བཙན་བྱོལ་བོད་མིའི་དམངས་གཙོའི་ལས་དོན་ལ་བསྔགས་བརྗོད།

༄༅༎ཨ་རིའི་གྲོས་ཚོགས་འོག་མའི་འཐུས་མི་ཇེམ་སི་པི་མེཀ་ག་ལྦན་མཆོག་གིས་བཙན་བྱོལ་བོད་མིའི་སྤྱི་ཚོགས་ཁྲོད་དམངས་གཙོའི་ལས་དོན་འཐུས་སྒོ་ཚང་དུ་འགྲོ་བཞིན་པའི་གནས་སྟངས་གསལ་སྟོན་གནང་ཡོད་འདུག

ཨ་རིའི་མངའ་སྡེ་མེ་ས་ཅུ་སེཏ་སི་ནས་ཡིན་པའི་གྲོས་ཚོགས་འོག་མའི་འཐུས་མི་སྐུ་ཞབས་མེཀ་ག་ལྦེན་ཡིས་གཟའ་མིག་དམར་ཉིན་ཨ་རིའི་གྲོས་ཚོགས་སུ་གསུང་བཤད་གནང་བའི་སྐབས་ དེང་སྐབས་འཛམ་གླིང་ནང་མི་མང་པོས་དབང་ཆ་ཐོབ་རྒྱུར་ཐབས་ལམ་སྣ་ཚོགས་འཛིན་བཞིན་པའི་སྐབས་དེར་༧གོང་ས་ཏ་ལའི་བླ་མ་མཆོག་གིས་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་བཙན་བྱོལ་བོད་མིའི་དབུ་འཁྲིད་ལ་རྩིས་སྤྲོད་གནང་ཡས་དེ་ནི་འཛམ་གླིང་གི་ཟིན་ཐོར་འགོད་རྒྱུའི་རླབས་ཆེན་གྱི་མཛད་རྗེས་ཤིག་ཡིན་པ་མ་ཟད་ དེས་བཙན་བྱོལ་བོད་མིའི་དམངས་གཙོའི་བྱ་གཞག་དེ་བཞིན་འཕེལ་རྒྱས་ཀྱི་རྩེ་མཐོར་སོན་རྒྱུར་ཡང་ཕན་ཐོགས་ཆེན་པོ་ཡོང་རྒྱུ་ཡིན་པའི་ཁར་དེའི་ཐོག་ནས་བོད་ནང་གི་བོད་མི་ཙམ་མ་ཟད་ རྒྱ་ནག་ནང་ལ་ཡང་དམངས་གཙོ་དང་རང་དབང་གི་རྨང་གཞི་གཏིང་རྒྱུར་ཡང་ཕན་ཐོགས་ཆེན་པོ་ཡོད་པས་  གནད་དོན་དེའི་ཐོག་ང་ཚོས་གལ་འགངས་ཆེན་པོ་ཞིག་དུ་རྩིས་ནས་དོ་སྣང་དང་གུས་ཞབས་ཞུ་དགོས་ཀྱི་རེད་ཅེས་གསུང་འདུག 

ཡང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་མེཀ་ག་ལྦན་ཡིས་མུ་མཐུད་གསུང་ན་ ཕྱི་ལོ་ཉིས་སྟོང་བཅུ་གཅིག་ལོའི་ཕྱི་ཟླ་བརྒྱད་པའི་ཚེས་༨ཉིན་འཛམ་གླིང་ས་ཕྱོགས་གང་སར་གནས་པའི་བཙན་བྱོལ་བོད་མི་ཚོའི་སྐུ་ཚབས་བཞུགས་སྒར་རྡ་རམ་ས་ལར་མཉམ་འཛོམས་གནང་ཏེ་བཙན་བྱོལ་བོད་མི་ཚོས་དམངས་གཙོའི་ལམ་གྱི་ཐོག་ནས་འོས་འདེམས་བྱས་པའི་བཀའ་བློན་ཁྲི་པའི་དམ་འབུལ་མཛད་སྒོ་ཚུགས་རྒྱུ་ཡིན་པ་དང་ དེར་བརྟེན་ངས་བོད་མི་ཚོར་དམངས་གཙོའི་ལམ་གྱི་ཐོག་ནས་འོས་འདེམས་བྱས་པའི་བོད་མིའི་དབུ་ཁྲིད་དང་བོད་མི་ཚོར་འཚམས་འདྲི་ཞུ་རྒྱུ་ཡིན་ཞེས་གསུང་འདུག