཨ་མི་རི་ཀའི་སྲིད་འཛིན་ཨོ་སྦ་མ་རྣམ་གཉིས་ཨ་རིའི་ཕོ་བྲང་དཀར་པོའི་ནང་མཇལ་འཕྲད་གནང་པ་སོགས་ཀྱིས་རྐྱེན་པས་ཨ་མི་རི་ཀ་དང་རྒྱ་ནག་གི་འབྲེལ་བའི་རང་བཞིན་ཐད་དོ་ཕོག་ཆེ་ཙམ་བྱུང་ཡོད་པ་གནད་དོན་དབྱེ་ཞིབ་པ་ཚོས་འགྲེལ་བརྗོད་བྱེད་བཞིན་ཡོད་པ་རེད།

ཨ་མི་རི་ཀའི་ཕྱི་སྲིད་དྲུང་ཆེ་གཞོན་པ་ཇེམ་སི་སི་ཀྲའེན་སྦག་རྒྱ་ནག་ཏུ་ཕེབས་སྐབས་རྒྱ་ནག་གཞུང་ལ་བྱང་ཀོ་རི་ཡ་རྒྱལ་ཁབ་དྲུག་གི་གྲོས་མོལ་ནང་གང་མགྱོགས་ཕྱིར་ལོག་འབྱུང་ཐབས་ཐད་བྱང་ཀོ་རི་ཡའི་ཐོག་གནོན་ཤུགས་སྤྲོད་དགོས་པའི་རེ་སྐུལ་གནང་རྒྱུ་ཡིན་འདུག་ལ་ དེ་བཞིན་ཨི་རན་གྱི་ཐོག་མཉམ་འབྲེལ་རྒྱལ་ཚོགས་ནས་དཔལ་འབྱོར་གྱི་ཉེས་ཆད་སྣོན་མ་འགེལ་རྒྱུའི་གྲོས་ཆོད་གསར་པ་ཞིག་འཇོག་ཐབས་ཐད་ཨ་མི་རི་ཀའི་གཞུང་གིས་འབད་བརྩོན་གནང་བཞིན་པར་རྒྱ་ནག་གི་རྒྱབ་སྐྱོར་ཡོང་བའི་འབོད་བསྐུལ་ཡང་ཞུ་རྒྱུ་ཡིན་པ་རེད།

ཨ་མི་རི་ཀའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཕི་ལིབ་ཁ་རའོ་ལིས་ཨ་མི་རི་ཀ་དང་རྒྱ་ནག་དབར་གྱི་འབྲེལ་ལམ་མདུན་བསྐྱོད་བྱ་རྒྱུར་ཐའེ་ལྦན་དང་བོད་དེ་བཞིན་ཨིན་ཊར་དྲ་རྒྱའི་རང་དབང་དང་རྒྱ་ནག་གི་མི་དམངས་ཤོག་ལོར་གྱི་འཛའ་ཐང་སོགས་མི་མཐུན་པའི་གནད་དོན་ཁག་ཟུར་འཇོག་བྱེད་དགོས་ཀྱི་རེད་ཅེས་དང་ ད་དུང་ཁོང་གིས་བར་སྐབས་ང་ཚོ་ཡུལ་གྲུ་གཉིས་ཀྱི་འབྲེལ་ལམ་དེ་ཀྱག་ཀྱོག་རང་བཞིན་ཅན་ཞིག་གི་ཐོག་གནས་ཡོད་ན་ཡང་ ད་ཆ་འབྲེལ་ལམ་མགྱོགས་མྱུར་བསྐྱར་གསོ་བྱ་རྒྱུར་ཕྱོགས་གཉིས་ཀའི་ངོས་ནས་དོན་གཉེར་བྱེད་བཞིན་ཡོད་པ་གསུངས་འདུག།

འོན་ཀྱང་གཟའ་མིག་དམར་ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ ཆིང་སྒང་གིས་ རྒྱ་ནག་དང་ཨ་མི་རི་ཀའི་འབྲེལ་ལམ་ལ་དོ་ཕོག་ཕྱིན་པ་དེའི་ནག་ཉེས་ཡོངས་རྫོགས་ཨ་མི་རི་ཀར་ཡོད་པ་པེ་ཅིང་གི་རྒྱུན་ལྡན་གྱི་ལངས་ཕྱོགས་དེ་བསྐྱར་བཟློས་བྱས་ཡོད་པ་དང་ ཁོ་པས་ཨ་མི་རི་ཀའི་ངོས་ནས་རྒྱ་ནག་གི་ལངས་ཕྱོགས་ཁག་གལ་འགངས་ཆེན་པོར་ངོས་འཛིན་བྱེད་པའི་རེ་བ་ཡོད་ཅེས་བརྗོད་ཡོད་པ་རེད།