གཞོན་ནུའི་རྒྱུན་ལས་གསར་པ།

༄༅༎ཕྱི་ལོ་ ༢༠༡༣ ཟླ ༥ ཚེས་ ༢༧་ནས་བཟུང་བཞུགས་སྒར་དུ་སྐོང་ཚོགས་གནང་བའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་བཅོ་ལྔ་པ་དེ་བཞིན། ཕྱི་ཟླ་དྲུག་པའི་ཚེས་གཅིག་གི་ཉིན་མཇུག་སྒྲིལ་གནང་བ་དང་འབྲེལ་སྐབས་བཅོ་ལྔ་པའི་དབུས་རྒྱུན་གསར་པ་བདམས་ཡོད་པ་དང་། རྒྱུན་ལས་གསར་པ་རྣམས་ནི། ཨ་རིའི་མེ་ནེ་སོ་ཊ་ནས་ཕེབས་པའི་བསྟན་འཛིན་འཇིགས་མེད་ཚོགས་གཙོ་དང་། བལ་ཡུལ་ནས་ཕེབས་པའི་རྟ་མགྲིན་སྲིད་ཆོས་ཚོགས་གཞོན། བསྟན་འཛིན་ལམ་བཟང་དྲུང་ཆེ་ལ་འོས་འདེམས་བྱས་ཡོད་པ་རེད། དེ་མིན་གྱི་རྒྱུན་ལས་གཞན་དག་ནི་བཀྲ་ཤིས་དོན་གྲུབ་དང་། ངག་དབང་བློ་བཟང་། བསྟན་འཛིན་བརྩོན་འགྲུས། ཡེས་ཤེས་བསྟན་འཛིན། ཚེ་དབང་སྒྲོལ་མ། ཉི་མ་ཆོས་འཛོམས། བསྟན་འཛིན་དབང་ཕྱུག་བཅས་ཡིན་པ་རེད།
གསར་དུ་འོས་འདེམས་བྱུང་བའི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་གཞོན་ནུ་ལྷན་ཚོགས་ཀྱི་དམིགས་ཡུལ་ལངས་ཕྱོགས་ལྟར་བོད་རང་བཙན་འཐབ་རྩོད་ཆེད་ལས་དོན་བྱེད་རྒྱུ་དང་། ༸གོང་༧སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་ཐུབ་པའི་ཆེད་དུ་ལས་དོན་བྱེད་རྒྱུ་ཡིན་པ་དང་། དེ་བསྒྲུབ་རྒྱུར་ཚོགས་མི་ཚང་མས་རྒྱབ་སྐྱོར་དང་མཉམ་རུབ་གནང་དགོས་པ་ནི་གལ་ཆེན་པོ་རེད་ཅེས་གསུངས་འདུག
ཐེངས་འདིའི་ཚོགས་ཆེན་ཐོག་དགའ་ལྡན་ཕོ་བྲང་དུ་སྙན་ཞུ་ཞིག་ཕུལ་བ་དང་འབྲེལ་གྲོས་ཆོད་དོན་ཚན་དང་པོ་དེ་མ་ཤེས་པའི་དབང་གིས་༧གོང་ས་མཆོག་གི་ལྷ་དགོངས་འཁྲུག་པའི་རིགས་དགོངས་སེལ་ཞུ་རྒྱུ་དང་། དོན་ཚན་གཉིས་པ་སྦིིར་ས་གནས་སུ་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཀྱི་སྐབས་བཞག་པའི་བཙན་བྱོལ་བོད་མིའི་སྒྲིག་འཛུགས་ཀྱི་ལངས་ཕྱོགས་རང་བཙན་ལ་སྒྱུར་དགོས་ཀྱི་འདུག་ཅེས་པའི་གྲོས་ཆོད་དེ་ཕྱིར་འཐེན་བྱ་རྒྱུ། གསུམ་པ་དེ་གཞོན་ནུའི་ལངས་ཕྱོགས་རང་བཙན་ཡིན་པའི་ཐོག་ནས་འབྱུང་འགྱུར་༧གོང་ས་མཆོག་གི་བཀའ་དགོངས་ལྟར་ལས་དོན་བསྒྲུབ་རྒྱུ་ཡིན་ཞེས་པ་གསུམ་ཡིན་པ་རེད།།